9.5 C
Čakovec
Četvrtak, 28 ožujka, 2024

V Kotoribi cug mašina fučnula

[layerslider id=”6″]

Pomalem se Istanbulska konvencija približavle Sabornici. Prejurila je črez Precedništvo HDZ-ea i oni napredni so pobedili one desne, konzervativne (to so oni kaj brenzajo napredak Lejpe naše, tobož) z rezultatom 19:6. Športaši bi rekli, pobeda čista kak suza.

Morete si misliti kak bode Konvencija zišla v Saboro? Ve ne bode moral Jandrokovič petpot brojiti je li ima dosti roki v zrako, ve bodo esdepeovci ftruc zdiguvali roke makar so ne šteli deti to na dnevni red dok so oni držali cugle vlasti vu svojimi rokami. A haenesovci so za to došli v koalicijo kaj bodo vezali koja tam kam gazda reče.

I još nekaj. Nikak mi nejde v glavo kak je ta Konvencija došla ruon z Istanbula? Morete si misliti kuliko prava imajo žene v Istanbulo, očem reči, v Turskoj. Kuliko pot dojdo na red, kaj se venodjanja dotikavle,  ove štere delajo v haremo? I de so one štere, nedaj Božek, ne posluhnejo?

 Si spituvlejo i nišči ne zna zakaj je negdašji glavni državni šef policije došel v Čakovec na posel? Neje on sam tak došel, nešči ga je poslal, ima i putnoga naloga. Velijo da je po sredi nekši važen, očem reči, specijalni posel, a Vladek je došel kaj pomore našim policajima kaj ga dotirajo do kraja. A kaj? To je več drugo pitanje. I to nišči, bar za ve, ne zna. Mortik nešči zna, ali nesme reči. Brzčas se nekaj kuha (osim bažola, zelja i sarme) v ovomo našemo policijskomo lonco kaj je ne dopuščeno znati nam običnaj smrtnikaj. Ne tre siliti, se bode došlo na svoje. Pomalem! A i se to kaj dojde bodemo mi mali ljudi platili. I Vladeka ruon tak!

Pak je kotoripski načelnik i kotoripska vlast došla na prve stranice novin i portalov i to sam zato jerbo si je to zaslužila. Načelnik Ljubo Grgecov i kotoripski opčinari so donesli odluko da bodo sakomo onomo što bode kupil hižo ili se doselil v Kotoribo pomogli z dvajsti jezeri kuni. A kuliko sam mel za čuti načelnik niti ne pobira komunalno naknado. Mortik bi i drugi opčinari i načelniki tak delali, ali nemajo peneze. Najgerek sam, jako sam najgerek de itak te Grgec nazobači tulikše peneze kaj more unda deliti sima onima šteri nemajo dosti. Kaj god bodete vi rekli, ali to mo je spametno kaj mlade ljude zadržavle v Kotoribi jerbo sam tak bode mel puno Kotoribo ljudi i dece, a jegovi gospodarstveniki bodo meli dosti težakov. Ima novo školo, dvorano, zabavište i briga se kaj mo to se ne bo prazno. Ve si gruntam je li je Ljubo bil nejpredi tak spameten pak je došel do penez ili pak je nejpredi nabavil peneze i unda postal spameten? Kak bilo da bilo, Kotoriba ide naprej z velikimi koraki, a načelnik Grgec je kak lokomotiva štera vleče kotoripskoga cuga napretka. Makar se meje cug-mašini fučka v Kotoribi, ali to je opčina v šteroj se splati živeti. Najte se nikaj frjiti, ak ne verjete meni pitajte bar Kotoripčane!

Je li se bodo selila teniska igrališča, na šterima je negda igral Ferek Punčecov, z centra grada Čakovca ili pak ne, pita sebe, nas i načelnika Kovača, Ivek Petrišov šteri je još kak dečec hodal drukat za Fereka tu na of plac de se još dendenes igra tenis. Nekaj si gruntam, a kaj bodemo jif selili ak ne znamo kaj bodemo z placom? I labodoritaško igrališče smo preselili v Golobetko pred 30 let, a još dendenes je plac prazen. No, ne ruon prazen, po jemo se špancerajo puce, dečki, moži, žene i penziči z kujsekima i pesima šteri pobirajo one kolačeke štere pesi ostavljajo za sobom. A oni drugi šteri nejvečpot pozabijo zeti škrneclina za kolačeke, te se špancerajo po parko kaj jif nišči ne vidi i to ne sam jif nek i jive pese dok se praznijo. Sa je sreča kaj se mladi več ne skrivačkajo po parko (ve imajo aute), pak ne zagazijo v kakače. Si gazdi pesov imajo svoje lajavce na žnoricaj sam so nešterne duge 5 metrov, 10 ili pak 20, a to se ovisi od toga zakaj so došli (gazda i pes) v park? Je li je v pitanjo sam razgibavanje ili so tu još potrebe nekše druge naravi. A nejso si gazdi i gazdarice v kondiciji kaj bi mogle hodati glet kaj je jiv vum hižni štirinožni ljubimec napravil ozaj za grmom ili pak drevom. A si znamo da je nikaj ne zanavek, pak niti drekec v travi. Zob vremena svoje napravi!

Antonija Tončika Ružičova je naša međimorska mlada, kaj mlada, jako mlada tenisačica z Revice štera pobeđuvle se da jo pustijo kaj igra. Tak je Tončika nejbolša v Lepoj našoj med puckami od 16 let, a ruon tak so ne našli bolšo med junjorkami do 18 let. Pozabil sam vam reči da Tončika ima sam 15 let. Ve vidite kakšega teniskoga bisera imamo mi vu ovomo našemo cvetnjako med dvemi vodami. Saka čast Tončiki, nek sam tak dale nastavi i začaš bodo pred jom drhtale i klečale i ove tenisačice z ATP lojtrice. Nek se Ivek Petrišov ne srdi, ali Tončika je za to kaj se tenisko igrališče preseli z centra Čakovca i kaj se v Golobetki polek igrališča napravi i dvorana tak kaj bode mogla ona trenerati i unda dok curi dežđ ili pak sneg i dok je vuni zima. Do ve je nejbolša, a kaj bode stopram žnje unda dok bode saki den mogla trenerati?

Naša fajna precednica Kolinda Grabar Kitarović je prva čestitala novomo-staromo precedniko Rusije, Vladeko Putino. Verjem da to kaj mo je prva čestitala i kaj je lani bila pre jemo ne bode Vladek pozabil i da bode mel na pameti dok bode spominek o temo kaj bo Sberbanka morala pozabiti, očem reči, šenkati ono pišljivo milijardo ojerov štero je posodila, onak na lepe oči, našemo Agrokoro.

I mi Međimorci smo organizerali izbore za Putina, očem reči, se međimorske snehe štere so došle k nam v Međimorje na kvartelj z Rusije so mogle glasati za Vladeka. Verjem da Vladek to ne bode pozabil. Ne da ne bode, nek je ne, več je zafalil svojemo pajdašo i negdašjemo poslovnomo partnero z Ingre, gospono Danijelo Režeko, kaj smo otprli biralište. Zna Vladek od čega muhe crkajo i zato je zafalil gospono Režeko, jerbo da je Ingra ne delala v Rusiji mi ve nej meli snehe z Rusije!

Kaj se si čudijo kak so čakoski junjori zgubili v košarki 107 koši razlike. Ne da se to pripeti saki den, ali negda so nešterni zgubili v labodoritanju z 65 goli razlike jerbo je bila takša situacija, tuliko je trelo protivniko za prvo mesto. Ve si probajte pregruntati kuliko je labodoritaško igrališče vekše od košarkaškoga, a v labodoritanju ga ne dvojke, a niti trojke. Tu je trelo biti velemajstor i tak fest zgubiti, očem reči, pobediti.

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE