[layerslider id=”6″]
Neje se lefko vrnoti v čistam obično normalno živleje posle ovih mesec dni kuliko smo se klatarili po Rusiji, gledali se svecke labodoritaše, kak one dobre tak i one slabeše i navijali za naše Vatrene i tak jim pomogli kaj so došli do srebrne želencije štera zlatno blešči. Se je bilo vredo dok so Vatreni bili v Rusiji i dok smo mi (nešterni vejč, nešterni meje) drukali za jiv. Si smo bili kak jeden v tomo da so oni nejbolši na sveto, da igrajo nejlepše i nejbolše, ali dok so došli dimo došle so vum i nešterne druge mušice. Več prvi den se vidlo da smo ne ruon si drukali za jiv i da nam smeta to kaj so si dečki poželeli kaj jim bode popeval Tompson. Pišejo nešterni naši novinari da je Tompson podelili publiko na one šteri so za jega i na one druge. Ali neje bilo tak, on je podelili novinare i one so se bunili, a publika, ljudi šteri so čakali i dočakali Vatrene, oni so popevali skupa z Tompsonom. Dok so vidli Tompsona nejbole v zrak so skočili oni novinari (i jivi pajdaši) šteri so ne navijali za Vatrene i šteri so feštali dok so naši labodoritaši zgubili od Francozov. To so oni šteri još navek nebrejo prežaliti Jugo i šteri so još niti jeden den ne preživeli v Lepoj našoj jerbo još navek hodajo spat v Jugo. I ne sam da hodajo spat nek se i budijo v Jugi.
Nebrem razmeti ove kaj se zdiguvlejo na zadje noge dok vidijo Tompsona i čujejo jegove pesme. Dok je Tompson bil v Domovinskomo rato, dok se boril protiv četnika i dok je popeval našim branitelima unda je bil vredo, ali ve posle so jegove pesme ne vredo i nešternima nikak nejdejo vu vuha. Tak je negda bilo dok so je ne smel popevati Ban Jelačič ili pak Vila Velebita, a dok je to dopuščeno, posle 1990. leta, unda se je vidlo da ga v tem pesmama ne nikaj kaj bi nekomo smetalo. Tak je i ve z Tompsonom.
Znate kak so se Englezi norca delali z nas i naših labodoritašov predi nek smo jiv pobedili v Moskvi? A ve posle so spustili labodo na zemlo pak nas falijo. Nejbole falijo Luko Modriča: da je on Englez on bi posle finala prinas postal ser, kak je to postal Aleks Ferguson. A mi smo ga na red pobrali i zašinfali kaj si je naručil Tompsona kaj bode jemo i pajdašima popeval.
Kak je to i na sakomo prvenstvo tak so i v Moskvi zbirali nejbolšega labodoritaša na sveto. To Zlatno labodo je dobil naš kapetan Luka Modrič. Si so mo čestitali jedino je Vladek Šeks ostal pri svojemo. Za jega je naš nejbolši vatreni i dale ostal Milan Badel.
Oglasili so se z čestitkaj Zdravkec Mamičov, Ivica Todoričov i Ivo Sanaderov. Rekli so: – Nas Hrvate navek nešči pokrade, navek soci sodijo onak kak nej trelo i to kontra nas. Oni bar razmejo labodoritaše jerbo so i oni, kak velijo, žrtve velike sudačke nepravde.
Javil se je srpski precednik Vučič. I kak je to navek, neje čestital našim dečkima nek je rekel kaj se ustaše falijo da so drugi na sveto, oni so drugi, a mi smo prvi. Mi smo prvi odišli dimo.
Falili so se Francozi kak je jiv mladi igrač Mbape čuda fletneši od Usaina Bolta, nejfletnešega čoveka na sveto. Dok je Bolt to čul mam je doletel na finale v Moskvo. Tam je mel priliko videti Francoza Mbapea. Dok ga je videl mam mo je pobegel smeh i rekel je (ak sam ga ja dobro razmel): – Mora dečec još hajdi žganci pojesti ak me oče dostiči!
