13.3 C
Čakovec
Četvrtak, 28 ožujka, 2024

Nekomo je i Lejpa naša obečana zemla, nekomo i prinas presveti sonce sreče!?

[layerslider id=”6″]

Nebrem veruvati da je nešči i to za naše policaji „nepoznati počinitelj“ napal našo narodno vlast. Ali to kaj ja nebrem veruvati se je ipak pripetilo i nešči je napal Plenkijovoga, očem reči, premijerovoga kompanjona, asa z rokava. Najme kaj, nešči je na zagrebečkom pijaco hitil bureka, falaček citrone ili pak skrajčeka sendviča na sabornika Milorada Pupovca. On je je Srbin, ali je več skorom pol stoletja privremeno na poslo v Lepoj našoj. Furt je sabornik jerbo ga jegovi furt zberejo kak najsposobnešega za hantlanje z sim hrvackim strankama i sim koalicijama štere so v ovih malo meje od tridesti let obnašali prinas narodno vlast. Pupavac je podelil vlast z Plenkijom, on mo v saboro drži štajngo i zato je greh „atentatora“ čuda vekši, očem reči, smrtni i ak se ga „atentaror“ oče rešiti mora iti na spoved kardinalo Jožeko (mojemo imejako) Bozaničo. Na zagrebečkomo pijaco je navek čuda ljudi, jeni prodavlejo, a čuda vejč je ovih drugih šteri kupuvlejo, i si so pod video-kamerama, ali gledi vraga, niti jedna je ne poslikala ovoga „atentatora“ na Pupavca. I to je još ne se, slike so tak slabe kaj se nebre niti točno videti kakše je to mrzlo oružje letelo prema političkoj glavici Milorada Pupovca, je li je to bil burek, je li falaček citrone ili pak je to bil zadji griz sendviča?

Tak nekaj smo več meli v Splito, na Poljudo, na labodoritaškom igrališčo „belih ftičov“, torcidinih labodoritašov dok je igrala naša repka i dok je nešči narisal „svastiko“ pred osemdeset kameri, a niti na jednoj je ne ostala slika, a niti pak nikši trag. Ne znati zakaj unda trošimo peneze na kamere ak ne delajo dok nejbole tre? Najgerek sam, jako sam najgerek kaj bode itak od „našeg“ Milorada? Je li bode mel potres mozga(?), je li bode zanavek ostal v glavo vudreni ili mo bode ostal PTSP zbog radi straha šteroga se je navžil i duševnih boli štere je pretrpel jerbo je čakal otkod bode doletela i druga, tretja ili pak štrta granata. Najbrž je to hitil nešterni penzič, šteromo Pupovac žere živce jer sedi na dva stolce, a ne mo je preveč ostalo od gableca kaj bi bil hitil još jeno „granato“. Se je to zgledalo kak igrača, ali dok so naši policaji otprli istrago i zeli stvar vu svoje policijske roke, unda smo si vidli da je vrag zel šalo i da bodo našli krivca ruon tak kak so i našli crtača „svastike“.

Štacuni, štacunari i štacunarke ne morajo delati v nedelo, i na vekše svetke, sam zbog radi kruha jerbo denes več nišči ne je kruha niti v petek, a kamoli v nedelo da je zapovedani svetek i dok je sega drugoga dosti na stolo i v tajero. Trelo bi brzčas malo bole zaluknuti v korpice i kolca pak bi se unda vidlo kaj Međimorke i Međimorci kupuvlejo v nedelo, a kaj Romi i Romkinje? Nesam uspel zazvediti kaj so itak kuhali sosed Imbra, z druge strane vulice, i jegova žena i naša soseda Tilča minulo nedelo, ak sam videl kak je Imbra vlekel z štacuna celi paket šekret papera?

Si smo mi ne za to kaj bi štacuni delali v nedelo jerbo je ipak to Den Božekov, tu se si slažemo, ali nek bodejo štacuni otprti bar malo, bar dve vure. Za saki slučaj ak nekaj sfali. I tu se pak si slažemo.

Nekaj tu ne razmem? Naši težaki odhajajo vum, prinas ga ne posla, a z druge strane k nam dohajajo stranjski delat jerbo ga preveč posla, a nema što delati. Nekak tu računica ne štima? Nekši drugi vrag je tu v pitanjo? Kuliko vidimo nekomo je i Lejpa naša obečana zemla, nekomo i prinas presveti sonce sreče, nekomo počne bolše zutra dok k nam dojde? Neje Lejpa naša tak huda kak pripovedajo oni naši šteri so vum odišli delat!

