[layerslider id=”6″]
Si se spominajo o labodoritanjo pak ne bodem ja valjda hujši, jer bodo si si gruntali da se nikaj ne razmem v labodoritanje. A bar se v labodoritanje si razmejo, si od oni nejstareši do dece v zabavišto. Otkak smo se ne čuli i vidli naši labodoritaši so stali dva velike korake naprej prema sveckaj prvakaj. Nejpredi smo sprašili Maradonine Argentice z velikih tri protiv nikaj (3:0) isto onak kak so Šuker i pajdašija 1998. leta z Čirijom vu Francuskoj sprašili Švabe. Ak se povjest ponavlja, a najbrž se ponavlja, unda nam se i ve kaže nekša kolajna. Znate vejč da mi Međimorci, a i naši sosedi z Lejpe naše, čim pobedimo tri utakmice za redom, več vidimo zlatne kolajne okoli šijakov naših labodoritašov. Tak je i ve, sprašili smo Nigerijo, Argentino, a posle i Islanda i to z rezervnaj igračaj, a ve čakamo Dance. I ak to bode se poredo, kak verjejo pajdaš Tonča i teca Franca, unda bode nas dočakal bolši med Španjolskom i Rusijom. A kak bode to se dale bodem vam spripovedal drugi tjeden jerbo unda bodem pak malo bole spametneši.
Mam posle tekme med Lejpom našom i Argentinom Mesi je, predi nek je kak poparjeni puran odletel v slačionico, štel zameniti dresa z našim kapetanom i nejbolšim igračom, Lukom Modričom. Luka ga je odbil i otpovedal mo je: bodem si zamenil z nekim bolšim.
Čelavi i stetoverani trener Argentine Jorge Sampaoli si je za vreme utakmice z našim labodoritašima skubel lasi. Posle sakoga gola si je slekel jeno baledo z sebe i spuknul pušlek lasi. Ak je več ne mogel pobediti unda se je trelo videti kak lepe tetovaže ima, kak je lepo pisani. Kak detelica. Posle nam je nudil golmana i Mesija za Modriča. I Diego Maradona, negdašji nejbolši labodoritaš na sveto, a ve reklamera kolumbijskoga beloga čaja na sveckomo pijaco, je ruon tak dal glasa za Modriča. Ve bi si šteli Modriča, a on je naš. Naš i Mamičov!
Mesi je ne odišel dimo kak so to naše mreže i portali pisali, ali so zato dimo odišli Švabi kaj se je nišči ne nadjal. A nejmeje oni. Pak je i red da odido dimo ako so ne mogli pobediti labodoritaše Južne Koreje. Na minulomo Sveckomo prvenstvo v Brazilo so bili prvaki i sprašili so se šteri so igrali protiv jif (Brazilce 7:1), a v Rusiji igrajo kak nejvekši paceri, kak da so se prvič zišli, a več na leta skupa igrajo. Mortik jim je premrzlo tam.
Predi nek so naši labodoritaši nagajali labodo z Islandom zišel je cenik naših reprezentativcov, očem reči, labodoritaška burza je dala vum kuliko što vredi od naših labodoritašov. Nejvredneši je Ivek Rakitičov z 50 milijonov ojerov, unda Perišič, Kovačič, Brozovič, Kramarič, a naš nejbolši labodoritaš vredi sam 25 milijonov. No, ve vidite da Luka vredi 25 milijonov, a Mamič ga je prodal za 40 milijonov. Kaj se unda si čudimo, kak picek glisti, kaj mo je Luka moral nazaj nesti 15 milijonov. Te 15 milijonov je bila mešetarska provizija Zdravkeca Maminje. Da se je Luka sam prodaval on bi sikak dobil sam 25 milijoni kuliko so mo skubicerali labodoritaški hantlari.
Nejpredi je dimo odišel naš Mikula Kalinič, niti jemo je ne pasal ruski zrak, za jim so odišli, od nejjakših, Švabi, a dimo je došla i međimurka, Darinka Krička. Potepala se po sveto tri – štiri leti, ali kak zgledi, vrag je došel po svoje i našli so jo v Engleskoj. I Englezi so tak kak jim da puhne, očem reči, kak da veter puše: ve so gospođo Krička poslali dimo, a Ivico Todoriča so zadržali za sebe. Kak zgledi gospođa je donesla premalo penez kaj bi mogla duže v Londono ostati i tam se praviti Englez?
To več i vrapci na jalšama znajo da je 22. junjuša 1941. leta Švabija, očem reči, Hitler napal Rusijo i Staljina, a predi so dve leti bili skupa, pajdašili, pili viskija i votko i spominali se kak bodo sveta podelili. Ali je Dolfi igral z figom v žepo. Neje trpel komunisto Staljina i komunizam, ali je bil preslab kaj bi ga pobedil tak da je zbog jega (Staljina) i Rusije odišel po riti k meši. No, to je još ne se jerbo je na isti den 30 splašenih komunistov v Žabenskoj šumi blizo Siska zafremalo Prvi partizanski odred. Naši komunisti so v semo prvi. Nejso oni znali da i de so to naprajli, ali so posle 1945. leta se zazvedili. Kak i mi drugi. Kajkaj toga smo se pak naposlušali ove dneve, hajdi toga novoga smo pak zazvedili. Teta Ikača, načelnica Siska nam je pak nekaj novoga rekla. Ali je nišči ne rekel istino da je fondoš Lejpe naše ne postavlen 22. junjuša 1941. leta nek 5. augustuša 1995. leta. Več je hajdi let minulo, pak bi istina več mogla dojti na svetlo dneva.
Mam posle antifašizma smo slavili Den državnosti, zmislili smo se na 25. junjuša 1991. leta da je naš Hrvatski Sabor rekel zbogom negdašjoj Jugi. I to zanavek. Makar je to državni svetek, malo je ljudi došlo na glavno proslavo. To je nejglavneši svetek v Lepoj našoj, a tak malo ljudi dojde. A ne dela. Razmem one šteri so se ne još vrnuli z Brezovice (oni ionak još ne živijo v Lepoj našoj), ali kaj je z sima drugima? I kakši je to Den državnosti da ne vupamo vum deti državne zastave? Ve ne znam je li pozabimo, nemamo ili pak je nekši drugi vrag v pitanjo?
Mi v Lepoj našoj slavimo Den državnosti, a oglasil se je Borut Pahor, precednik Dežele. Lepo nam je rekel kak za jif arbitraža vredi i kak oni i dale računajo na Piranski zaljev. Nikaj jega ne sekera to kaj je to naš hatar i kaj ga mi ne kanimo dati. Janezi bodo tak dugo lagali i bavkali da je Savudriska vala jiva dok to ne bode postalo istina. Se kaj jim paše oni si zemejo i seposod se dogovarajo z drugima za našim hrptom o našoj zemli i našemo morjo kak zahrptni delavci. V morje se rivlejo, a Sveto Gero so ne vrnuli. Ne žuri jim se nikaj jerbo se mi Hrvati jako slabo kcoj držimo. Zmislite se sam Raskrižja, 1918. leta je Korošec počel pripovedati kak Raskrižje i Štrigova pripadajo Deželi makar je unda tam ne živel niti jeden Slovenec, a niti pak niti jedna Mojca. Ali, pak so nam z Srbima delali za hrptom i si znamo da so nam pred 25 let uspeli Raskrižje otpelati v Deželo. Mortik bi oni bole noreli za Štrigovom, ali ve nemajo cajta jerbo jim je Piranski zaljev na prvi mesti. Dragi Božek jesi nas zmogel za sosede!
Lani so Čakovec, Čakovčanke i Čakovačnci preslavili 50-letnico otkak je negdašja opčina Čakovec (denešja Županija) dobila Urbanističkoga plana. Od unda so se sakefele hiži, fabrike, štacuni, neboderi, škole, igrališča počela delati po nekšemo redo i Čakovec je postal jeden od lepših ak ne i nejlepši mali grad v Lepoj našoj. A i širje. No, toga Urbanističkoga plana je nešči hitil nekam v komoro ili pak v ropotarnico povjesti tak da se vejč hajdi let te plani mejajo kak komo paše ili pak kak što plati. Brez bilo kakšega reda. I kaj bode po takšemo zišlo z Čakovca? Postal bode selo ili pak mehana! A komo to paše? Pak o tomo bi gracki oci morali voditi brigo. Oni bi morali držati do toga kaj bo Čakovec ostal onakši kašega so naprajli urbanisti. Ali politički vrag nigdar ne spi! Ve se si spominamo kak je Mek Donalds dal pismo namjere kaj bi delal restorana na Macanovomo igrališčo i več je gradonačelnik dal spremeniti urbanističkoga plana. A još se je pismo namjere niti ne prehladilo v gracki upravi. Na drugoj strani so čakoska Matica Hrvatska, Družba „Braća hrvatskog zmaja“ Zmajski stol Čakovec i Zrinska garda Čakovec dali predlog čakoskim grackim ocima kaj bi se na Fratarskomo trgo postavil kip Blaženomo Alojzijo Stepinco kak spomen na Euharistijski kongres šteri je na tomo Trgo bil 1935. leta, ali o tomo se več leto dne ne raspravlja. Brzčas so hamburgeri važneši od blaženika Stepinca? A i čuda so bolši ak se pečejo v centro Čakovca. Ruon tak kak je i sklizalište nejbolše ako ga pazi Orao!
