14.5 C
Čakovec
Četvrtak, 28 ožujka, 2024

I Štef je bil na serviso v Ukrajini

[layerslider id=”6″]

Prinas v Lepoj našoj je se nekak posebno, izvanredno, specijalno, slučajno. Imamo izvanrednoga (mimo reda) poverenika za Agrokor, Fabrisa Peruška, a on ima specijalno zamjenico Ireno Weber. Posle Agrokora šteri ne da broše nek kašlja i to tak kaj se zahlikavle, dobili smo izvanrednoga poverenika i za kurikularno reformo v školaj, a to je negdašji minister za škole, đake i navučitelice, Radovan Fuchs. Pred dve leti smo meli slučajnoga premijera, stručnjaka za građevine,  Tihija Oreškoviča, a ve imamo za premijera EU stručnjaka šteromo je Lejpa naša premala za sve ono kaj misli da zna i kaj bi štel (ak več zna?) naprajti. Napreduvle, a mi skupa žnjim, kak muha v močjako, i čudapot polek šume ne vidi drevo. Prinas je se izvanredno, specijalno ili pak slučajno. Da je drugač nej bilo normalno.

Zebrani so i specijalni savjetniki za INA – MOL poduzeče na telefonskomo zestanko. Oni bodo rekli je li se nam splati nazaj kupiti to Molovo tripot žmekjeno polovico INE z šterom od Slaveka Liniča hercujejo. Ve da bi još znali što je glavni v MOL-o (Mađari ili pak Rusi) unda bi znali i otkod veter puše. No, mi smo premala država kaj bi se mogli znati.

Vodeči esdepeovec, Davor Bernardič, je lejpo rekel da se jega pita (sa sreča kaj se ga ne pita) on bi jenpot zanavek zapral rafinerijo nafte vu Slavonskomo Brodo tak da več nigdar nej smradila zraka za dihati, a niti pak vodo za piti. Da sam ja premijer, ja bi ga pustil nek to napravi, još bi mo napisal potnoga naloga, sam ne znam kaj bi on napravil dok bi zazvedil kak je rafinerija ne v Slavonskomo nego v Bosanskomo Brodo?

Drašek Plenkovičov je obišel štanda Bernarde na semo v Mostaro i čudil se kak tak mala fabrika tak čuda sega lepoga i dobroga dela za Lejpo našo, a i za celo Evropo. A kulikopot se je prepelal črez Puščine dok je z Varaždina išel za Čakovec i nigdar je ne postal kaj bi videl i čul kaj se itak dela v Bernardi i kak se dela kaj seposot dobavla nagrade i priznanja za se bolše madrace, postele, strožoke i vanjkoše. Znamo da je navek v sili, ali bi moral najti cajta kaj bi zazvedil kaj se naši ljudi znajo, morejo i delajo. Pak je on premijer sima: i težakima, i kulakima, i bokcima i uhljebima. Je ne mortik tak?

Več se hajdi dugo spominamo o tomo kakše bodemo avijone meli v Lepoj našoj? Moremo si zbirati je li bodemo meli nove švecke ili pak malo stareše izraelske, kaj nebom rekel židovske. Naši generali – piloti več hajdi dugo drukajo za nove švecke, a unda je došel Zdravkec Maričov, minister za peneze i sima je rekel ( i to naglas) kak so ovi židoski bolši jerbo te F-16 (ovo 16 so ne centimetri kak nešterne žene na mlekari mislijo) so kak i dobro vino, kaj so stareši to so bolši. Ministro Zdravkeco so se prikrpali i si naši športaši, a prvi med jimi so bili rokometaši. Velijo oni (Červar, Gobac i pajdašija), Šveđani bodo nas pobeđivali i to prinas doma v Lepoj našoj, a mi unda nek od jiv kupuvlemo avijone? Nau išlo! Na jivo strano so mam stali labodoritaši, hokejaši i tenisači, a na se zadje so došli i si oni drugi šteri imajo pisano cajta i ne znajo kam z sobom, pak so povečali kupa. Športaši so dali zeleno svetlo Židovima jerbo nas Izrael nebre pobediti niti v jenomo športo tak da moremo mirne duše i čiste savjesti zeti, očem reči, kupiti avijone šteri so, tak bar velijo, nejfaleši i nejbolši dok so na zemli. Ak so nejbolši na zemli unda morejo biti sam bolši dok so v zrako!? Sam kaj ne bodo v zrako tak migali kak so Migovi to delali posle servisa v Ukrajini. Rekel je Štef, šteri je delal v Ukrajini, da je i on komaj dimo došel dok je bil na serviso pre Ukrajinki Ninočki. Lepo je, kaj lepo, jako ti je lepo dok se španceraš nutri vum po jenoj kolomijici, ali posle kak sprazniš baterije ti počnejo ftičeki okoli glave letati i sploh te nekaj k zemli vleče. Tak vam to zide dok čovek, očem reči, Štef ne zna kuliko more i kuliko mo je dosti. Ve vidite, to kaj je Ninočki taman, Štefo je preveč. A o tomo ga ne niti reči v Istanbulskoj konvenciji.

Makar so Turki nigdar ne preplavali niti Muro, a niti Dravo i turska je noga nigdar ne stala na ovo našo sveto zemlico med Murom i Dravom, a ve furt rivlejo k nam to Istanbulsko konvencijo i to nišči ne zna zakaj? Turki so prvič došli k nam v Međimorje prek Sulejmana Veličanstvenoga i to sam prek televizije, ali ak si ve moremo zbirati mi bi rajši Istanbulsko nevesto nek konvencijo. Kaj bode nam ta konvencija hodala po našim međimorskim šekretima i rivala roke v ženske ili pak moške gačke. To bodemo si mi i dale sami delali kak smo i do ve i ne nucamo svedoke.

Svadili so se picoki, mož Mirkec i žena Ksenija. Reč po reč i svaja je bila se glasneša, a Ksenija je otprla kištico na stolo i vum žnje zvlekla noža. I to ne bilo kakšega nek onoga mesarskoga. Mirkec je to ne zel zdravo za gotovo i predi nek je ftegnul kaj naprajti Ksenija ga je spikala. Doktori so dosti fletno došli, ali predi nek so ftegnoli te lukje zakrpati Mirkec je odišel k Božeko na račun. Ve vidite kaj se sega pripeti v živlenjo i to v zadje vreme se vejčpot kaj tobož slabeše žene spikajo ili pak vmorijo „jakše“ moške. A o tomo Istanbulska konvencija niti kaj bi zucnula. V konvenciji so si moški jakši, a se žene slabeše, moški so nasilniki, a žene so žrtve. Tak je v konvenciji, a pravzapraf ga več hajdi moških na grobljo šterima je presodila ženska roka.

Zebral sam si ženo i nadjal se da mi bode kuhala kak mama, a ona pije kak japa. Tak je i Mirkec zišel. I to ga je koštalo. Neje veruval da je krivo zebral, a dok je zazvedil več je Ksenija mela noža v roki!

Županiska organizacija pesov i cuckov je mela zestanka protiv škoplenja pesov. Nejglasneši so bili, kak ste brzčas pogunuli, čakoski pesi jerbo so oni na prvoj crti škopljenja. A kaj jim preostaja? Morejo se preseliti k Priločancima ili pak Serjančarima jerbo i dale očejo ostati gracki pesi. Za ve je tak, ali kaj ak se priločki i serjanski gracki oci predomislijo i denejo i oni pesja jajca na dnevni red? Spametni kak več jeso te pesi šteri so ne na lanco, so svojega problema kandiderali prema EU tak da ne znati kak bode to zišlo? Brzčas jif ovi v Deželi, Hungariji, Osterajho, Dojčlando ,a niti pak v Irskoj nečejo? Ak nečejo na selo unda jim preostaja jedini grad v šteromo bodo mogli živeti, a kaj ne bodo lačni i ženi, je vinoGRAD! Morajo se dobro kcoj držati jerbo kaj ti je pes brez jajci?

Očemo se domače, a kokoši, race, pure, goske i pajceke smo stirali z grunta kaj ne bodo smrdeli. Ne sam da smo jif stirali nek smo jim zabranili kaj dojdejo znova na grunt tak da ve imamo prazne koce, kočeke, štale, a jemo se kaj nam nešči odnekod dopela. Znate kakši smo mi Međimorci, ljucko je bolše, makar je to nejvečpot ne tak, ali je ljucko i dopuščamo mo kaj dojde na naše tajere. Kakša je to vuzmena šunka, kakše so to vuzmene jejci, vuzmeni hren (i vrčake smo zahuzali-preorali pak nam ve raste drač) štere smo nesli na posvečaje i dok smo jif pojeli smo ne bili ženi. Negdi je tu nekša falinga. V nami: ne verjemo svojemo!

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE