7 C
Čakovec
Petak, 29 ožujka, 2024

Neje niti Tončijo lefko

[layerslider id=”6″]

Vnašoj Međimorskoj županiji još navek hercujejo Dnevi vina i to po celomo hataro de raste grozdje od šteroga se posle vino pospravla v lagve, pelnice i požerake naše. Negda so to bili Dnevi vina v Županiji Zrinskih, a ve so se Zrinski potepli, a došli so nekši hedonisti. Kaj god to značilo. Kuliko se razmim v minule cajte dok so na falačko ovoga našega cvetnjaka hercuvali Zrinski oni so pili naša vina jerbo si znamo da so gospoda navek znala kaj je dobro i to so trošili. Ne bi se štel mešati kaj so to hedonisti, mortik je i to nekaj dobroga, ali moram vam povedati da so se čistam zagubili pijanci. Ne mislim da so pijanci oni kaj se nakladnejo i to tak kaj nebrejo hoditi, pak jif je unda tre voziti dimo v japanero ili pak tačkaj, nek so pijanci oni šteri znajo kaj je dobro i v temo uživlejo malo duže nek mi obični smrtniki i znajo malo duže i globleše pogledati v kupice, kaj nem rekel kupičke. Kak bilo da bilo, ali ak smo mi županija Zrinskih unda kak takši moramo meti i svoje dneve vina. Pak nek te hedonisti dojdejo na pijačo v našo županijo, Županijo Zrinskih i morete mi veruvati da nam bode čistam lejpo i dobro kaj bodemo skupa pili, skupa si trenkali i skupa uživali. Mi, Zrinski i hedonisti.

Ovo leto so kupice bile dosti velike i dosti drage. Neje sam tak lefko dati sto kuni za jeno kupičko kak god ona velika bila. Nekaj si gruntam da je nišči ne bajal da mo je kupica ili pak kupička bila premala nek se je točilo nekak čistam malo, kaj malo, premalo vina. Verjem da je to bilo za zdravje sih nas šteri smo hodali okoli ili pak po prečki i sprobavali se te finote kaj so nam se nudile z flaši. Se je to dobro kaj se vinari brigajo za naše zdraviče, ali Tonča je rekel da je nikak ne mogel zapiti teh sto kuni jerbo se je tak malo natakalo tak da je z dvorane v Štrigovi moral oditi v krčmo kaj se malo dotanka kaj ne bode preveč trezen došel dimo. Ak bi došel čistam trezen bi ga žena mam pitala kud se je potepal, kud je lojsal kaj je ne bil na Urbanovo. Još se je Tonča pofalil kak je išel onak usput pogledati sosedo Bariko i kak se potožil da so vinari čistam malo natakali v kupičke. Rekel je: nebrem reči, vina so fina, jako fina, posebno ona Jakopičova, Cmrečnjakova i druga štera so dobila zlatne kolajne, ali kratko trajejo. Soseda Barika kak da je sam to čakala, pak mo je otpovedala: Vidiš Tonča tak ti je i meni z tobom, ti si ruon tak jako dober, ali nekak prekratko traješ. Meni se ti isto zdi da bi to moralo duže trajati. Stopram počnem uživati, a ti si več gotov. Prosim te lepo kaj mojo kupičko, mojo veno drugi pot malo bole i malo duže napuniš, pak nam bode sima lepše. Neje niti Tončijo lefko.

Nebrem reči, se je to bilo lepo složeno i si so nas jako lepo dočakali kam smo se dotepli, ali morale bi nam pre roki biti i nekše finote kaj bi si v kljun hitili pod vino ili pak med vinom. Premalo je cajta hodati okoli iskati i čakati nekše oblizeke, a vino čaka. A dok je se pri roki unda se čovek malo pospomina, nekaj se fčukne, pogledne lepe natakarice i poplavi z vinčekom.

Kak se pripoveda i to navelikom i na glas da bodemo mi Međimorci pak meli svojega ministra. Kak zgledi naš Dobrovčanec Darko Horvatov bode pak minister i to minister gospodarstva mesto Martine Dalič. Pak bodemo mi Međimorci meli svojega koja za trko. Ne znati je li je Darko znal da dok Martini smrkne bode se jemo presvetilo? Što zna, mortik se je nadjal ili pak je senjal. Bole bi bilo da je senjal jerbo znate kak je to lepo da se čoveko ostvarijo senje. Drukam za Darkija makar je sabornik Pupavac ne za jega, ali brzčas bode vejč penez dohajalo v Međimorje čim je on minister kak do ve. Verjem da bode i Darkijov pajdaš Toni zadovolen? Zmislimo se dok je bil minister pre Oreškovičo i Karamarkijo nam Međimorcaj je dobro genulo, a unda je Karamarko zrušil Mosta i cela vlada je pala vu vodo. Ali Darko se neda, on je mladi i žilavi i znova bode zajahal ministarskoga koja. Ovi pre čakoski gracki vuri se več navelikom spominajo kak se nadjajo da bode minister Darko dohajal i v Čakovec, a ne sam v Mursko Središče i Prilok. Čakovčanke i Čakovčanci so najbrž pozabili da minister nigdar ne dohaja sam tak, jega tre pozvati. Kak se zovejo drugi ministri, tak se zove i naš. More on dojti v Čakovec z Dobrave, ali mora iti črez Prilok, a more vjutro oditi v Zagreb na posel, pak unda dojde Zagreba. Znate vi dobro kakši so Čakovčanci, a i kakši smo mi Međimorci, se kaj dojde Zagreba je čuda vredneše!

Pak kaj je Podturenčan Perica Hajdarovič jedini načelnik šteri zavisi od jedne žene v opčini? Kuliko se ja razmem v politiko, kuliko vidim, kuliko čujem jega vejč (grado)načelniki šteri delajo kak žene velijo. Tak je i negda bilo, ali je to ve došlo vum posle Istanbulske konvencije. Se bode to vredo v Podturno, sam sam najgerek, jako sam najgerek, kak bode to k srco zel nejstareši turenski političar Vladek Križajičov. Ak Vladek, nedaj Božek, ne bode sam z svojom družinom z liste mogel dojti na kraj nek si pozove v pomoč Mirjano Turk. Kuliko vidimo Mirjana je Marica za se v Turenskoj opčini.

Ne znati što je dečkima Selnice rekel kak so načelniko Vičevičo ostale buteljke od snimanja Lepom našom i da si jif je Branko Uvodičov pozabil odnesti. I ne sam to, nešči je povedal kak te buteljke načelnik drži v svojoj kancelariji. I kaj se je pripetilo? Dečki so bili ženi, štacuni, krčme, pelnice zaprte, dnevi vina so ne hapili, i kam bo suza nek na oko, a dečki črez oblok po vino v načelnikovo kancelarijo. Najbrž je načelnik to pijačo dobro skril da so jo dečki ne mogli najti. Žeja je, kuliko vidimo, ne beteg, to je vekša nevola.

Saka čast župano i zakladi Vinko Žganec štera pomaže nejbolše i nejvredneše đake, ali naša županija jif škola, davle jim pomoč, a oni več z škole odhajajo delat v Deželo. Nekaj si gruntam da bi trelo bole poštuvati roko štera te hrani, a ne kaj međimorske peneze zememo i pravac k Janezima. Nečemo mi kaj nam bodo ljudi delali vuni, a živeli doma i to oni nejvredneši, očemo kaj bodo prinas delali i prinas živeli. Nešči mora poprajti ono kaj smo do ve zahuzali kaj bodemo mi Falaček zemle i za posel i za živleje, a ne sam za živleje. A mi to moremo i znamo. A stopram naša deca.

Ovo leto so maturanti bili nejfajneši. Mortik je to točno, a mortik tak velimo sako leto. Morem vam reči da so bili jako kredni i da jif je bilo lepo videti. Po cele dneve sam se klataril po Čakovco sam kaj sam mogel gledati te lepe puce štere so bile zlišpane ovak ili pak onak. Mogel sam gledati i dečke kaj mi dopušča Istanbulska konvencija, ali sam si to stavil za drugoč ili pak drugima. Kaj reči, se kaj je mlado je lepo, a stopram ak je školano i lepo blečeno. Nebrem kaj nej hitil oko. Sam bi štel kaj nej te lepe puce odišle vum delat, nečem kaj bi naši sosedi gledali naše lepe puce i jive ritice. Ak so naše nek doma ostanejo, ak smo jif mi naprajli nek unda i bodejo naše. A se drugo bode pomalem došlo.

Čakoski turistički težaki so znova okinčili glavno čakosko vulico. Ne znati što je itak zbiral farbe za te kinče? Zakaj pitam, pak so to takše farbe kak so bile v Splito dok se održaval on Gej Pride šteroga nam je Evropa prodala kak nekaj brez čega nebremo. To so tak rekli kaj mi nej razmeli, ali to je bilo ono dok so se po Splito špancerali geji i lezbijke.

Minuli tjeden je v čakoski šporcki dvorani popeval Marko Perkovič, a žnjim je bil i Tompson, a popevali so skupa z sima onima šteri so došli v dvorano. Ve morejo dvorani Graditelske škole produžiti dozvolo za delo jerbo ak je zdržala Tomsona i jegove pajdaše unda je dobro napravlena. Jako dobro.

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE