[layerslider id=”6″]
Minoli so Dnevi županije, očem reči, idejo krajo jerbo još zutra imamo koncertlina na glavnomo čakoskomo Trgo. Nejglavnaše je minulo minuloga petka da je bila Svetešja sesija Županiske skupščine v Kulturnomo centro de so župan i jegova leva roka, Mladen Novakov, delili nejglavneše nagrade Zrinski za minulo leto. Hajdi je bilo onih kaj so si zaslužili pak so ne dobili, a bilo je onih šteri so dobili, a čuda je ljudi gombalo kak so si ruon ne zaslužili. Znate i sami da ga takše vage ne na štero bi se to se vagnulo, a kaj bi posle si bili zadovolni. Napriliko, sosedo Bariko je nišči ne predložil, a kuliko je ona pomogla sima i to ne sam v naši vulici nek celomo seli. Ali kaj se tu more da ona dela v takšoj uslužnoj djelatnosti z šterom se ruon nebre pofaliti, a oni šterima je pomogla, vu vekšoj ili menšoj nevoli, jo ruon tak ne vupajo pofaliti. Sosed Pišta je malo globleše pogledal v kupičko, pak mo je jezik bil fletneši od pameti i doma med pajdašijom je pofalil Bariko i to tak fest kaj mo je žena odišla na svoje.
Kak bilo da bilo jedno od glavneših nagradi je dobil i Čakovčanec Zvonko Golob, prvi, očem reči, nejvekši antifašist (kaj god to značilo, a mel je deset let dok je rat završil) našega „Falačka zemle med dvemi vodami“. On je dobil nagrado Zrinski zato kaj je čuda pomogel školama, navučitelima i navučitelicama, a z školi je odišel v politiko pred nekaj vejč od pedeset let. A i v penziji je skorom dvajstipet let. Bil je sabornik v Saboro negdašje Republike Hrvacke i tam se je za nekaj boril ili kak sam veli, bil je protiv nečega kaj je posle tobož hasnilo školama. A da je to tak mo je svedok pokojni precednik Lejpe naše Francek Tuđmanov. Ne znati zakaj si je ruon Franceka zel za svedoka, a mogel si je zeti Mesiča ili pak Danijela Režeka šteri so unda, ruon tak, bili saborniki v istomo Saboro od 1965. do 1969. kak i Zvonko.
To je još ne se kaj se dotikavle navučitelica, navučitelov i profesorov vu Zvonkijovo vreme. Najme kaj, prosvetari so štrajkali 1968. leta jerbo so ne bil zadovolni z plačami štere so dobavlali. Meli so Zvonkija kak sabornika, ali jim je nikaj ne pomogel več je štrajk skup z štrajkašima odišel po riti k meši, očem reči, nikaj so prosvetari ne dobili kaj so iskali. Najbrž so se zato stareši prosvetari i čudili ovoj nagradi!?? Ne zato kaj jo je Zvonko dobil nek zato za kaj jo je dobil. I još nekaj, ak si jo je zaslužil unda jo je trebal dobiti dok je još hodal na posel, a ne ve dok se i to več na leta, vozi po Čakovco z peciklinom iz minuloga stoletja i negdašje države. Kak je bilo predloženo tak je i zglasano. Bilo je dosti roki ili kak to lepo veli teca Franca, što ima strica i v nebo se dosmica. A ja vam nikod nikam nebrem jerbo so mi si strici pomrli.
V ove Dneve županije naši međimorski turistički težaki so sima šteri so došli v Čakovec pokazali „Kaj Međimorci delajo dok nikaj ne delajo?“ Glas o tomo poslo je, prek radijoma, došel tijam do naših sosedov Dalmošov v Lepoj našoj. Nejso se mogli načuditi kaj itak mi Međimorci delamo dok čistam nikaj ne delamo? Najme kaj, mi Međimorci i dok nikaj ne delamo nekaj delamo (ne hmajikujemo) i to nekaj za ponucati, očem reči, za povenodjati, za potrošiti… A Dalmoši to nebrejo razmeti jerbo oni i dok delajo nikaj ne delajo nek sam hodajo na posel, a ne kaj bi nekaj delali (nedaj Božek) dok nikaj ne delajo!
Pre meši v zagrebečkoj katedrali, v pondelek, na 7. spomenden pogibije Petra Zrinskoga i Frana Krste Frankopana bilo je hajdi ljudi. Precednik Sabora je poslal svojega izaslanika, a došel je župan z svojimi pomočniki, bila je Garda z gardistima, bili so Zmaji, bili so Zagrepčanci, Bandič je poslal svojo zamjenico, Karlovčani, došli so ljudi z Ozlja, Kraljevice, Bakra, Crikvenice, Zrinski Topolovac, Zavičajno društvo Međimorje v Zagrebo, Vojno učilište, HAZU, hrvatski braniteli… Svoje ljude je mel grad Prelog, Mursko Središče, Doljnja Dubrava, Cirkovljančani so meli svoje obligate, mons. Berljak (šteri je počastil Gardu i gardiste kak i sako leto) i gospon Tonči Mikec. Mešo je služil biškop Juraj Jezerinac, a z grada Zrinskih – Grada Čakovca ga nikoga ne bilo. No, to je ne bilo prvič! Več so se, brzčasi i Zrinski privčili!
Na sam svetek dela, Prvi maj, v Čakovco je bilo se vredo i kaj se dotikavle dela i kaj se dotikavle bažola. Red pred kotlom je bil dugi i debeli. Čakalo se duže nek pre doktoro i nikomo je ne trelo stolca. Si so bili zdravi i zdržali so. Ve vidite kuliko bažol vredi. No, redi so bili i drugdi, ali ne seposot, sam tam de se je kuhal bažol, a posle i delil zabadaf. Redi so bili kak negda, pred 35 let dok se čakalo za kavo, olje, prah za prati ili pak za benzin.
Bažol je svoje napravil tak da je v sredo bil veliki pritisak v zrako jerbo so v tork odvečer bažolovi vetri leteli v zrak, očem reči, proti nebi, a dok so prdeci gori pobrali roso bili so prežmehki i vrnuli so se nazaj kak dežđi. Nejpredi se teško dihalo, to je bilo od domačega bažola, a posle dok je nebo toga pritiska več ne moglo zdržati unda je reširilo noge i počel je dežđ cureti. Kak i navek bažolj ima svojo jeno lepo strano i nejmeje dve meje lepe. Ne znati je li smeti prdeti po bažolo v društvo ženi ili je i to nasilje po Istanbulskoj konvenciji?
Zrinski so naprajli Staroga grada na brego tak kaj se more v grabi kuhati gulaš, bograč, bažol ili pak peči čevapčiči, ražnjiči, piceki odojak. Ne znati kak bi Čakovec denes preživel da so Zrinski ne tuliko toga zafremali?
Na Prvi maj je v Čakovec na esdepeov črleni bažol došel i, još navek, prvi čovek leve Partije Davor Bernardič. Španceral se je od stola do stola, od kotla do kotla skupa z čakoskim načelnikom Štefom. Niti mlade puce, a niti pak žene so ne mogle reči šteri je lepši, je li Davor ili pak Štef? Jedino kaj se je vidlo da je Davor mel lepšo, očem reči, novešo majco!
Nejvekšo fešto so naprajli Međimorski konjari v Držimorco pre Jadranki i Vladijo Matičo. Tam je bilo sega. Hajdi je kojov, a za jimi i kobili došlo. Nešterni z fijakeri, kočijama, koli i lepo so povorko naprajli. Tijam do Sobotice. Za gablec so bili konjski klobasi, posle se mehnatil bažol, a podvečer dok se je več sunce pomalem skrivalo na stol je došla i janjetina. I to ne bilo kakša: enc A. Jelo se je, pilo, popevalo i plesalo. Znajo se konjari veseliti, ali so se niti koji ne nikaj bunili. Magadili so, kak i navek.
Ve dok smo mi v Lepoj našoj, na se zadje, ipak došli do kraja z tem Pelješkim mostom, ve so se počeli buniti Bosančerosi i to sam zato kaj jim je, tobož, most preniski za jivo ratno mornarico. Za ve nemajo još niti jenoga velikoga broda nek samo čone, ali kanijo nabaviti sam nebrejo si zebrati de bodo kupuvali vu Finskoj (Patria), Šveckoj ili pak v Izraelo? Premali je most za bosanske flojsere, bar tak velijo, jerbo se prepravlajo kaj bodo jivi čoni plavali osovički. I to sam pod našim mostom! Rekla je teca Franca: kaj se te Bosančerosi pušejo i bunijo, pak te jivi flojsari so tak mali kak orehove ljuske. Ak bi zdiguvali mosta kak Bosanci očejo, pak to bi bilo kak da moj Tonča dojde z kriglinom po fraklec žganičke.
Pajdaš, prijatel, pisac, pjesnik, zmaj, matičar, novinar, urednik, športaš, penzioner, Zagorec i Međimorec, Ernest Fišer je, mam po prvomo majušo, preslavil svojih prvih tri frtalj stoletja. Ve se pak meja pomeknula. Od ve več skorom saki šmrklivec ima 75 let. A nešterni i vejč. Srečno Erni! Dej Božek kaj i kleto bodemo na sveto skup živeli! A unda pak znova!
