16.7 C
Čakovec
Petak, 29 ožujka, 2024

Zaveži koja de ti gazda veli

[layerslider id=”6″]

Na našoj hižnoj televiziji je minulo „Živleje na vagi“ de se je sako večer moglo videti (što je gledal) kuliko je što skaleral (od onih šteri so se vagali) črez minuli den i minulo noč. Nejveč posla je mela vaga štera nigdar ne laže. A istino je ne navek ruon lehko zdržati. To so nejrajši gledale naše žene jerbo so na televiziji si bili čuda debelši nek one, naše sosede i sosedi.  Čim je to živleje minulo, čim se je vaga posprajla v komoro mam se je primetilo da je i naš precednik Vlade, gospon Plenki, skaleral. I to hajdi. Ve si more i rekleca zakapčiti, a kaj si zraka ne jemle. Zazvedili smo prek tajnih agentov da je v pitanjo sedamnaest kil.

Dok je soseda Barika to čula mam je vudrila v plač: – Kak on more sedemnajst, a ja nebrem niti kilo? Kaj kilo, niti pol kile. Ak sam bole na djeti, ak meje jem kile se sam nabirajo. A teca Franca joj je mam otpovedala: – Kak pak ja več dvajsti let imam isto kilažo? Moraš se nafčiti kaj boš mogla gledati kak drugi jejo. To ti je nejbolša djeta i unda ti bodo kile išle ne na tebe nek mimo tebe. Tak ti ja več na leta delam. Gledim črez oblok, vidim tebe kak saki čas nekaj ješ i ja sam ti sita. Kak i navek teca Franca je dala dobroga receptlina sam ga se ne ruon lefko držati. Soseda Barika mi je pošepetnola, dok je teca pete meknula, kak je ona ve na dve djete. Pital sam zakaj na dve? Pak od jene se nebrem najesti i navek mi je krolilo v želoco! A si znamo da je želoca nigdar ne sram i navek se oglasi dok je prazen. Sa je sreča kaj so prazne glave stiha. Kakša bi to mužika bila da bi prazne glave krolile ili pak kokodakale?!

Navelikom se pripoveda, a si znamo de se navelikom kadi tam bode včasi i veliki ogej zrasel, kak bode naš od djete stesani Plenki, na se zadje, itak odišel v Brisel. Najme kaj, dobil je nemoralno ponudo (od nekšega Junkera ili pak Junfera) štero nebre nikak hititi (kak puško) v kuruzo. Ak bode tak, a teca Franca veli da sikak bode jerbo tak se i žene (nečem reči babe zbogradi ravnopravnosti spolova) na čehari spominajo, unda bode alfa (meje) i omega (vejč) Lejpe naše denešji precednik sabornikov i Sabora, na pol kosmati Gordan Jandrokovič. I dok je tua novica dogegala na svetlo dneva, mam so si, kak jeden, levičari, kaj nebom rekel antifašisti, skočili v zrak i postajli se na zadje noge kak of plehnati koj na čakoskomo glavnomo placo. Kaj skačejo, kaj jim se tlakec (i nekaj drugo) zdiguvle, pak ak je Lejpo našo mogel voditi Zoran Zoki Milanovič unda se ne tre bojati niti ak bode cugle vlasti vu svoje preštimane, makar ne preveč jake, rokice zel Gordan. Zoki je v precedničko foteljo opal z neba, a Njonjo več hajdi dugo v rokaj drži kormana od saborskoga broda. Teca je rekla: ak je mogel Zoki unda more bilo što!

Nek si Bandič ne misli da ga nišči ne prati i da nišči ne zna kaj dela ( nesam tu mislil na Uskok) jerbo da bi tak bilo unda ga ruski precednik Vladek Putinov ne bi odlikoval. Dok je Vladek vesil odličje okoli šijaka Milančeko, stiha mo je pošepetnol kak se je čuda navčil od zagrebečkoga gradonačelnika. Rekel mo je: Mister Bandič, otkod zmažete se to kaj delate? To zmišljuvljete sami ili vam nešči pomaže? Bandič mo je otpovedal na tečnomo ruskomo pak sam ne nejbole razmel kaj mo je pravzaprav rekel!

Ivica Todoričov, naš nejvekši stručnjak za peneze, knigovodstvo, računovodstvo, knigovodstvo, bilance, pozajmice, zajme, završne račune i poreze je lenguzal v Remetinco, dok so ga došlepali z Engleske,  mesto kaj bi hodal okoli, kak z križecom, od grada do grada, od opčine do opčine, od fabrike do fabrike, od banke do banke, od kase do kase, od ministra do ministra i vučil nas obične smrtnike kak muoči dojti do hajdi sega ak čovek ima malo soli v glavi i malo vejč vupeša kaj nem spominjal strice i vujce vu Vladi  Lejpe naše. Moral bi se „mali Ivica“ nekšega posla prijeti kaj povrne toga milijončeka ojerov na čijo časno reč so se otprla vrata rešta v Remetinco. Mogel bi nas Ivica navčiti kak potrošiti vejč nek se zasluži, kak zeti zajma, a ne vrnuti, kak ostati dužen državi, a kaj preveč nišči nikaj ne pita, a eks potprecednica vlade, Martina je mam napisala novo knigo o „cigano i to onomo nejlepšemo“. To nebre što god, to morejo sam zebrani!

Pak smo se, na jeden den, zmislili na Mikulo Zrinskoga si Čakovčari šteri živijo v Grado Zrinskih i si mi šteri živimo v Županiji Zrinskih. Mi smo to naprajli v Kuršanco, a Čakovčari pre Orlo na glavnomo čakoskomo placo. Nejsam brojil jerbo ga vejč bilo nas Međimorcov ili pak Mađarov. Ne bi ve znal je li bi to napisal ili ne bi, ali pak ga ne bilo niti jenoga ravnatela škole, niti jenoga navučitela, niti jenoga profesora povjesti. Kak bodo unda naša deca nekaj znala o Mikuli Zrinskomo, nejspametnešemo čoveko i nejvekšemo ratniko svojega vremena, šteri je govoril i pisal na šest jezikov, Šteroga so se bojali i Turci i Habsburgovci, ak ne dojdo oni šteri bi jim to morali povedati. Za to nemajo čas, ali za štrajk bodo ga našli!

Mikuli Zrinskomo Čakoskomo so se gracki oci smilili tak da ovo zimo on i jegov Orel več ne bodo gledali deco kak se škližejo po velikomo ledo kaj znači da sklizališče več ne bode stanuvalo na glavnomo čakoskomo placo. Predrago je. Dok sam se toplo nadjal da bode preseljeno na Macanovo igrališče, de mo je i mesto, doletela je vrana z čakoskoga parka (čitaj: teca Franca) i pošepetnola mi kak se čakosko jezero prepravla kaj bode zmrzlo bar na dva mesece. Ze znati kaj fali Macano? Prepoveda se da nema dosti struje? Struja teče po žicaj i kablinaj kam god jiv rezvlečeš. Pak i negda so se deca šklizala po Macano, tam so reflektori, tam so placi za šklizaljke, a i šanka je moči složiti, vino kuhati, langoše i čevape peči… Moremo se mi restrgati, ali ZNA SE koga je biračko telo zebralo kaj bode misli za se nas i kaj bode rekel ili pak z prstom pokazal, de se bodo deca šklizala. Pak ne bode valjda zebrani poslušal sako šušo, pak makar mo je ona i dala svojega glasa. Biračko telo je zato i zmišleno kaj bode glase davalo, a zebrani so tu kaj gospodarijo žnjimi. I z nami. Znanja i ravnanja radi. Kuliko smo sam brundali protiv šklizaljke na glavnomo placo (i Orel se je bunil), ali nam je nikaj ne pomoglo. Nek se zna da sam glavni ja. Mora se biti onak kak papa štrumf veli. Tak mi je i teca rekla.

Minuli tjeden je Revica bila glavno mesto Falačka zemle med dvemi nogami, očem reči, vodami. Nejpredi je Brankec Uvodičov dovlekel Lejpo našo, a dok je Lejpa naša odišla unda je došel naš domaći MEF Ljubeka Kuntariča. Na se zadje so itak Reovčari došli na svoje i dva – tri dni se furt igralo, plesalo i popevalo. To je lepo i dobro, ali to tre zdržati. I morem vam reči da je Revica zdržala, kak Revičari tak i jif ravnatel škole Željko Krištofič, načelnik Franjo je malo brohal, ali se ne dal doli. A Brankec Sušecov on je plesal i popeval, nigdar ne bi veruval da je on takši fahman da sam ne videl. Si šteri so bili vu te dneve v Revici so odišli dobre vole i zadovolni. Ak ne verjete meni pitajte Brankeca Uvodiča i jegovo desno roko Curico. Ili pak Rajkija Dobošiča i jegovoga ađutanta Žigo.

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE