[layerslider id=”6″]
Precednik našega Hrvackoga Sabora Gordan Jandrokovič z conom zvani Njojo je bil v posjeti Beogrado i našim sosedima Srbima. Skorom je se dobro prešlo sam je četnik Šešelj zgazil našo hrvacko zastavo. Nebre Vojo zdržati kaj ne bi nekšo glupost napravil. I sod v Hago ga je osudil kak ratnoga zločinca vu našemo Domovinskomo rato, ali on nema mira. Čim je nekaj hrvacko nebre zdržati. Najbrž so nas Srbi, Vučič, Vulin, Dačič, Nikolič i Šešelj šteli sprobati, očem reči, šteli so videti kaj bodemo naprajli ak oni zgazijo našo zastavo. I za to huncvutarijo so zebrali Šešelja jerbo jemo ne bode nišči zameril to spačko i bodo se zgovoril kak je on nigdar ne bil kak druga deca. Pravzaprav so šteli videti je li bode naš Njojo mel muda i vrnul se dimo predi reda i Srbijo ostavil tam de je i do ve bila.
Dok je naš precednik Sabora odišel dimo oglasili so se dva Leksiji, Vučič i Vulin, kak i navek za se je kriva Lejpa naša i na se zadje bode zišlo da si je Jandrokovič sam zgazil zastavo. Isto onak kak je bilo i v rato. Mi smo sami sebe napali, sami smo na sebe strelali, a Srbi i četnička jugosoldateska so sam špalera držali. Kuliko vidimo bil Leksi Vulin stopot minister obrane Srbije, ali čim se jemo spomene Lejpa naša ili čim vidi našo zastavo črleni-beli-plavi počnejo mo se spuhavati vodene kozice i ne zna kaj govori. No, neje ruon tak, zna on dobro kaj govori, zna on kaj ga muoči i po čemo ga žgaravica peče, a to znamo i si mi. To je meja Virovitica – Karlovac – Karlobag. To mo je saki den na pameti kak po dnevo to govori, tak po noči to senja, se drugo so priče za malo deco. Brzčas se dva Leksiji, Vučič i Vulin nadopunjavlejo, kaj Vučič misli to Vulin govori, a dok nekaj ruon nebrejo naprajti unda pozovejo Šešelja kaj on napravi nekšo spačko jerbo jemo nišči nikaj ne zameri. On je i soce v Hago prepelal žene prek vode.
I ve na se zadje bodo čakoski gracki oci sami popravlali nadvožnjaka pre Staromo hrasto. Dugo je več „Japica“ betežen, bolijo ga noge, škriplejo kosti, a i pomalem se je počel krhati tak da se na to vleče kaj bi se i zrušil na kolena, očem reči, pokleknul. Verjem da se zmislite kulikša leta se več o tomo spominamo, a nejglasneši so političari pred sake izbore. Predi izborov se nadvožnjak navek popravi, ali dok izbori minejo staračke kosti so bole boleče. Kak bilo da bilo gradonačelnik Štef i jegova leva roka, Mario so „japico“ nudili sima šteri imajo peneze, ali se je nišči ne za to prijel. Znajo si kakši smo mi Međimorci, a niti Čakovčari so ne drugačeši, jeno vreme bodemo mrckali, skunjkali i ak nišči ne bode otpral bukso bodemo zeli svoje peneze vum z strožoka i sami si bodemo popravili „japico“ kak smo i navek se sami naprajli. Tak smo jif navčili, tak so se privčili, a mi smo si sami krivi kaj je tak. Još dok je bil župan, Ivek Perhočov, je rekel kak on nikoga ne bode nikaj prosil, ali ak nam nešči oče nekaj dati nek nam da. Kuliko vidimo ovo drugo se je ne pripetilo i ovi kaj držijo šako na državnaj penezaj imajo za se sam ne za nas Međimorce. A nam dok i ne dajo malo se fujimo, den – dva, ali tretji den več fljučnemo v šake i počnemo delati z svojimi penezi. Ali dok zgotovimo unda pozovemo ministre, precednike i se druge nek dojdo glet kaj smo naprajli i još se pofalimo da smo ne nikoga nucali. Zdavnja i zanavek so minula tua vremena kaj ti bode nešči nekaj dal ak naš na kolenaj prosil. Zakaj? Zato kaj ga nigdar ne bilo dosti penez. Bar ne za se. A i mi znamo da so nigdar ne bili niti v Lepoj našoj si jednaki, pak so niti si prsti na roki ne jednaki. I još nekaj, navek se je bole grel on šteri je bliže ogjo, a znamo da se ogej kuri v Zagrebo, a mi smo sto kilometri dauko. To je tak je, sam ne razmem kak se Dalmoši, šteri so čuda dale, navek duže i bole grejejo od nas?
Na se zadje je i tua priča došla do svojega kraja. Potpisani je ugovor za delanje Pelješkoga mosta. Poštejaki z Osterajha, poduzeče Strabag je ne uspelo zrušiti natječaja tak da so posla dobili Kinezi. Strabag se je žalil sam zato kaj bodo Kinezi naprajli mosta za menše peneze nek so to zračunali Austrijanci. Rovarili so protiv Kinezov na se mile načine: po zrako, po cesti, po štreki, po mosto, pod vodom i pod zemlom, ali na se zadje so ipak odišli po riti k meši. I v redo je tak, Austrijanci sam filozoferajo i za se so navek iskali vekše peneze nek so se pogodili. Kak je rekla teca Franca: fala dragomo Božeko kaj smo to dali delati Kinezima, jim bar nado sfalili težaki. Ve vidite kak je to lepo zišlo: Kinezi delajo, Rusi jif kontrolerajo, Evropa plača, mi pijemo, a Bosanci se bunijo. Celi svet se vrti okoli našega mosta.
Lejpa naša išče od Englezov kaj nam pošlejo dimo našega Ivico Todoriča šteri je tam več hajdi dugo na neplačenomo urlabo. On tam hmajikuje, a mi se tu muočimo z jegovim Agrokorom. Kak smo god pretepli posle furt fali jeno 50 – 100 milijardi kuni. Iščemo jif seposod mesto kaj bi Ivico pozvali dimo i kaj bi nam on pokazali kam jif je pospravil, očem reči, sranil. No, dok je naš precednik zazvedil kak Ivica v Engleskoj živi v jenosobnomo stano i kak je na kruho i vodi, on mo se je premilil i pozval ga je dimo. Pak nebremo dopustiti kaj bode tak veliki kulak živel v tak malomo stano, a tu prinas so prazni Klovičovi dvori. Pak kaj smo na to došli kaj bodemo kulake sramotili po sveto. Pak si je valjda Ivica zaslužil kaj bode bole i pošteneše živel. Pak je on navek tak delal kaj bode mel dosti penez za se. Za se vu jegovoj familiji.
Nebrete veruvati kaj se je pripetilo prinas v Čakovco, očem reči, v Međimorjo? Burza dela bode nam ostala brez težakov i morali jo bomo zaprti. Do fčera nejvekša fabrika v Međimorjo, a denes nigdi nikoga. Zabadav država nudi peneze, zabadav je težakima povečala plače, ali nečejo ljudi dojti na burzo pod milim bogom. Kam itak plava te težački brod?
Najte me krivo razmeti, ali moram zašpotati te naše međimorske vinare i vinogradare. Počeli so naša nejbolša vina nuditi i Kinezima. Prosim vas lejpo kaj bodemo mi pili ak Kinezi zaprav počnejo piti? Probajte si pregruntati kuliko bo sam vina trelo za ove težake šteri bodo ve delali našega Pelješkoga mosta? A dok se zazvedi kakša vina imamo unda bodemo mi srečni ak nas bo bar šmarnica dopala. Tre gledati i malo napre!
Ovo leto bode pak, i to v majušo, cug mašina fučnula v Kotoribi. Najme kaj, prepravlajo se Dnevi ribe i šibe i to po petnajsti pot, a načelnik Grgec je pak shodil cuga od Čakovca do Kotoribe i to zabadav za se one šteri kanijo dojti v Kotoribo na fešto. Igrali bodo dečki z Črlene jabuke, a unda bodo tamburali i Gazde, a načelnik je za sebe i svoj gušt pozval CICE. Saki si more zbrati kaj mo paše, a ribi ga bode dosti i to sake fele. Nišči se nebre zvlačiti da nebre dojti. Jega sega, jesti, pijače, mužikašov i još dojdeš i odideš dimo z cugom tak da se nebreš nikak ziti niti z policajima. Kuliko vidimo ovi v Kotoribi mislijo na se. Sam tre dojti.
Opčina Sveti Đurđ na Brego je dobila peneze od Evrope kaj bode popravila staro i dozidala novo zabavište. Nekaj sam si gruntal, pak lefko je Evropa jif vidla da so na nejvekšemo brego v Međimorjo. Verjem da znate kak v opčini Sveti Đurđ na Brego počnejo Alpe, a mi Međimorci se ne znamo z tem faliti. No, ve se zazvedilo kak se v toj opčini dela nejveč dece. Of mesec je župnik Puškadija krstil jedenajst (z brojčekom: 11) dece. Morate deti roko na srce i priznati da je to jako čuda. Napriliko, v Doljnji Dobravi se jedenajst dece narodi za dve leti. Jako me veseli kaj je Evropa prepoznala opčino Sveti Đurđ na Brego kak hatar vu šterom se splati živeti. Još malo pomore minister za regionalni razvoj i črez par let bodo se meli: i grozdje i sadovje i kanalizacijo i deco. Školo i dvorano so več naprajli tak kaj bodo i turisti mogli dojti glet de to itak počnejo Alpe!
