[layerslider id=”6″]
Nejpredi smo dočakali, kak je red i kak nam se šika, naše zlatnosrebrne Vatrene z Rusije, a unda smo ispratili našega „slavuja“ Olivera Dragojeviča na vječni počinak. Oliver je nekaj vredil i nekaj je značil za se nas v Lepoj našoj šterima nam je na leta popeval da ga je z Splita na Korčulo ispratilo vejč od sto jezer ljudi: Spličanov, Dalmošov i z sih drugih krajov Lejpe naše. Novinar novin „24 vure“ Tomislav Klauški je napisal i živ ostal kak so v Splito ispratili „estradno zvezdo bivše Juge“. E, Tomek, Tomek, nebreš nikak pozabiti bivšo Jugo, a nesi preveč dugo živel v joj. Sploh te nekaj nazaj v komunizam vleče i zato ti je i Tomson smetal na Vatrenomo buso. A Oliver je mam posle Oluje lepo, jasno, glasno i kaj so ga si razmeli, rekel kak nigdar ne bode popeval četnikima. Oni nemajo te peneze za štere bi on popeval onima kaj so rušili Lejpo našo. I toga se je držal do skradje vure. Neje on kak Tereza Kesovija šteroj so četniki zrušili hižo v Konavlima, a posle je ipak išla popevat v jiv glavni grad.
Ne greje se ovo hrvacko sunce jednako, pak tak niti si nebrejo popevati v pulskoj Areni. Minulo soboto je v Areni popeval četnik Momčilo Bajagič Bajaga. On je popeval četnikima dok so rušili Lejpo našo od 1991. se do par dni predi Oluje v Knino. Da so ga oni nucali on je došel popevat. Kaj bode jim malo leži na fronto i kaj bodo duže zmagadili. Jegovi Instruktori so igrali, a on je četnikima popeval: „Kreče armija, nejjakša na sveto, kreče armija u osvetu i jednom zauvijek armija srpska i jednom zauvijek sve če da vas smrska!“ I on brez se brige more popevati v Areni i na sakomo koncerto se zdiguvlejo tri prsti i nišči je nigdar ne ištekal strujo. A Tomson šteri se je boril za Lejpo našo i šteri je popeval našim braniteljima on more sam senjati Pulo i Areno. A kaj se čudite, dok je takših novinarov kak je Tomek v „24 vure“ Tomson bode navek na hudomo glaso, a sima drugima je se dopuščeno. Kakši smo to ljudi, mi Hrvati?
Za Den pobjede, za obletnico Oluje sam del našo trobojnico na balkon. Nek se zna da živimo v slobodnoj, nezavisnoj i Lepoj našoj. Čakali so to naši stari od stoletja sedmog, čakali so i nejso se fčakali, a mi fala dragomo Božeko imamo to privilegijo kaj se moremo štimati z svojom državom i svojom zastavom i zato mi je čistam nekak normalno da se tomo dnevo veselimo i da denemo zastavo. Ve se nikoga ne moramo bojati, ali moji sosedi, kuliko sam mel za videti, so si još ne kupili zastave. Došel mi je nejmlajši vnuk i čim je spazil zastavo zapital me je: – Japica, z kim igramo?
Preslavili smo i velikoga katoličkoga svetka Veliko mešo. To je Marijikin svetek i na te den se si ljudi genejo. Mi, Međimorci i Zagorci hodočastimo na Bistrico, Istra, Reka, Gospič na Trsat, Slavonci v Aljmaš, Vočin, Zagrepčanci v Kloštar Ivanič, a Dalmoši v Sinj i Vrpolje. Prinas na ovomo našemo „Falačko zemle med dvemi vodami“ se Marijica posebno poštuvle v Svetoj Mariji, Belici, Svetomo Martino, Puščinaj…Hodočasti se k Marijici z autima, peciklinima i peške. Saki od nas ima nekaj za zafaliti Marijici ili pak jo nekaj prositi. Pak je ona ne zabadav, kak i jena nejlepša pesma veli, Kralica Hrvata! Navek smo do ve mogli na jo računati, a bodemo jo nucali i dale.
Minuli mesec je svojega rođendana i to osamdesetdrugoga preslavil navek mladi, malo meje po formi, a čuda vejč po životnomo kotačo šteri ga još navek tira napre, gospon Danijel Režek, inžiner, doktor i političar. Kak se to jemo i šika, pozval je svoje pajdaše na druženje v Prilok i to na priločko Marino. Zakaj ruon tua? Štel je sima pokazati de je te Prilok, grad o šteromo se več na leta si lokalni političari jalno spominajo. I ne sam to, ve si šteri so došli znajo da je priločka Marina ostala od negdašjega Panonskoga morja. Kak je rekel monsinjor Juraj Kolaričov, v Međimorjo poznati kak Đurek Kovačov, tu završavle Panonsko morje, a počnejo Alpe. To je tak je i drugač nikak nebre biti, a mi Međimorci se premalo štimamo z tem. Ve posle ovoga Režekovoga rođendana bodo se o tomo spominali i v Zagrebo jerbo je bil tu i gradonačelnik Belog Zagreb grada gospon Bandič, bil je tu i precednik Akademije, gospon Zvonimir Kusič, tak da se bode dober glas o Priloko i Panonskomo morjo preširil i med akademicima celoga sveta. A te ga ne baš malo. I jiv glas se jako dauko čuje. Kaj reči, malo je ljudi šteri na svojemo rođendano more meti za stolom skorom dvjesto ljudi. Brzčas gospon Režek još nekaj vredi, neje za staro železo i neje još rekel svojo zadnjo reč. Još navek nema mira i pomaže de stigne, kak gospodarstvenikima tak i v kulturi. Kakši je bil ovih prvih osemdeset let takši bo najbrž i dale. Teško se je spremeniti, a posebno na bole, vu tim visokim letima. Mam posle Priloka odletel je dale, prema Jugo. Usput je preslavil rođendana z sinovom familijom i Ličanima v Lovinco, unda z „morskom pajdašijom“ na Pagu, z generalom Gotovinom i pajdašom Jusupom v Zadro i na se zadje se je zmiril v Dubrovniko. Seposud kud je išel, sima je pripovedal istino o priločkom Panonskom morju i međimorskim Alpama. Znova se je z tiblice potegla vum ideja kaj bi se spojilo Međimorje naše malo z Dubrovačkom kneževinom. Precednik HAZU je podržal to idejo i pitanje je vremena da bode tua ideja ugledala svetlo dneva. Našemo Danijelo želim da bode još dugo prenosil ljepote i vrednote Međimorja našega maloga seposot kud hoda, kak je to i do ve delal, i nek mo dragi Božek da zdraviča kaj se ne bode moral preveč okoli mladih doktorici motati.
Nebrem, a kaj nej pofalil našo Sandro Perkovič štera još navek nahitavle toga svojega diska nejdale na sveto. Ove dneve je postala nejbolša v Evropi i to po petipot kaj je do ve ne nišči na sveto napravil. Lepo je rekla: – Da bi bilo lefko petpot biti prvak Evrope unda bi to napravil saki, očem reči, saka. A još navek je ne rekla svojo zadjo reč jerbo je ve v nejjakšim letima tak da bode ona nabrala još hajdi zlatni želenciji kak ovi evropski tak i svecki. Kaj vam nek rečem, furt se celi svet spomina o nama Hrvatima, a posebno našim športašima. Sandri svaka čast i kapa do zemle!
Dok se spomene Švedska unda si navek gruntam o nejmirnešoj i nejpoštenešoj državi v Evropi. Tam si ljudi imajo posla, dobavlajo plače, regresline, imajo penzije… Se ono kaj si naš čovek more sam senjati, a unda kak strela z vedroga neba je doletela vest kak so nekši huligani v Geteborgo spotrli i skurili osemdeset autov. Kaj je itak došlo v te Šveđane, kaj jif gvinta? Kakše probleme itak oni imajo? Nek dojdo k nam, pak bodo unda vidli kaj je živlenje i kak je jim lepo i kak nikše brige nemajo. No, neje to niti se. Ve je došlo vum, ve so Šveđani priznali, kak so huligani spotrli ili pak skurili v lanjskomo leto 1457 autov. Da čovek ne poveruje jerbo so do ve bili stiha. Najbrž preveč sega imajo, mi smo bokci i mi pazimo na svojo sirotinjo i na se kaj si zteška privredimo.
Ve vidite kaj te vručine delajo? I ribe v ribjako Novakovec so ostale žene, očem reči, dehidrerale so. Sfalilo je vode v ribjako ili pak zraka vu vodi? Od sega pomalo. I što je unda pomogel? Što drugi nek ogjogasci. Te dečki se morajo v se razmeti, a ne sam v ogje. Kuliko vidimo v zadje vreme ga nejmeje ogji, a ogjogasci furt imajo posla. Sa je sreča kaj jif imamo i kaj se furt vučijo nekaj novoga, a kaj nam treba. Tak so dečki v Novakovco pomogli kaj so ribe ne podurale. Lefko je nam ljudima, dok nam je vroče, dok smo ženi, skočimo prek pota na šank k Štefici i tam se okrepimo z gemištecom ili pak pivikom. I to ne sam jednom. Ali ribe nebrejo vum z vode, a ne znajo reči kaj jif muoči. A si znamo da je brez ribi teško živeti. Ak smo jif več zapovali unda se trebamo i brigati za jif. Trelo bi v ribjako zmisliti nekšo krčmo i za jif kam bi mogle skočiti kaj se okrepijo dok počnejo teško dihati.