Nebrem razmeti nešterne esdepeovce šteri so ne mogli navijati za Vatrene? Tu je posebno glasen bil Neno Stazičov. On je navek navijal za one šteri so protiv nas igrali. I želja mo se je spunila vu finalo. Nekaj si gruntam, pak ak so ne mogli navijati za drugoga bar so mogli za našega Iveka Perišiča. On je bar levak!
Dok so se oči bile vprte v Rusijo i Svecko labodoritaško prvenstvo, esdepe je treneral, prebiral, zbiral i jačal mišiče v hladovini. Mir i tišina jim je ne čuda pomogla kaj bi bili bolši, ali so došli do toga kaj jim niti afrička sliva nebre pomoči kaj bi se zdigli i genuli malo fkrej od Živoga zida šteri jim furt puše v hrbet. Mortik je to zato kaj je afričke slive za Partijo nabavlal Davor Bernardič. Kuliko sam mel za čuti za ovoletno, očem reči, ovo jesensko berbo slivi bodo esdepeovci spremenili nabavnoga (čitaj: jahača na čelo SDP-ove kolone).
Zbogradi labodoritanja malo mi je pobegel v drugi plan naš ovoletni turizam. Čistam je normalno da ga malo meje ljudi na našaj plažaj jerbo so nešterni mesto na morje odišli v Rusijo. Ne bi vam znal reči kak, ali na dnevni red je došlo i Zrče. Nebrem razmeti zakaj so ruon mene pitali, ali šteli so znati je li ga prinas na plaži Zrče jega droge? Jako teško pitanje. To je ruon tak kak da bi ja vas pital je li se v pekarnici more kupiti kruh, je li se v krčmaj pije i je li ga v javnim hižama je kurveraja?
Svecko labodoritaško prvenstvo je donesla hasna grado Čakovco i čakoskim grackim ocima. Duže od mesec dni je nišči ne pital je li bode Mek Donalds došel v Čakovec na Macanovo igrališče i je li se bodo selila teniska igrališča v Golobetko. Ak nišči nikaj ne pita unda je nekak normalno da i čakoski gradonačelnik, Štef Kovačov, odide v Rusijo. Pak ne bode on čičal na Grackomo večo, a svecko prvestvo je v Rusiji. Gracko veče bode još ovo leto bar dva-tripot melo svojo sesijo, a bogzna da bode pak Svecko prvenstvo v Rusiji, a kaj bodo naši Vatreni igrali finale?
V Rusiji se je igralo svecko labodoritaško prvenstvo, a pre prvim sosedima Fincima so se zišli dva nejvekši precedniki denešjega cajta, amerikanec Donald Trump i rus Vladek Putinov. Došel se je Trump zafaliti Vladeko kaj mo je pomogel kaj pobedi na zadjim izborima, a labodoritanje mo je bil sam zgovor. Pravzaprav je to skoristil kaj je dobil kockasto majco od naše precednice Kolinde. Dok je dobil majco je bil srečen kak malo dete. Ve je stopram zazvedil kak so Hrvati jaki v semo čega se primejo, a kaj ne bodemo Hrvatice spominjali. Dok je Trump upoznal Hrvatice mam se je počelo šepetujiti kak je nekak ne v nejbolšim odnosima z svojom slovenkom Melani.
Pripoveda se kak bodemo delali Vidikovca na Mađerkinomo brego v Štrigovi i to skupa z Mađarima. Kuliko vidimo Mađare još navek nekaj v Međimorje vleče. Ali je to čuda bole nek da ga delamo skupa z Janezima. Sosedi z Dežele još navek v spodjaj kišticaj skrivlejo karte na šterima je Štrigova v Deželi. Duže od sedemdeset let so mrckali, ali so na se zadje i dobili Raskrižje, a ve pak kanijo iti dale. Znamo i to da sako noč senjajo Piranskoga zaljeva kak oni zovejo našo Savudrisko valo. A z Svete Gere se nedajo makar je i arbitraža rekla da je ona naša. Poštuvlejo sam ono kaj jim paše. Zato prste fkrej od Mađerkinoga brega.
