16.7 C
Čakovec
Petak, 29 ožujka, 2024

To se sam prinas more pripetiti…

309[layerslider id=”6″]

 

Haški soci so, na se zadje, osudili generala Praljka i jegove pajdaše za se kaj se je pripetilo za vreme rata v Bosni. Kak so rekli prvipot tak so i ve to znova potvrdili. Kak papige. Zabadaf so advokati nosili ovakše i onakše papere, meje na salvetima, ovakše i onakše dokaze jerbo je to Haškim socima bilo se kak da bi govoril gljuhomo dobro jutro. Si znamo kak je general Praljak prijel to konačno presudo, ruon tak znamo kaj je što na to rekel. Naša, ako je je zaprav naša, negdašja ministrica Vesna Pusič je mam pobegla na strano socov kak da se još bori za tajnico UN-a i priznala je socima da imajo praf, a da je ne niti z okom trepnula. Vesna je napisala i knigo kak smo mi Hrvati napali Bosno i Bosance (Bosanke je ne niti spomenula) sam kaj bi se v rit porinula Evropi i sveto, šteri so, na se zadje, prečitali i jo i jeno knigo i nejso jo zebrali za tajnico kak je ona to štela i nadjala se do predzadjega dneva. Velim do predzadjega jerbo se zadjega dneva več znalo da je mesto tajnika bila sam želja i puste senje „naše“ Vesne. Da se još sam jeden kratek cajt vrnemo v Bosno. Štel sam pitati Vesno i se one druge šteri si gruntajo isto tak kak i Vesna, kak to da smo mi Hrvati napali Bosno, a Bosanci so ne pred našom „agresorskom vojskom“ bežali v Srbijo nego k nam v Lejpo Našo. Dobežalo jif je 500 000, nejmeje. I ne sam to kaj so bežali oni šteri so mogli bežati, nek so i betežniki i ranjeniki hodali k doktoraj v naše bolnice. Cirka sto jezer jif se je lečilo v našaj bolnicaj. Bilo so prinas na kvarteljo, očem reči, na stano i hrani i to hajdi dugo, a ve smo mi jivi agresori. To je prvič na ovoj kugli zemaljskoj, od postanka sveta pak do ve, kaj „agresori“ davlejo stana, hrana i bolnice onima protiv šterih ratujejo. A kaj moremo i to mora biti jempot prvipot.

Verjem da ste čuli ili pak prečitali kaj je haškim socima se nametal četnik i četnički vojvoda Vojo Šešelj, niti jenomo je ne priznal struko nek jim je nametal sakefele cone: jeden je bil pokvarjeni malteški štakor (i te je osudil Praljka), drugi zgubleni majmon, tretji škocko govno, štrti holandski kurvin sin, peti i glavni je bil podmičeni precednik i plačenik, a si skupa so bili pijanci i idijoti. To se jim je nametal i to ne jempot i oni so ga pustili dimo sam kaj ga se rešijo. Tuliko o pravdi i pravici Haških socov. I jivoj verodostojnosti.

Nebrem veruvati kak se to mi Hrvati z Lejpe naše ravnamo delat Pelješkoga mosta. Evropa je preprajla peneze, mi smo respisali natječaja i ve nikod nikam, očem reči, napreduvlemo kak muhe v močjako. Se je postalo jerbo je poduzeče štero je lani zafremano za 10 ili pak sto kuni uložilo žalbo. Najte me krivo razmeti, ali kak poduzeče štero je još niti ne počelo delati, štero nema nikšega prihoda i nema niti jenoga težaka more zastajti takši posel kak je Pelješki most? To se sam prinas more pripetiti. Kak zgledi tu pak nešči sedi na repigi i brenza tak velikog i tak važnoga posla kak je Pelješki most. Najgerek sam kaj i tua žalba ne bode završila v Hago jerbo unda nigdar ne bodemo meli mosta.

Ne bi vam znal reči je li te naš i Pelješki most ima kakše veze z onim Mostom Bože Petrova i jegovih pajdašov, ali se Božijov Most počel krhati tak da je negdašji policiski minister Vlaho Orepič odišel doli z Mosta i ak nešči mortik nuca ministra nek ga mam poišče. Čovek ima dosti dobro prošlost, a pred jim bi se mogla najti isto tak dobra politička budučnost. Najte se igrati, količine so ograničene.

Si znate da smo si mi Međimorci odnegda bili zdobra z Hrvatima z Lejpe Naše, a pravzaprav so Hrvati Međimorci šteri so, v stoletju sedmom, preplavali Dravo. To sam vam več pripovedal, a mortik ste i zabili, kak so Međimorci i Međimorje bili poznati od stoletja tretjeg, a Hrvati od stoletja sedmog. Ve vidite kak je još negda bilo jako važno znati plavati, a od stoletja tretjeg do stoletja sedmog je niti jeden Međimorec ne preplaval Dravo tak da se je za Hrvate čulo stopram v stoletju sedmom dok so prvi Međimorci preplavali Dravo i počeli tam prek na drugomo šanco delati hižice i zafremati svoje familije. Verjem da ve stoprocentno znate zakaj smo si mi zdobra z Hrvatima, Ali nikak nebrem zazvediti zakaj oni nas zapravlaju kak da očejo pobeči od svoji koreni. Ali to nas nikaj preveč ne sekera i nas Međimorce je sploh nekaj vleklo v Lejpo Našo i v  Zagreb grad. Ne bi vam točno znal reči da so prvi Međimorci došli v Zagreb, a još meje da so prvi tam ostali. Morem sam reči da so prvi  Međimorci došli v Zagreb več zdavnja, još dok je dragi Božek po sveto hodal i od unda se zna da je Zagreb postal čista varoš i nigdar predi, pak nigdar posle je ne bil tak lepi i tak čisti kak dok so Međimorci o jemo brigo vodili. Od unda ga i zovejo beli Zagreb grad. Velim, ne znam da so došli prvi Međimorci v Zagreb, ali znamo da so več pred 80 let zafremali svoje Zavičajno društvo Međimoraca v Zagrebo, a štero laufa još dendenes. Laufalo je v negdašjo državi, a laufa i v Lepoj Našoj. Ovo leto, točneše rečeno, ovo zimo znova so naši „purgeri“ Međimorci organizerali još jeno Međimorsko večerjo v Zagrebo. Društvo i pajdašija štero vodi gospon (i doktor) Danijel Režek, a žnjim so još i preštimani i poštuvani moži, pater Tonči, monsinjor Kolarič (Đurek Kovačov), gospon Šoltič, Marđetko, doktor Bergovec, tajnik Duško i drugi štere potpirajo mladi međimorski „gastarbajteri“ v Zagrebo, znova so preprajli jeno lepo i veselo večerjo za se Međimorce, kak one v Zagrebo, tak i nas z „Falačka zemle med dvemi vodami“. Još se je neka zazvedilo na te večerji, de je cugle zabave vu svojimi časkimi rokami držal Žiga Mneđimorski i jegov bend, a to je da se prepravla kniga o osemdeset let Društva i Međimorcov v Zagrebo. I to ne bilo kakša kniga, nek prava i debela. A kakša bi drugačeša i mogla biti ak jo piše monsinjor i doktor Juraj Kolaričov, očem reči, Đurek Kovačov. Nek si znajo pokaj so naši Međimorci hodali v Zagreb, v beli Zagreb grad, i kaj so tam delali.

Kak sam več rekel, mi Međimorci smo si z Hrvatima navek bili zdobra, a ne znati kaj smo se mi jim zamerili, pak nas furt zamečejo. Najme kaj, jeno vreme smo mogli prek državni mediji zazvediti kakše je vreme prinas v Međimorjo, je li dežđuje ili pak sonce sveti, je li je vroče ili pak drevje poka od zime, a ve več hajdi dugo nikaj. Si gradi šteri bar malo držijo do sebe so gori na lojtrici, a nas nigdi. Niti na televiziji neznajo da mi postojimo, a niti pak ovi na radio. Ne znati što je komo na žul stal kak je do toga došlo? Kak daj ovi v Lepoj Našoj nej znali da smo se još 1918.leta vrnuli z Austro-Ugraske i da Lejpa Naša završavle na Muri i da meja držijo Serjančari.

To kaj se nebre zazvediti kakše vreme je v Međimorjo je nejmeje, ali dok so sosedi vidli kak nas ovi naši v belom Zagreb grado zamečejo, mam so jim zrasli apetiti za našim hatarom i počeli so se glasneše spominati kak bi oni nazaj. Pred sto let smo jim  zanavek rekli zbogom, a još nas nebrejo zabiti i sploh jif nekaj v Međimorje vleče. Moral bi hititi oko, mortik so več deli Međimorje naše malo na svojo karto z prognozom vremena.

Saka sličnost z sosedima z istoka i jivim senjama o meji Virovitica – Karlovac – Karlobag je čistam slučajna.

Kak naša fajna precednica Kolinda seli svoj precednički ured po županijama kaj se pospomina i kaj bole upozna svoje biračko telo tak i čakoski gradonačelnik seli svoj ured iz kafiča u kafič. Tak mo je bar zbajala jedna gracka vječnica. I mam je počela svaja: žene so navčene kaj navek imajo praf i da je jiva zadja, a i gradonačelnik se je ne dal jerbo bi v jegovomo grado jegova morala biti zadja. I tak se je unda našlo nekaj „štofa“ i za medije. Najte me krivo razmeti, ali ak precednica oče biti bliže svojemo biračkomo telo i to si falijo, zakaj unda to nej bilo dopuščeno čakoskomo grackomo načelniko i saborniko? Mortik se ruon točno ne zna je li svoje biračko telo obhaja načelnik ili pak sabornik?

Mi Međimorci smo sam takši, se kaj je ljucko čuda vejč vredi nek naše domače. Tak je to zišlo v Orehovici, očem reči, v Podbresto dok so Zagrebčanci dopelali svojega mulja na naše zemle. I kaj je zišlo, te zagrebečki mulj je nekaj nejbolšega za naše zemle, očem reči, najbolši gnoj za se ono kaj raste na našemo hataro, vu ovomo našemo cvetnjako, a za našega domačega smo rekli da je to nevola za zemlo. Najgerek sam, jako sam najgerek kaj bodo rekli inšpektori, kaj je itak to za musako Zagreba. Kuliko sam mel za čuti pre čakoski gracki vuri, te zagrebečki gnoj je gnoj prva liga tak da bodo na prtuletje, seposud de so ga rezlijali, cvele rože i to ne bilo kakše nek potočnice plavetne. Ak bode nešči štel meti fijolice bode moral zeti ovoga našega domačega.   

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE