[layerslider id=”6″]
Če si duže i bole gruntam se meje i meje znuom i se sam meje siguren da je tajnik ministrice Nade Murganič, Marin Strmota, dobro napravil dok je podnesel ostavko na svojo foteljo v ministarstvo za mlade, familije, socijalo i demografijo. Nejpredi mi je to zgledalo tak da je Marin mel muda i rekel je ministrici, a i sim nam, kak ga od jegovoga posla i posla jegove ministrice ne bode nikšega hasna, očem reči, rekel je da se od te mele kruh ne bode jel i da on zdiže roke i neče biti kriv kaj nam Lejpa naša hmira. Otkak je zalaufala nova Vlada v šteroj je gospa Murganič ministrica, a Marin je bil tajnik, je prešlo več dosti cajta i ve dok se je počelo šepetujiti, se glasneše i glasneše, kak gospa Nada odhaja (a si znamo de se vidi dim včasi dojde i ogej), a da jo bode zamenil Marin Strmota v ministarskoj fotelji, ve je Marin zdigel sidro i rekel je zbogom gospi Nadi i politiki i vrnul se je nazaj na faks de je i predi „izleta“ v politiko delal. Kak gud mi je teško, ali moram reči ono kaj mi moj črvek šepetuji, a to je da je Marin ne mel muda kaj bi zel vu svoje spametne roke cugle vlasti v Ministarstvo mladih i kaj bi nam sima pokazal kak se dela i kaj moramo naprajti ak očemo kaj nam se ne bode Lejpa naša zdošla. Makar je nejpredi ne tak zgledalo, ali brzčas i ova medalja ima svojo drugo strano, očem reči, neje se tak kak zgledi na prvi videc.
Pregruntal sam si tak, a pajdaš po nalivperi, Pišta Štercov je lejpo napisal v jenaj dnevnaj novinaj štere more kupiti v trafiki saki tjeden, da ak bi si ministri, zamjeniki, pomočniki i tajniki napravili tak kak je napravil Marin Strmota, Lejpa naša bi jako fletno ostala brez pol (nejmeje) Vlade. Pol bi dišli jerbo jif nišči ne posluša kaj govorijo i nišči ne nuca jivoga posla i jivo pamet, a nišči ne bi ostal da bi odišla i ona druga polovica štera sam hoda na posel, nikaj ne dela i dobavla veliko plačo. I ne buni se kaj nikaj ne dela. To so oni šterima je žlica pala v med. Ili kak teca Franca veli: ne sam žlica neg celi beštek!
Verjem da ste čuli ono pričo kak je Pišta nazval Ferija i pital ga kaj dela? Feri je otpovedal: Nikaj, na poslo sam!
Nebre mi se nikak rezbistriti i kaj bi bil stoprocentno siguren što se je, itak, v ovoletošjoj Korizmi odrekel Tončeka Ramljaka? Je li je to bil Plenki, jegova ministrica Tinčika Daličova, Sabor, Most, Živi zid, SDP ili pak HNS ne moči točno zazvediti. Stoprocentno znamo da ga se je ne odrekel američki „lešinarski fond“ šteri se je prek jega obogatil. Ak se je jeden svetski fond obogatil prek našega Agrokora unda znate da so to ne bili mali penezi jerbo Ameri se ne spominajo i ne cukajo za male peneze. Veli teca Franca, ona vam furt sedi pred televizijom, se gledi, se posluša i se zna, da je tua pljačka Agrokora hujša od one dok so šesnajstpot farbali tunela Sveti Rok. A ak teca tak velijo unda je to stoprocentno tak i nebre nikak drugač biti.
Ve je došlo na svetlo dneva to kak je Tinčika pisala Lex Agrokor za Tončeka Ramljaka, a posle je, po tomo zakono, Tonček postal zakon za Agrokor (bole kak Žuja) i pretakal je ono čega je bilo nejmeje i čega je nejveč falilo, vu svoje žepe tak da ve još vejč fali. Pak kaj je to, jena milijarda vejč ili meje, pak to je dragomo Božeko sejeno. Mortik bi bilo bole da je mesto Tončeka ostal Ivek Todoričov, on si je več dosti nazobačil, pak bi, mortik, delal čuda bole sam kaj spasi „svojega“ Agrokora ak je več vu ova sa minula leta Agrokor (čitaj: verovniki i dobavljači) spašaval jega???
Dok se spominamo o tomo kak spasiti Lejpo našo, kak zadržati mlade kaj ne bodo odišli vum delat, kak pomoči mladima kaj bodo deco delali, očem reči, kaj bodo meli vejč dece, nejvečpot dojdemo do toga kaj treba mladima za sako dete dati čim vejč penez kaj jim se pomore okoli zdržavanja toga deteta. Makar si prepovedajo kak so deca naše nejvekše bogactvo, ali paperi kažejo kak nejmeje dece imajo oni šteri imajo nejveč penez.
Naši stareši so nam navek prepovedali kak se tre vučiti na greškama, ali ne svojima. Oni so nam govorili, očem reči, nagovarjali so nas da se oženimo čim predi kak bi mogli fletneše postati japice i mamice jerbo je to, tak so nam bar rekli, nekaj nejlepšega na sveto. Mi ve znamo da je tak i istoga navuka davlemo našoj deci, ali oni poslušajo i nikam dale. Najdejo si para i unda živijo skupa mimo cirkve i matičara. Jeni živijo pre starcima, tam so i na košti, i sam hodajo skupa spat, a drugi so celi den skupa, a spijo doma. Vrag bi ga znal kaj je bole ili pak huje? Naši se več nečejo z menom spominati jerbo jif navek pitam da bodo japica i mamica ak se stopram z tridestipet let spravlajo prvo dete delat. Sa je sreča ak v tem letima i fabrika za deco dela onak kak to Božek zapoveda!
Si znamo da smo v Korizmi i da se tre nečega odreči. Napriloko, soseda Barika se odrekla gledanja televizije, očem reči, Big Bradera i turski seriji. Znal sam da je nekaj žjom ne vredo čim jo vidim saki den v obloko i gledi k nam sosedima i išče nekoga za pajdašijo kak lačna krava gazdo.
Nit med cvetjom ga ne pravice mogli bi tak reči dok vidimo kak nas gulijo ovi „naši“ hrvatski autocestari. Dok se pelamo od Svetoga Križa do Svete Jelene cestari nam zemejo 36 kuni dok se pelamo tua i 36 dok idemo dimo. Ak si malo bole pregruntamo to je skorom 10 ojerov. Kak da smo Rokfeleri. I ne sam to, a zagrebečki purgeri se vozijo zabadaf se okoli belog Zagreb grada, očem reči, od Svete Jelene, pak do Zaprešiča. To je skorom tak dauko kak je od Jelene do Svetoga Križa sam kaj mi plačamo, a jim se šenka. I nikoga to ne sekera kaj mi Međimorci imamo nejmenše plače v Lepoj našoj, a „purgeri“ nejvekše. Škoda kaj je Robin Hud hmrl. Da je živ fčasi bi on tu reda napravil!?
Nedeliščanci so se počeli buniti, oni bi šteli kaj bi Nedelišče bilo grad, a ne sam opčina. Ne bi vam točno znal kaj mesto mora meti ak oče biti grad, ali kuliko poznam Nedelišče oni nemajo staroga grada, a nemajo niti dvjesto let staro gacijo kak to ima Čakovec. No, ali ak bi se brojilo kuliko auti Nedelišče imajo na cestaj i ak bi se po tomo određuvalo štero mesto bode grad unda ga tu nišči nebre prestiči. Brzčas Francek Cimermanov ima praf, ipak je lepše biti građanin nek mještanin. I v Međimorjo ga čuda gradi šteri so menši i imajo meje stanovnikov nek Nedelišče, a to so vinoGRADi. Ak se trsi ne brojijo!
Kaj bom rekel, neje lefko, a niti lepo, biti čakoski gracki načelnik. Dok se nejpoznateši čakoski „starec“ nadvožjak pre Staromo Hrasto se bole pogjeno drži i pomalem se je počel ruliti i se vejč skuli ima, a ve pak so počele po cesti rasti lukje. Vreme, kak i navek, nekaj odnaša, a ono drugo donaša. Čim so ceste stareše se so „slabešega zdravja“ pak popuščajo pod kotačima autov, i lukje ostajajo. I kaj je nejhuje, lukje je prekril sneg i unda je ne nikaj čudno kaj amortizeri odhajajo po riti k meši. I ne sam amortizeri neg i gume. Što bo to platil ak se zna da cestarine redovito plačamo kak i se čeke štere dobavlamo v poštanske kasline? Što, to ja pitam našega grackoga načelnika?
Dvajstipet let smo potrošili kaj smo hodali po potima Međimorskoga partizanskoga odreda, a denes se to zove Vinska cesta i muočili smo se kak naši težaki na baušteli v Dojčlando kaj bi stvorili brend vina. Morem vam reči, kak god je bilo teško, ali smo uspeli. Denes si v Lepoj našoj, a i čuda dale znajo za Međimorje i međimorska vina nejbolša na sveto. I unda, kak da so z neba pali, v Čakovco so se pojavili Lepi dečki i počeli so kuhati pivo. Nebrem veruvati, v zemli vina, dečki kuhajo pivo. I to je još ne se: oni zovejo nas nek dojdemo kaj jim pomoremo naprajti brend piva. Pak, ljudi moji, nebremo se niti mi restrgati, furt moramo nekaj delati, ve smo na leta delali na brendo vina, a ve pak bodemo, bog zna kak dugo, delali na brendo piva. Pitam se pitam, da bode došlo vreme kaj bodemo mogli na miro piti i uživati, a ne kaj moramo furt delati?
Sako zlo za nekše dobro: Štrajfal sam direktorovoga auta na parkingu. Stroške popravka mi bodo pet let jemali z plače. Drago je je, ali ve bar pet let nem dobil otkaza!