Mlade smo zaškolali i dali smo jim posla kaj nas bodo oni z krize i nevole vum zvlekli i kaj bodo naprajli bolšo i lepšo Lejpo našo v šteroj bode tekel med (vejč) i mleko (meje) i kaj bodo plače tak velike kaj bodo zdržale celi mesec, kaj bodemo i mi mogli zvezati kraj z krajom i kaj nam bode još nekaj ostalo. A dok bode tak unda bodo i penziči meli od čega živeti. Se to smo se mi nadjali od naših mladih, a oni so hitili puške v kuruzo, repa pod noge i prek meje. Pak smo negdi nekaj zahuzali? Zakaj si naši mladi gruntajo da v Evropi seposot teče sam med i mleko, a dok dojdejo tua ( Nemačka, Austrija, Irska) unda vidijo da je to ne ruon tak kak se pripoveda. A i stranjsko sonce ne greje tak toplo kak ovo naše.

Ak očemo kaj mladi ne bodo več išli vum to moramo po receptlina iti v Uljanik. Zakaj tua? Pak od jif je zadji dvajsti let (mortik i vejč) nišči nikam ne odišel. I nišči je ne došel jerbo so nikoga ne nucali. Ak ne računamo familijo i rodbino!

Den stari ljudi se je najduže slavil i to po sim selima, gradima i staračkim domima jerbo je starih ljudi nejveč. I zato je čuda bole da se delajo starački domi nek zabavišta jerbo so domi furt puni, a zabavišta so na pol prazna. Stari se postaje črez jeden cajt dok čoveko ili pak ženi vreme mine, a deco treba delati. A kuliko vidimo toga lepoga posla se se meje mladih hapljuvle ili pak odidejo vum i deco delajo drugima pak kak bode unda nekaj ostalo od Lepe naše.

Na sam Den starih ljudi so dva pajdaši sedeli na klupici v čakoskomo parko i hitali droptije kruha globima i grlicama. Kak i saki den več par let. Unda so odišli na kavico v kafič de je nejfaleša i tam so se malo pospominali i potračali o Agrokoro, Uljaniko, Plenkijo, Brkičo, Pupovco, Vrdoljako, Šekso, Daličo, Mamičo, Udbi, partizanima, ustašama… kak je več red. Dok je odzvonilo polne pomalem so se zravnali dimo. Dok se prehajali polek čakoske vure poglednoli so kuliko je vur i unda , kak strela z vedroga neba, of bole seri zapita je onoga čelavoga: – Čuj pajdaš, pak mi dva tak več na leta tiramo pajdašijo, hranimo, globe, pijemo kavice, tračamo, a ja opče ne znam kak se ti zoveš? – Je, pajdaš, je, znuom, a za da ti to treba? – zapital je čelavi.

Nedajo se Serjančari doli Priločancima ruon tak kak so niti Priločanci ne šteli biti hujši od  Čakovčancov. Vidli so Priločanci kak pravi gradi imajo v centro varoši semafore, pak so i oni zmislili nekše važno raskrižje i postajli so semafore. Tak da ve i ovi šteri imajo jakše aute, prek dvjesto kojov brez šofera, morajo postati ak sveti vum črleno svetlo. A ve, kuliko čujem, bodo i Serjančari meli semafora tak kaj se ne bi što v Muro otpelal. Te novi auti so tak jaki kaj žnjimi čovek lefko preskoči i serjansko šetnico.

Počelo se navelikom pripovedati kak se naš župan Matija Posavcov ravna v Brisel za našega EU zastupnika. Morem vam reči da se o tomo još nikaj ne pripoveda pre gracki vuri, a niti teca Franca nikaj ne zna o tomo. Kak bilo da bilo, naš župan je odma skočil do Brisela da vidi kakša je situacija i kak tam stojijo jegove EU političke dionice. Brzčas bi nejbole bilo kaj bi Iveka Jakovčiča vrnuli dimo jerbo kak je on močen na jegovo mesto bi mogli poslati dva zastupnike takše kak je naš župan. Tak je navek bilo, čim se je pojavil dim unda se je črez kratek čas pojavil i ogej. Ne tre biti nestrpliven, se bode to pomalem došlo na svoje. Nejpredi župan treba oddelati svoje, očem reči, dojti na listek, a unda nastupamo kaj listeka poštambilamo i spunimo EU putnoga naloga. Saki svoje mora oddelati i se bode tam de mora biti, očem reči, saki bo došel tua de mo je mesto.

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE