309[layerslider id=”6″]
Čuda se je Čakovčancov i Čakovčanki zišlo na reslino glavnoga čakoskoga trga šteri se je stisnul polek sklizališta. Tak nas je čuda bilo kaj smo zgledali kak natiskani. Seposud okoli se je točila pijača tak da je najbrž nišči ne ostal žejen. Igrali so dečki z Lejpe Naše, nekša grupa štera nema prošlost i pred šterom je budučnost, a zovejo se Tragovi. Ne znati de so jif itak našli čakoski turistički težaki? Lepo so igrali i još lepše popevali sam, kak zgledi, so ne znali da so došli v Međimorje, a tu živijo kajkavci, jerbo so furt popevali: Što ne pije Međimurac nije… Vatromet je bil lepi, svetešji, kaj se za čestitko nej moglo reči. A dosti nas je čakalo čestitko, a posle smo se našli na šanko kaj smo si namakali nezadovolne dušice.
Se okoli Trga se je nudilo i kuhano vino. Brzčas sam ne mel srečo jerbo sam naletel na kuhano vino vu šteromo ga ne bilo vina. Se ostalo je bilo nutri. Bar sam se ne mogel napiti. A žena je donesla još jeno rundo kaj nebom žejen, a ostal bodem trezen. Veli, da dok si preveč spijem delam gluposti. Ako morem, ak pak ne unda sam preveč prepovedam. Kak i ona makar si nikaj ne spije.
Na čakoskomo grackomo dočeko je delalo i sklizalište, ali se je nišči ne sklizal, nišči se je ne štel došklizati z stare v novo leto. Dosti ga bodo nasanjkali naši političari čim se vrnejo na posel!
Z početka Adventa se je navelikom, nejpredi šepetujilo, a unda i na glas pripovedalo (ne moram vam niti reči da so prvi počeli čakoski klošari pre gracki vuri) kak bode Nives Celzijus međimorska, očem reči, novakoska sneha. Nešterni so tak dauko dišli kaj so se spominali za zaruke i to sam zato kaj je nešči negdi videl Nives i Markija kak so se držali za roke. Na se zadje je zišlo kak je Nives nucala advokata kaj jo i jenoga Dinija Drpiča rezdvoji od stola, postele i gruntovnice. Štela je sprobati kak to mladi advokati delajo! Teca Franca je na to rekla: Jožek, pa kaj se je tej zmešalo, pak ti ne vidiš da je Međimorje premalo za se ono kaj Nives oče, a i za jene obline, a či noge reširi, kak to ona zna i more, bodo joj strčele prek meje.
Nebrem nikak zazvediti kaj je to v Živomo zido kaj se lepše i frčneše žene tua ido? Da je soseda Barika odišla v Živi zid, kak je, na herodeševo, obečala brzčas bi se i ja spravil kaj bi iskal luknjo vu tomo zido!
Još razmem da naše žene živijo duže od nas moških, ali zakaj i punice?
Ak imate radi kolače, a nečete se zdebljati, unda jif ječte z boticama, kak Kinezi!
Tak je to odnavek bilo, navek je roka roko hmivala, a ak so roke bile dobre vole unda je i obraz došel na red. Ali ne navek. Ak se zmislite, neje to bilo tak zdavnja, na početko decembra, Međimorski labodoritaški savez, očem reči, članovi precedništva i precednik Mato Kljajić so zdigli roke za to kaj bode Davorček Šukerov još jen mandat precednik. I Davorček je to ne pozabil i Mato Kljajić je zebrani v Izvršni odbor Labodoritaškoga saveza Lejpe Naše. Tre znati da se, i za koga, roka zdiže. Mortik bodo ve i Međimorski labodoritaši dobili viziperta za 2.ligo?
Došel je naš turistički minister, bodul Gari Cappeli, v ophode k nam v Međimorje. Neje mogel k sebi dojti dok je videl kaj se imamo i kaj se znamo zvenodjati mi Međimorci. Neje mogel veruvati da je v Lepoj Našoj takši „Falaček zemle“, takši „cvetnjak“ de furt i navek cvetejo rože, a tak je dauko od morja. On se toplo nadja, a za to je donesel i nekše peneze z državne kase, kaj bi se još nekaj od toga zlišpalo i zbegecalo, tak kaj bi naši ljudi, očem reči, naši Međimorci, ostajali tu na ovomo nejlepšemo falačko zemle na sveto, v „rajo na zemli“ kak to lepo veli monsinjor Đurek Kovačov z Hraščana, i kaj ne bi morali odhajati prek meje v beli svet i to ne z želocom za kruhom jerbo kruha imajo dosti i doma, nek za ojerima i frankima šterih ga doma ne. Bar ne kuliko bi mi Međimorci šteli i nucali.
Si šteri dohajajo v Međimorje se čudijo kak navek gombamo da imamo nejmenše plače, a oni vidijo da imamo nejveč mercedesov i beemvejof. Kuliko vidim, ve bodemo morali dovleči istino na sunce i ve se bode zazvedilo kak na leta šparamo v štomfama, strožokima i dujhama i z tem penezima kupuvlemo velike aute. Kaj nej zaplesnivili.
Zakaj je naš župan, Matek Posavcov, ne štel biti minister, a nudili so mo? Zapital je župana na Županijski skupščini, vječnik Tonček Marodi. Župan je lejpo pojasnil da mo je domača fotelja važneša od ministarske. Što bi rekel, pak on je jeden od retkih šteri si, ne sam tak grunta nek je i tak napravil. Nejte me krivo razmeti, pak kaj je vredneše biti župan ili minister? Župan veli da se dela kaj bode nam Međimorcima bole, a da je dišel za ministra unda se nej naši državni penezi zastavljali pre Štromaro vu Varaždino nek bi plavali prek Drave. A de bi nam unda bil kraj, čuda smo naprajli z našimi penezi, a kak bi stopram se cvelo da bi dale delali z ljuckima?
Županiska skupščina je zebrala novo poverenstvo za ravnopravnost spolova, očem reči, za ravnopravnost nas moških i naši ženi. Nebodete veruvali, a nesam niti ja mogel dok sam prvič zazvedil, v poverenstvo je devet (brojkicom: 9) ženi. Jedna fajneša od druge. Pitam vas ja, ne sam vas nek i sebe, da bodemo pak mi ravnopravni ženama ak smo to do ve ne bili, a ve smo cugle vlasti dali v ženske roke. A to so one iste roke štere trdo držijo mlinčeka dok malo kesneše dojdemo z krčme. Zna župan, znajo večniki kaj delajo? Tu je gospon Tonček Marodi nikaj ne rekel? Pak bode župan moral hoditi v beli Zagreb grad, k ministro Štromaro, štečit peneze kaj kupi i zlišpa jeno štiri – pet sigurni hiži kam bodemo mi mogli oditi spat dok malo kesneše dojdemo dimo, a potna lesa je zaklejena, pes puščeni i zvonec (dok ga nejbole nucaš) ne dela.
Nebrem razmeti kaj se županijski večniki imajo spominati o čakoskomo nadvožnjako ak ne kanijo dati peneze kaj se popravi. Ak je nadvožnjak čakoski unda nek to rešavlejo čakoski večniki i čakoski gracki oci. Ali ak je županiske večnike strah dok se pelajo prek nadvožjaka jerbo se krše unda nek idejo po drugomo nadvožjako šteri se bole drži ili pak prek mosta. Ne tre pehati ak ne kaniš nikaj pomoči.
V Središčo na Muri so se zišli naši međimorski policaji i Janezi, policaji z Dežele, kak i sako leto, par dni pred fajruntom. Hitili so staro kapo v Muro jerbo je i leto bilo staro i spili so šampanjca. To z šampanjcom se je vidlo, a ono dok je tekla graševina se je ne vidlo, ali se je čulo: Daj po Muri vino teklo mesto kalne vode… V Središčo i v Gorčano je tak bilo, a v Savudrijski vali i v Piranskom zaljevo so se naši policaji i Janezi gledali prek nišana. Što bi rekel za Deželo, tak mali falaček zemle (par mekoti), a Janezi tak drčni ljudi i to sakefele?
Navelikom se pripoveda kak se bode vrnul v politiko Karamarko, mortik i Sanader, pak unda i Zoki Milanović. Najgerek sam, je li bode to na pamet palo i Slaveko Liničo? Ali on nema čas, saki den premeče peneze štere je zaslužil z svojih pet prsti i malo soli v glavi. Dok sam to povedal teci Franci ona me je mam zapitala: A kaj je z Štefekom (Mesičom) i Jožekom (Manoličom)? Mam sam joj i otpovedal: Teca, pak oni so ti nigdar niti ne odišli z politike!
