[layerslider id=”6″]
Mam posle Sveckoga labodoritaškoga prvenstva je bilo prvenstvo Evrope vu vaterpolo. Morem vam reči naši vaterpolisti so došli, i želencijo so odnesli, a Engleza i Francoza nigdi kak da ne znajo plavati. Pak niti Rusov. Rusov ga bar kak Rusov, skorom 150 milijonov i oni nebrejo najti dvajsti dečkov šteri bi znali plavati i to ne sam tak brez ičega nek se još morejo i za lopto držati. Nebrem razmeti da dok se raspala velika Rusija, očem reči, Sovjetski savez, Rusi se nebrejo ziti z dobrim športašima kak da je šport zgubil pravo glasa v Rusiji? A poglednite nas, kak god nas je malo, ali v sakomo športo imamo nekoga šteri vedri i oblači. Napriliko vu veslanjo so brača Sinkoviči nejbolši na sveto. I v atletiki imamo svoje adute, Sandra Perkovič več duže od pet let hiče svojega diska nejdale od sih. I kak bi se to reklo, još joj ne vidimo kraja. Škoda kaj je naša soseda z Ludbrega, Sara Kolak, na bolovanjo jerbo i ona hiče svoje koplje tak dauko kaj ga negda nebrejo niti najti. Ali došla bo ona k leto nazaj, pak se bodemo znova žnjom štimali. I v teniso imamo svoje adute: Čilič je več par let med nejbolšima, tu je i Čorič, Karlovič, a kaj nam spominjal naše dečke kaj igrajo v parovima de so nejbolši na sveto. Za kaj god se primemo nejbolši smo. A v teniso se i puce borijo za svoje mesto pod suncom. Se so bliže vrho.
Nejbolši smo i v temo kaj se jako fletno posvadimo. Kak god nas je malo, ali nebremo v semo jednako misliti. Kaj ste več pozabili kak je to bilo da so naši Vatreni došli dimo z Rusije z srebrnom želencijom? Vatreni so nas ujedinili, drukali smo i popevali kak jeden, a unda se je pojavil Tomson i več so nešterni prešli na drugo strano ceste. Kak je malo treba kaj se vužgemo, a još meje kaj nešči z nas napravi pepela. Dok se je Tomson pojavil i zapopeval Lepa li si… još smo si bili skupa, ali dok so na red došli Geni, geni kameni več je jeno pet procentov „pravih“ Hrvatov prešlo na drugo levo strano i ištekali so mo strujo. To so oni šteri so ne drukali za naše Vatrene i štero so celi mesec čakali kaj naši več jempot zgubijo utakmico. I fčakali so se jerbo i nejbolši jempot morajo zgubiti. To so oni šteri nemajo radi Lejpo našo i šteri so još niti jeden den ne preživeli v njoj jerbo još navek živijo v onoj našoj negdašjoj državi štera je ne bila naša, ali smo v njoj živeli.
Podelil nas je pak i spomenek na Olujo, očem reči, Den pobjede i domovinske zahvalnosti i Den naših branitelov. Petoga augustuša 1995. leta so naši braniteli došli v Knin i doli z staroga grada so zeli zastavo Srpske Krajine i deli so velikog barjaka Lejpe naše i šteri je tam več 23 leti. I na te den so jeni za to kaj bi se to slavilo kak je red, pobjede navek tre slaviti, a drugi pak se bole fkrej držijo. Niti hrvacko zastavo ne denejo na hižo. Več zastavi je bilo po hižaj i balkonaj dok so naši vatreni labodoritaši igrali nek ve dok smo slavili Den pobjede, den da je Lejpa naša počela živeti kak samostalna i neovisna država.
Glavna fešta za Den pobjede je bila v Knino, tam so se si zišli šteri nekaj vredijo v Lepoj našoj, očem reči, si šteri so došli. Navečer je koncertlina održal Mirek Škoro, Tomsonov kum, i na kocertlino je bilo nekaj vejč od pet jezeri ljudi. Na isti den je bila i Alka v Sinjo i tam se feštalo do pondelka jutra kak je to red več nekaj duže od tristo let. Tomson je svojega koncertlina mel v Glini i de god Marko popevle za jim dojde cirka sto jezer ljudi. Pak brzčas unda on nekaj vredi da ga navek dojde poslušat tak čuda ljudi.
Zastupnik v našemo Hrvackomo Saboro šteroga so zebrali Srbi, Milorad Pupovac, je ne došel v Knin. Neje došel tua de mo je red, de je slavila cela Lejpa naša jerbo tu i plačo dobavla i još hajdi penez zvleče vum z naše kase za se kaj šteči, a kuliko vidimo Lejpo našo nebre videti. Nikaj mo ne paše v Lepoj našoj sam so mo kune po voli. I to saki den se vejč i vejč. Pupavac i jegovi so meli svojo komemoracijo i to za se šteri so poginoli i nestali v Oluje. A takših je bilo, slovima i brojčekom: šest. Kaj bodemo rekli, Srbi so navek bili na svojo roko, ali ne si nek sam četniki šteri još navek sejajo mejo od Virovitice prek Karlovca do Karlobaga. Ruon tak so kak i sosedi Janezi, retko da mine štera noč kaj nej sejali Piranskoga zaljeva, Sveto Gero, pak i Štrigovo. Furt si nekaj gruntam kaj bode nam ostalo od Lejpe naše ak bodo naši sosedi pre dugo senjali?
Moram vam reči da Pupavac, Dačič, Vučič i družina furt ponavljajo kak papige kak je za vreme Oluje odišlo z Lejpe naše cirka 250 jezer Srbinov, a nišči ne veli kak se je 140 jezer vrnulo nazaj. Za to so stiha kak drek v travi kaj se nej zazvedilo. Z traktoraj so dišli, a z autima so se vrnuli. Rekel sam vam, prepovedajo sam ono kaj jim paše, kak i Janezi. Kak da so i jeni i drugi z vragom tikve sadilii v isto političko školo hodali?
Jempot je nešči rekel, ak dosti dugo ponavlaš laži one pomalem postanejo istina. No, neje istina da vu sakoj laži ima najmeje pol istine, istina je da vu sakoj šali jega pol istine.
Prcinkulovo je minulo, ve se skup mečejo računi kaj se bode vidlo kiliko so čakoski turistički težaki zaslužili. Kuliko sam mel za videti Čakovčanci so svoje mamrele prodali tijam v Portugal i jako sam najgerek kuliko so tam kaserali?
Na čakosko proščeje je došel i Božo Petrov z Mosta. Ali kuliko sam mel za videti on opče ne zna kaj ja to proščeje, očem reči, nejso mo domaći rekli. Proščeje je kaj se fešta, ljudi se veselijo, pijejo, popevlejo, plešejo, jejo langoše, idejo k meši, na spoved, a ne kak je Božo počel kritizerati tam nekše reforme Vlade. Pak komo je govoril, pak ga je ne nišči niti poslušal jerbo za vreme Prcinkulovoga prinas v Čakovco i v Međimorjo vreme stoji i se posle ostavlamo za zutra, prekzutra i malo zutra.
Vidi se da je Davor Bernardič pravi političar i da ga bodo esdepeovci teško zmenili. On je došel na proščeje kaj se poslika z prvim međimorskim esdepeovcom Mladenom Novakom i spije si gvirca, a ne kaj bode tiral politiko. Bar ne ovo državno. Kuliko smo meli priliko videti, jeni esdepeovci so pozvali Zokija Milanoviča, a drugi Bernardiča. Kak se bodo ovi v Lepoj našoj dospomenuli što je nejbolši, nejvredneši, nejlepši i nejspametneši esdepeovec ak se nebrejo ovi naši na „Falačko zemle med dvemi vodami“ šterih ga čuda, čuda meje? A i si ne plačajo članarino!
Policaj Mario Sever z Štrigove se bavi z bežanjem. Več dvajsti let beži. Negda je ne mogel prebežati niti kilometra, a denes beži kilometre. Velijo oni šteri ga čuda bole poznajo od mene da tak fletno beži kaj se teško polek jega i z peciklinom pelati. On je pred dvajsti let nikaj ne mogel, a ve se more. Z menom vam je čistam drugač, niti sam pred dvajsti let ne mogel zdiči sto kil, a niti pak ve nebrem. Kuliko vidimo nesmo si jednaki. Mortik bi i ja mogel da sam z Štrigove.
Seposod se pripoveda, a ovo leto posebno, kak sam komarice pikajo, žene se bijejo, žene kradejo, žene se drogerajo, a počele so i piti. Kuliko vidimo se so nevole ženskoga roda. Nejleži je z prstom na drugoga kazati. Najgerek sam sam od čega živijo komarci, a od čega pak moški čije žene kradejo? Naši stareši so nas još negda dok je Božek hodal po zemli, vučili da je lopov on šteri krade, ali i on šteri vrečo drži, očem reči, on šteri hasnuje ono kaj so žene nakrale.
