7 C
Čakovec
Petak, 29 ožujka, 2024

Žene navek se nejbole znajo

[layerslider id=”6″]

Vodeči hadezeovec, Andrej (da je Međimorec bil bi Drašek) Plenkovič je odnesel našoj precednici Kolindi Grabar Kitarovič dokumenta na šteroga je potpisal 91 sabornik šteri se slažejo kaj HDZ složi novi Vlado tak da se moremo nadjati kaj bodemo, črez kratek cajt, meli novo Vlado. Ne bi vam znal točno reči je li je to ruon tak velika sreča jerbo nam ovak brez prave Vlade čistam dobro ide, ali moramo zafremati novo Vlado kaj se ne bodo si drugi, a posebno naši sosedi, z nas norca delali. Gospon Plenkovič je ne dugo hodal do Pantovčaka i do Kolinde, ali je moral prejti prek Mosta ili pak po Mosto jerbo da je ne bilo tak ne bi mel na dokumento 91 potpisa. Verjem da znate kak so se dugo spominali Hadezeovci i Mostači (kuliko so mandarini pojeli i kuliko dingača spili) kaj so došli do toga tak važnoga papera. Brzčas je ne Andrej tak hudi da so ga potpomoglii drugi igrači šteri ne igrajo v prvoj postavi, ali za saki slučaj ak nešterni od prvih igračov skrahera. Ste vidli kak je zišel naš labodoritaški izbornik Tonček Čačičov, ostal je brez glavnih igračov i da je ne mel rezervne nigdar ne bi Kosovare i labodoritaše Nokije pobedil.  Isto tak so Plenkovičo dobro došli Beljakovi „seljaki“, Bandičovi „igrači“, Radimir Čačič, šteri se navek prišmajhla k onima šteri držijo cugle vlasti vu svojimi rokami, a kcoj je došel i srbin Milorad Pupavac z svojimi filistri jerbo oni navek morajo biti z onima šteri držijo v roki ključe od državne kase. I tak vidite, saki sabornik zna za kaj se je prišmajhal k Plenkovičo, novomo precedniko Vlade, kak se to več ve vidi, jerbo si se oni zgovarjajo kak jim je Lejpa naša pre srco i da joj očejo pomoči, a mi si znamo da je još nigdar ne pes lajal zbog sela neg zbog sebe. Kak bilo da bilo skorom leto dni smo glase davali, drukali, čakali i kak zgledi, na se zadje bomo došli na svoje i kaj bodo političari, kak saborniki, tak i ministri počeli delati svojega posla, pak bodemo i mi mali ljudi šteri se kaj imamo, a to je naš glas, davlemo političarima.

Još negda je nešči rekel da bode Lajpa naša počela rasti i cvetati dok se bode rešila Jugoslavije. Si znamo da se je Juge rešila pred dvajsti let, a cvetje se još ne vidi jerbo se je ne rešila Jugoslavena.

Minuli tjeden so i ovi naš klošari šteri spijo po klupami v čakoskomo parko meli svojega dneva i to ne običnoga nego svetskoga – obiležili smo Svecki den beskučnika, očem reči, klošara. Kuliko sam mel za čuti prinas v Lepoj našoj ga je cirka dve jezere ljudi šteri nemajo svoje krove nad glavaj i šteri sako večer morajo iskati de i zkim bodo ubili oko, a do ve smo uspeli skrpati hostele, očem reči, kvartele za jif 450. Kaj vam bodem rekel, za ljude šteri se klatarijo od jene klupe v parko do druge i iščejo štera je fraj ili pak stanuvlejo na sakefele kolodvorima nemamo dosti mesta i posteli, ali zato pesi i mački, štere smo našli po vulicaj,  imajo svoje hostele, očem reči, imajo svoje mesto pod suncom. No, nekaj sam mel za čuti čim smestimo se pse i mačke lutalice mam bodo i ljudi na redo. Što se fčeka jerbo zima jako glasno ranjka na potna vrata.

Pred tjeden dni so naši skorom nejbolši labodoritaši igrali kvalifikacijsko utakmico za Svecko prvenstvo 2018. leta v Rusiji. Najme kaj, v albanskomo Skrado je igrala druga momčad Kosova protiv druge momčadi Lejpe naše. Zakaj druge momčadi? Prva momčad Kosova igra za reprezentacijo Švicarske, a naša prva momčad je bila na bolovanju. Ne znati kak bi zigrale prve momčadi, ali med drugim momčadima so bolši bili naši labodoritaši jerbo so zabili šest goli, a Kosovari so labodo ritali polek ili pak prek gola tak da oni brzčas  ne bodo vidli Svecko prvenstvo, a naši dečki još imajo šanse, a pogotovo ak prva momčad bode čim duže na bolovanjo.

Žene pomalem jemlejo v svoje roke cugle vlasti i na ovomo našemo falačko zemle Med dvemi vodami, očem reči, vu ovomo našemo Cvetnjako. Ne znati je li je to dobro ili pak ne, ali mi moški sam čkomimo i magadimo jerbo nebremo si pomoči. Evo napriliko v penzijo se nam je zravnal naš Vladek Kalšan šteri je delal i hercuval v našemo Međimorskomo muzejo skorom četrdeset let. Napravil je ono kaj je napravil, a se ono kaj je ostalo za naprajti so žene prijele v svoje roke i to sam zato kaj pokažejo nam moškima kak se posel dela. Žene hercuje z našaj međimorskaj cestaj s Zavodom za javno zdraviče, a što zna je li ne bode i nešterna žena (čitaj: doktorica) postala glavna i v bolnici jerbo je natječaj otprti, a moški so več jeno dvapot ne prešli. Nit se ne zna de moški sam sedijo v prvomo redo (čitaj: v direktorskaj foteljaj), a žene vlečejo cugle ozaj za ferungom.  Verjem da znate kak v Dopisništvo državne televizije za of naš maloširši hatar hercujejo ruon tak žene. Do fčera je v glavni fotelji sedela Tamara Peras, a unda so se žene, očem reči, težaki pobunili i ve nam je Tamara v stresoi dobila je bolovanje, a cugle vlasti je v svoje roke zela, pogunuli ste, pak žena i to Gordana Lovrečić i to tak dugo dok se Tamara reši stresa. Znate kaj si gruntam: pak kaj te moški z televizije nemajo vupeše (čitaj: muda) kaj bi vudrili z šakom po stolo i kaj bi reda naprajli? Ak vam slobodno povem, ve sam jif jeno odvečer našel v krčmi pre Štefici kak so se pomalem krepili i tukli so po šanko dok je Tamara bila na dnevnomo redo. V krčmi imajo vupeše, a doma so (čitaj: na poslo) menši od makovoga zrna. Morem vam reči da mi je to odnekod poznato, ali nesmemo pozabiti da je vu vino istina i če jo čovek duže išče se vejč vupeša ima.

Kaj vam bodem rekel, pak žene se pomalem i v politiko rivlejo makar se o politiki ruon lepo ne pripoveda. Kaj se glasneše pripoveda da je politika ( a  tak so i teca Franca rekli) kurva se vejč se ženi v politiko rivle. Ne tak zdavnja je gospa Vesna vodila Narodnjake, a posle zadjih izborov je na svetlo dneva zišla istina kak je naša beličanka Vladimira Palfi šefica Živoga zida i kud ona okom tud „zidari“ skokom i još dale kaj nebom vum daval jive stranačke trajne i na presušanje metal jivoga, očem reči, „živoga“ zmazanoga veša. Šefica je glavna makar se još ne zna je li jena fakultetska diploma vredi ili si jo je kupila na semo v Tuzli? I žene so med Laburistima zrušile našega šenkovčara Drageca Lesarovoga i dok so one zele cugle vlasti v svoje roke kola so genula doli z brega i kak zgledi Laburisti bodo odišli po riti k meši i završili bodo v ropotarnici povjesti. I med „seljakima“ ga nega mira kaj se dotikavle spolne ravnopravnosti, kak v Međimorjo, tak i v Lepoj našoj, makar so na selo odnavek moški meli prvo i zadjo reč, ali ve so nekši novi cajti i pušejo novi (ženski) vetri štere mi moški ne razmemo. Ali je to niti ne važno kaj jif ruon nejbole ne razmemo nek si nebremo pomoči, nebremo jif folgati i nejvečpot nas otpuhnejo. Ne znati je li to bode vredo kaj bodo žene hercuvale z svetom? Tu nam je več dugo Angela v Dojčlando, kraljico v Engleskoj več niti ne računam, ali ne znati kaj se bode pripetilo ak Ameri zberejo Hilari Klinton. To niti naš dragi Božek nebre reči kam bode unda te naš svet odišel? Pak nebre se niti on restrgati.

Nekaj sam si gruntal kak je skradja vura kaj bi si naš Božek otprl svojo Fejsbuk stranico tak kaj bi mi saki den znali kaj on o čemo misli i kaj si nej morali gruntati kak bodo nešterne naše nevole na se zadje zišle. To več dugo čakajo i ovi z udruge Franak, a i ovi z Živoga zida šteri so ne zajme vrnuli.

Od minuloga tjedna se je nišči ne kandideral za župana na izboraj šteri bodo pred nami v majušo drugo leto tak da ve imamo sam gospona Mladena Novaka i kak sam vam več rekel kaže nam se župan z mustači. A kaj ti je moški brez mustačov? To vam ne bi mogel ruon točno otpovedati, ali ak vas to jako interesera pitajte žene. One ionak se nejbole znajo. Prekfčera sam zišel pajdaša v svetešjoj majci na šteroj je pisalo: Meni ne tre diploma moja žena se zna!

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE