309[layerslider id=”6″]
Ste vidli kak so se počeli spominati Ameri i Rusi? Ne da se spominajo sam prek nišana, kak je to nejvečpot bilo, nek jeni drugima pomažejo. Da čovek ne poveruje. Još lani se je pripovedalo i to navelikom kak so Rusi pomogli Trumpu kaj dojde na vlast. A si znamo da de ga jega dima mora negdi biti i ogej. I tak je i bilo. Nejpredi so se Rusi čudili, kak picek glisti, dok so jif spituvali je li oni imajo prste (ili pak nekaj drugo) v izboro Trumpa i nejso priznali, a neje niti leto dni minulo več so Ameri vrnuli duga Rusima. Najme kaj, američki špijuni šteri volonterajo (kak naši udbaši) v udrugi građanov CIA so došepetnoli Rusima kak muslimani (muđaherdini ili pal ISIL) kanijo nekšo diverzijo naprajti na jivomo hataro. Rusi so mam, kak pravi ogjogasci stvar zeli v svoje roke i muslimane so posprajli na sigurno tak da so muslimanske kamikaze ne naprajle kaj so kanile. Ve vidimo da Ameri i Rusi znajo se kaj se na ovoj našoj kugli zemaljskoj pripeti. I ne sam kaj se pripeti nek i ono kaj se bode pripetilo. Kaj so unda soci v Hago ne jif pitali kaj se je pripetilo, za vreme rata, na našemo hataro ili pak v Bosni, a ne kaj so zvali Mesiča, Josipoviča ili pak Pusičko?
Sabornik, i to ne bilo kakši neg nejglasneši, Živoga zida, Ivek Pernarov se je spominal za jedne naše dnevne novine, štere se pišejo i čitajo tjedno, kaj si on grunta o Lepoj Našoj i kam plava te naš brodek. Zazvedili smo kak nam je Živi zid jedina šansa i da jim moramo čim predi dati v roke cugle državne vlasti jerbo je to jedina šansa kaj preževimo. Da je Agrokor to na vreme napravil ve bi bili zdravi i posluvali z dobičkom. Dobro je znati. Verjem da se zmislite kak je Ivek Pernarov hital drvje i kameje na hadezeovca Miljana Brkiča i to sam zato kaj je Brkič, tobož, od nekoga prepisal par redi za svojo magistarsko radnjo. Na se zadje je zišlo da je to ne ruon tak, ali Brkič je več bil posrani. Ve nam je Ivek rekel za novine da mi niti ne znamo v kakšem smo dreko jerbo, veli Ivek: „Da bi mi znali kuliko ga malo pameti vu Vladi i v Saboro, hmrli bi od straha“. To je jako lepo rečeno, ali je Ivek nigdi ne rekel kak si je to izreko posodil od jegovoga imeja Iveka Andriča, šteri je to rekel i napisal pred vejč od pedeset let. Ve vidite, a i Ivek je pokazal, kak se i on rad kinči z ljuckim perjem, a na Brkiča je z prstom kazal. I ne sam z prstom nek i z pesnicom.
Lepo je navek čuti dok nešči ima vupeša (pre čakoski gracki vuri bi rekli jajca) kritizerati onoga što drži cugle državne vlasti vu svojimi rokami, a stopram ak jif ne drži onak kak bi moral, očem reči, onak kaj bi sema nama bilo bolše. Tak se je čakoski gracki načelnik i međimorski sabornik, Štef Kovačov, resrdil v Saboro i zbajal je, i to tak kaj so ga si čuli, kak je v Lepoj Našoj na vlasti „otpadna mafija“, kaj god to značilo. Verjem da ste još ne pozabili kak je vu tem cajto bil „glavni trač“ na ovomo našemo „Falačko zemle med dvemi vodami“ otpadni mulj šteri je bil dopelani v Orehovico i Podbrest s zagrebečkoga hatara. Ne znati je li je nešči nahuškal (čitaj: nagovoril) našega grackoga načelnika kaj je glasno rekel ono kaj so i drugi mislili ili pak mo je to pobeglo, a rečite mi ve, ali po istini, da bode naš Čakovec dobil kakše peneze od teh „mafijašov“, a hajdi je placa stavljeno v proračuno za novo leto de bi penezi morali dojti Zagreba. Kuliko vidimo ne smeti mam se reči kaj je na pameti, tre malo brenzati. Si znamo da je čakoski načelnik skorom nikaj penez ne dobavljal Zagreba dok so jegovi „kukurikači“ i pajdaši (Milanovič, Hajdaš Dončič, Maras) držali v rokaj državno kaso, a ako ve kani nekaj dobiti z državne kase unda nesme „blagajnikaj“ nametati da so mafijaši!
