[layerslider id=”6″]
Naši sosedi z Istre bi v semo šteli biti prvi. I dok se ide naprej i dok se ide nazaj. Dok je 1992./93. počela pretvorba i privatizacija Istrani so v semo bili prvi i prvi so se hapili delati na tomo kaj bode ono kaj je do fčera bilo naše mom postalo jivo. Se kaj so mogli so privatizerali, očem reči, se kaj je vredilo. Tak je to bilo i z brodogradilištima sam kaj so za jiv hajdi penez pozobačili z državne kase predi nek so jif privatizerali. Zmislim se kak denes dok je Slavek Liničov prvipot bil minister za penez, a precednik Vlade je bil Ivica Račanov, kuliko je penez odišlo vu rečko brodogradilište Viktor Lenac. Slavek je predi bil gradonačelnik Reke pak je znal do čega vu tomo grado crkajo muhe i kaj treba ovim dečkima šteri delajo brode. Kuliko vidimo Viktor Lenac, bar za ve dela dobro i nekšega dobička imajo sam se je predi toga moral rešiti onih težakov šteri so sam hodali na posel i hodali so si po plače, a nikaj so ne delali. Kaj bi rekli ovi vu Viktoro Lenco so pokazali da se i od toga posla more jesti beli kruh i to sih 500 težakov kuliko dela i dobavla plačo vu Viktoro Lenco, a i direktor je zadovolen, kaj ne bodemo spominjali dioničare. Brzčas Viktor Lenac nekaj vredi ak so i Talijani kupili 40 procentov dionici?
Pred nami so ve ostali još dva brodogradilišta i „Uljanik“ z Pule i „3.maj“ z Reke, Ne znati je li obedva imajo iste betege ili pak jako slične. Nejpredi je došlo do problema v Puli jerbo so kesnile plače za težake. Ve vidite kak se pulsko morje rezburkalo čim so težaki v brodogradilišto na dobili plačo? A još so dosti dugo dobavlali. I do ve so ne pitali što pak jim je daval plačo? A čim je sfalilo penezi za plače unda so se si rezbežali po Istri, po Lepoj našoj, pak tijam do Brisela iskat peneze za plače. Nebrem to razmeti? Dok se je Uljanik privatizeral unda so ovi z Istre i težaki z Uljanika nikoga kcoj ne pustili jerbo to je jiva herbija (dedovina), jivi japice so to stvarjali i to mora jivo ostati. Ne bi znal točno, a brzčas to niti dragi Božek ne zna, kuliko je državni penez odišlo v Pulu i kak so dugo Uljanikovi težaki dobavlali plače z državne kase (pitajte negdašjega ministra Čačiča) i se je dobro bilo dok je ne sfalilo naših penez ili pak je nešči zapral pipo. Kak sam rekel, Istrani so bili prvi dok je trelo naše privatizerati, prvi so zdiguvali roke i kričali za kapitalizam, a ve dok je to v jivaj rokaj (težaki imajo nekaj malo meje od 50 procentov dionic) ve bi oni šteli kaj bi se, bar na kratek čas, vrnul socijalizam i kaj bi mi si znova metali penez v jivo kaso kaj si bodo oni mogli i dale hoditi po plače. Ve čim kesni plača ve niti Uprava ne vala, a dok so bile plače unda so bili nejbolši. Oni so gazdi, skorom pol jiv nikaj ne dela nek sam hodajo na posel i ve se čudijo kak ga ne penez za plače. Malo mi je čudno kaj još i dividendo ne iščejo? Ve bi oni natirali Upravo i dopelali nekše druge što bode reda napravil v jivi fabriki, ali kaj se nej nikaj spremenilo, očem reči, kaj bodo si ostali i kaj bodo plače saki mesec. De pak so oni vidli revolucijo (promjeno) brez žrtvi? A nikaj ne pitajo što je plačal to kaj so oni železo i plehovje za brode štere so delali kupuvali po sto kuni za kilo, a brode so prodavali po 80 kuni. Drago so kupuvali, fal so prodavali i još so meli peneze za plače. I to za se težake, kak za one šteri so delali, tak i za one šteri so na posel hodali.
I to je još ne se. Težaki ve štrajkajo i to tak dugo dok ne dojde plača za sedmi mesec. A dok bode došla plača za sedmi mesec unda bode več minul i osmi pak bodo dale štrajkali dok ne dojde plača za osmi. I tomo nigdar kraja. A protiv koga težaki štrajkajo? Protiv sebe. Rekel sam več, težaki so gazdi pol Uljanika, a država ima cirka frtalj i pitam vas lepo što bi ve težakima trebal dati plače? Pak je leži štrajkati i lenguzati nek delati. Več na leta se spominajo oni šteri se malo bole razmijo v ekonomijo i kapitalizam od mene, da bi otprilike pol težakov trelo natirati z Uljanika ak bi šteli kaj bi posluval kak tre, kaj bi mel za plače i kaj bi mo još nekši dobiček ostal. Ali što bode to v Puli napravil ak so oni na leta tak delali kak so se v socijalizmo nafčili. Zato jim i drug Tito Fali ?? I ne sam to. Dok je nekaj zaškripalo tu je bil „gazda“ Istre i IDS-a Ivo Jakovčičov i on je se rešil prek državne kase. Tam ga nejveč penez i nejleži je do jif dojti. Ali ve je brzčas Plenki zapral pipo jerbo so IDS-ovci na levoj strani tak da nemajo ključa od državne kase. Mortik je to i dobro za Uljanik kaj ve IDS-ovce v Saboro meja Pupavac šteri je ne nikaj faleši, ali so IDS-ovci morali to napre misliti, a ne ve dok so v nevolo došli. Najgerek sam, jako sam najgerek, kaj so itak Istrani rešili v Briselo pre Jakovčičo i je li so našli nekšega sponzora šteri bo težakima daval plače tak dugo dok ne odidejo v zasluženo penzijo. Ovi pol težaki šteri na leta nikaj ne delajo nek sam hodajo na posel, oni bodo se pofalili kak jeden jif pajdaš šteri je malo stareši pak je več pet let v penziji: dok mo je poštar donesel penzijo on je sedel vu vrto pod smokvom. Žena je došla po jega dok je došel poštar z prvom penzijom, a on je otpovedal: Nek mi je donese sem v hladovino, tu sam jo i zaslužil.
Najgerek sam, jako sam najgerek kaj bode prevagnulo v Istri kapitalizam ili pak socijalizam. Ili bode i dale malo jeno, malo drugo kak Istranima da paše. Dok so penezi je unda je kapitalizam, mi smo gazdi mi se delimo, a dok dojdejo v nevolo unda je socijalizam i si mi moramo pomoči. Teca Franca je rekla: oni bi bili i pošteni i je…. (da prostiš). Kaj velite zakaj so naša brodogradilišta nejvekši graditeli brodov v Evropi i okolnim kontinentima? Zato kaj to več nišči drugi ne dela. A zakaj ne dela? Zato kaj jim se ne splati. A sam mi još spašavlemo dobroga vojnika Švejka! Mi još navek očemo sima dokazati da to more preživeti i da se brodi morejo prinas delati. Je more se, sam što bo to platil? Ak Viktor Lenac dela remonte brodov i dobro jim ide, dobavlajo plače, pak i gazdi nekšega dobička, šteri je ne niti tak mali, denejo v žep unda je to pot po šterom se tre voziti. Ali Reka je ne v Istri. Pak kaj bodo Rečani ve ove v Puli vučili kak se brodi delajo?
Nekaj se je genulo i v grado Čakovco. Čim se vruhnul nadvožnjak pre sosedaj Talijanaj, v Genovi, mam so se naši gracki oci požurili kaj popravijo našega starca nadvožnjaka pre Staromo Hrasto. Ve vidite, sako zlo za nekše dobro. Nekaj sam si gruntal da bi mortik bilo dobro kaj bi mi našega nadvožnjaka vruhnuli ruon tak kak ovi v Genovi kaj nikomo nej bilo nikaj jerbo bi mortik za te peneze, kuliko je Kovačov zamjenik Mario Medved prepravil, mogli naprajti i novoga? Kak bilo da bilo dobro je kaj se bodo hapili predi nek se nekomo nekaj pripeti. Teca Franca je rekla: zmislim se kak denes da so otpirali toga nadvožnjaka, unda sam još bila mlada i fajna i mela sam tri dečke.
Minuli tjeden se je v Macinco z mešom i na Sepo v Hraščano z govorima, vencima i svečama obiležil Den žrtava totalitarnih režima i komunizma. Odala se počast i zmislili smo se na se one šteri so nastradali posle rata. Rat je minul, a pobjedniki so delali reda med onima šteri so ostali. Kak so rekli oni šteri se v to nejbole razmijo, posle rata je poginulo vejč ljudi, i to čuda vejč, nek za vreme rata. Neje lefko biti niti pobjednik. Štel sam sam pitati zakaj je nišči ne došel od antifašistov kaj bi se poklonil onima šteri so dali svoje živote sam za to kaj so ne pleskali pobednikima. A mortik so šteli, ali so jim ne dali priliko. Tak to zide dok si pravdo i pravico zemejo v roke oni šteri ne znajo kaj bi žnjom. Sa je sreča kaj so Srbi na traktorima 1995.odišli z Lejpe naše jerbo što zna kak bi to završilo da so ostali. A posle so se i tak vrnuli z autima i se se je pozabilo.
Školsko ferje je pre krajo na veselje roditelov jerbo več nebrejo na kraj z decom, a na žalost dece štera več ne bodo mogla lenguzati jerbo tre bo se znova na vreme stajati i v školo hodati. Pred sako novo školsko leto brojimo i zbrajamo kuliko nam dece fali, kuliko bode stolci i klupi v razredaj prazno. Pak moremo reči kak se mi, a posebno naši mladi, slabo kcoj držimo i ne delamo deco. Opčinari, načelniki, gradonačelniki, župan i si šteri se brigajo za deco i mlade več ne znajo kaj bi zmislili i kaj bi roditelima ponudili kaj bi gosteše deco delali. Nebrem to razmeti, kak je to lepi posel dok se deca delajo, a naši mladi, a i oni malo stareši šterima još fabrike delajo, se tak okrajajo toga posla. A si znamo da so deca naše nejvekše bogactvo. A si mi, kak mi v Međimorjo tak i naši sosedi v Lepoj našoj bi šteli biti bogati i to brez dece. Kuliko vidimo ne bode išlo. Kaj nek vam rečem, gače doli i na posel!