Rečite mi, prosim vas lepo, da bi Totovčari, Miholjančari ili pak šteri god drugi, dobili kakše peneze z gracke kase ak bi rekli kak v Čakomo vedri i oblači „otpadna auto mafija“, a na se to svoj blagoslov davle čakoski načelnik kak Skupščina poduzeča? Te što bi to rekel bi se mogel nadjati penezima z gracke kase nejpredi dok v Čakovco HDZ-e zeme cugle vlasti v svoje roke. A da to bode? Ak bi si ja denes pustil brado i prestal se podbrivati, predi bi si po bradi gazil nek bode hadeze došel na vlast vu glavnomo međimorskomo grado!
Jako sam bil vesel dok sam prečital kaj bodo v Gorčano starinske domače i to međimorske koline. Domače koline so retkost jerbo ga niti sviji ne, ne da ga ne domaći nek ga ne nikši. Tak je to lepo zgledalo kaj sam ne niti dale čital, ali ve dok so koline minule se se je zazvedilo. Predi kolini je mesar, a i jegova pajdašija, zela po fraklec domače žganice zbogradi dezinfekcije. Dok je pajcek videl kuliko se je „Prijatelov“ zišlo, i to z sih krajov Lejpe Naše, mam je del glavo na trček tak kaj so mo čistam lefko zeli krf za črne čurke. Čim so ga sharali i posmodili, jetreca so se spekla i to na naglo. Predi jetreci još po jeden fraklec žganičke jerbo se posle jetreci prehaja na gemišteke. Saki od „Prijatelov“ se je prijel za svoj posel. Jeni so širom jemali pajceka, drugi so meso v korito slagali, tretji so čreva čistili, četrti so špeha rezali, peti so iskali zreske za pečeje jerbo obed je bil kaj ga ne niti na gospockomo stolo. Prosim vas kaj se sednete dok vam sprepovedam kaj je se došlo na stol kaj nej komo došla mamica. Preprajla se je samoborska kotlovina, a polek i slovenski gulaš za predjelo, dinstalo se mađarsko zelje, dok so tetec z Beloga Manastira prepravljali svoje nejbolše oblizeke. I ribe so se cmarile na rašljama za ove šterima vera ne dozvoljava jesti plodove koca. Kcoj se još preprajla i raštika z Mostara, ali zato je, na se zadje, na stol došla i naša domača međimorska gibanica, očem reči, zlevenka. Pozabil sam vam reči, jedino ga ne bilo kokošje juhe nek se juha kuhala od lokoti kak se i šika na pravim domačim kolinama. Pozabil sam vam reči da so međimorska „pajdaška“ srčeka razveseljuvali zagorski tamburaši i to ne šteri gud nek „Kavaliri“, nek se zna da je Goričan negda bil Republika i to prva v Lepoj Našoj posle Dubrovnika. Skorom sam vam pozabil reči da je navečer, na sprobavanje čurki, klobasi, prezmušta i cvirki, došlo i iznenađenje z Mađarske. A to vam je bila Eržika z Letenja. Ne znate Eržiko? I ne ste za jo čuli? Pak kaj ne poslušate dok Žiga popevle kak je k joj hodal vu večernjo školo. To vam je žena v nejjakšim letima, dobro stoječa i još bole držeča, štero imate kaj v roke prijeti i ne cuka se preveč ak jo i duže v rokaj zadržite. Rekla bi teca Franca, ženska je pridna i sakoga posla se prime. Lepo je to kaj bar nešči čuvle te naše stare međimorske običaje. Dok to zazvedijo pajceki bodo i oni pak zbegavali Međimorje naše malo.
Čim so ovi v Evropi zazvedili kak je dobro naše međimorsko meso z tiblice, mam so ga deli na listek kak nekaj nejbolše na ovomo „falačko“ sveta. I kaj smo mi z tem ve dobili? Nikaj! Ve dojdejo naši sosedi z Lejpe Naše, a i sosedi Janezi i otpelajo se meso štere mi imamo tak kaj za nas nikaj ne ostane. Mam je sfalilo. Pak kaj nam je ne bilo lepše do ve dok smo ga sam mi jeli i meli smo ga navek dok nam je došla volja za jim. I ne sam to, ono čega ga ne dosti je navek dražeše tak da ve i mi plačamo dražeše to našo tiblico. Pak sam vam rekel da nam Evropa ne bo donesla nikaj dobroga, a ono nejbolše nam bode odnesla. Pak je nigdar pes ne lajal zbogradi sela!
Bil sam vam v Doljnjemo Vidovco i kaj velite kaj sam videl? Videl sam vam kak je Zvonar Miško glavneši od Titija. Rekli so mi da je to več dosti dugo i da je to napravil Jožek (moj imejak) Grivcov dok je još vedril i oblačil po vidoskomo hataro. Ne znati je li je Jožek štel ili pak moral stajti v seli voljeno ljubičico belo, ali jo je bar del na repigo, očem reči, na kraj sela.
Pak je za nami jeden Božični koncetlin i to ne bilo kakši nek Nedelski. Verjem da ga ne nikoga v Međimorjo, a brzčas niti v Lepoj Našoj, što je ne čul za Nedelski božični koncertlin. Tak je bilo i ovo leto. Dečki z pjevačkoga zbora „Jožek (pak moj imejak) Vrhovski, jif šef Brankec Magdaleničov, Karolina (čitaj: Dragica), Tončika i Katica so oduševili prekpreveč puno nedelsko šporcko dvorano. Skorom sam pozabil na mužikaše šteri so igrali kaj se se prašilo, a pevači so poevali nejbole kaj znajo, ak ne još i bole. Ak je Brankec bole mahal z boticom puce i dečki so bole igrali ili pak popevali. Saka čast nedelskomo zboro, jivomo kapelniko i jivoj šefici Ivanka, a ruon tak i kapa doli nedelskomo načelniko Darkeco šteri je za se to peneze pripravil. Jedini šteri je zahuzal je bil Davor Radolfi. Ali velijo da jedna lastavica nebre donesti prtuletje tak je niti Davor ne mogel nikaj pokvariti. A kaj se Davorčeko pripetilo? Dugo je ne bil prinas v Međimorjo, ali je čul kak mi imamo nejbolšo vodo na sveto i neje štel oditi od nas kaj jo ne bi sprobal. Ali ovi nedelski huncvuti so mo ne rekli kak je naša voda malo prejaka za piti čista, pak jo razređuvlemo z vinom. Brzčas si je čovek malo preveč razredil pak mo je naškodilo. Nebre igrati v prvoj ligi brez treninga. A vino je prvoligaško, a i koncertlin!
Kaj bom ja zmišluval nekaj kaj je več zmišleno, a ruon tak nečem biti kak Ivek Pernarov i nečem se kinčiti z ljuckim perjom i zato vam bodem počestital rođendan maloga Isuseka kak je to napravil, još zdavnja, pred cirka sto let, Dragec Domjaničov:
Če bi rekel Božiču, kaj želim si ja, rekel bi, naj vsakomo puno srca da!
