[layerslider id=”6″]
Minuli tjeden smo se rezišli posle kak smo pobedili labodoritaše Danske i krenuli prema Sočijo na vuglede domačim labodoritašima Rusije. Dugo smo se prepravlali za domače labodoritaše, a i oni za nas. Kajkaj toga se je čulo, prepovedalo se je kak nam je domaći precednik Vladek Putinov nudil kaj nam vrne Konzuma ak pustimo utakmico, ali to sam vam več rekel, ali posle nam je nudil i plina onak gešenk za celo leto sam ak prepustimo jegove labodoritaše. I mi smo jif prepustili, ali črez prste. I na se zadje smo mi odišli v Moskvo, a oni so ostali doma i neje jim nikaj drugo ostalo nek da navijajo za nas. Zakaj za nas? Pak mi smo jif zadji pobedili!
Znuom da ste ne pozabili, ali smo ruske labdoritaše ne uspeli pobediti niti posle 120 minot labodoritanja. No, nejso niti oni nas. I kak je to bilo i protiv Dancov, pak so se strelali elveri. Pak smo mi meli bolše strelce i bolšega golmana. Naši so zabili štiri elvere, a Rusi tri, naš je golman obranil jenoga elvera, a jenoga elvera so Rusi vritnuli polek gola. I tak dok se je se delo na kup i dok se je se skubiceralo naši so odišli dale. Nebrem, a kaj ne bi rekel kak je zadjega elvera pak rital naš Ivek Raketa i kak ga je pospravil v isti kot kak i Dancima. I to onak mrtvo hladno kak da igra za svojo vulico na prvenstvo svojega grackoga kvarta. To morejo, morate priznati, sam veliki igrači. A da je Raketa veliki igrač to je pokazal i dokazal jezero pot kak dok igra za našo državno reprezentacijo tak i v Barceloni. Pak je ne on zabadaf naš nejvredneši labodoritaš, vredi prek pedeset milijonov ojerov.
Kuliko sam mel za čuti od pajdaša i jenoga od trenerov v našoj labodoritaškoj vrsti , Dražena Ladiča, naši labodoritaši i za tekmo protiv Englezov trenerejo elvere. Za saki slučaj. A kuliko znamo do tripot Božek pomaže, a zakaj ne bi to skoristili dok smo v Božekovoj cukor piksi. Treba igrati dok te karta ide.
Furt je pripovedal naš izbornik Zlatkec Daličov, a unda so to isto govorili i naši labodoritaši, kak nej bilo vredo da so se potepali po celoj Rusiji, a kaj ne bi na krajo vidli i Moskvo. To bi bilo isto tak kak da dojdete v Rim, a ne vidite Papo. Ali naše labdoritaše je v Moskvo vleklo nekaj drugo. To kaj so oni došli v Moskvo je značilo da i dale ostajajo v trki za labodoritaškoga prvaka sveta. Dok bodete čitali ovo moje premišlavanje vi bodete več znali je li so naši pobedili Engleze i da igrajo vu finalo ili pak bodo igrali za tretje mesto. Za ve znuom da bodo vu finalo igrali Francozi, a pred našim dečkima je još tekma protiv Englezov. Mi znamo da smo bolši od Englezov, da bole naritavlemo labodo, ali to još moramo pokazati i dokazati na igrališčo. Isto onak kak smo to dokazali protiv Danske i Rusije. Makar bodemo pak strelali elvere, makar bodo nas pak zvlačili Subašič i Raketa, ali je nejvažneže kaj bodemo znova igrali v nedelo v Moskvi i to za nejbolše na sveto. Ve dok smo več tak dauko došli bilo bi škoda kaj nej stali još te dva korake, te dve štenge i zeli ono kaj nam se nudi i zakaj smo se prepravlali.
Dvajsti let je minulo otkak so Čiro Blaževič i jegovi „sineki“ osvojili tretje mesto na Sveckomo labodoritaškomo prvenstvo vu Francuskoj i ve je pravi cajt kaj bode nešči bolši od jif. Nebrem reči dečki so bili super, od Ladiča na golu, Jarnija, Bobana, Prošinečkoga, Šukera, Štimca i jivih pajdašov , ali bilo bi lepo kaj bi ovi naši Vatreni ve naprajli i korak dale. Kaj nek vam velim, kak bi to bilo lepo da mi nejpredi sredimo Engleze, a unda vu finalo vrnemo duga Francozima šteri so nas pobedili v polufinalo pred dvajsti let. Kak bi to bilo lepo. To mi je i teca Franca pošepetnola čim so Belgijanci zgubili tekmo.
Kaj vam nek rečem, ak mene pitate Englezi znajo da so slabeši od nas i niti se ne ravnajo vu finale. Pitate me, zakaj si tak gruntam? Pak v nedelo dok se igra finale Sveckoga labodoritaškoga prvenstva je i finale tenisa vu Vimbledono i dok so jim rekli kaj bi finale preselili na pondelek oni so to ne šteli naprajti. Otpovedali so: pak kaj bomo selili, pak ne igrajo naši vu finalo! Kuliko vidimo oni nekaj znajo kaj bodemo mi stopram zutra navečer zazvedili. Nigdar je ne prekesno za dobre vesti.
Verjem da je lepo biti labodoritaš v reprezentaciji Lejpe naše na ovomo Sveckomo prvenstvo, ve dok jim se ide od noge, se pobeđuvlejo što jim se najde na poto, dok jif si falijo i dok jim cene rastejo na evropskoj i sveckoj labodoritaškoj burzi. No, kaj ne bodete mislil da jif si falijo jerbo se Englezima to nikak nebre pripetiti. Oni falijo sam svoje i nišči nebre biti bolši od jivih igračov. Zutra se bode i tu pravica skazala!
Mortik ste si ne gruntali o tomo kak so i prek koga se naši labodoritaši došli v Moskvo. Nejpredi so prešli prek Nigerije (2:0) štera ima prek 181 milijon stanovnikov. Morete si misliti kuliko ga tu labudoritašov vejč nek ga nas v Lepoj našoj sih skupa (4,5 miljonov). Posle Nigerijcov smo sprašili Argentince skupa z Mesijom (3:0), a jiv ga v Argentini prek 44 milijonov. Za Island se nemamo kaj spominati, oni so pravo pravcato čudo. Na Islando živi 350 jezer Islanđanov i oni so se kvalificerali na Svecko prvenstvo predi od nas, ali smo jim to ne pozabili i pobedili smo jif (2:1) i kak prvi v grupi smo odišli na nadigravanje z Dancima (4:3), a Danska je malo vekša od nas i ima 5,5 milijonov stanovnikov. Elveri, Subašič i Raketa so nam privoščili Ruse kak protivnike šterih je 144 milijonov. Prešli smo i veliko Rusijo (6:5), a v Moskvi smo dočakali Engleze šterih je cirka 57 milijonov. Kuliko vidimo dosta smo toga prešli i moremo reči da to kaj nešči ima vejč stanovnikov ne znači da i bole labodo riče. Da je po tomo mi i Islanđani nigdar ne bi vidli Svecko prvenstvo.
Švapske novine Bild so deli Lejpo našo na prvo mesto kak nejbolšo šporcko državo na sveto (makar smo jif ne pobedili v Rusiji, odišli so dimo predi nas) ak se zeme v pamet kak smo velika (ili kak smo mala) zemla, kuliko stanovnikov imamo i kuliko se jif bavi z športom. Mi smo mali, a pokazali smo da se i z malim morejo čuda naprajti. Jedino još naše žene v to ne verjejo.
V ove dneve dok traje Svecko labodoritaško prvenstvo, dok naši dečki idejo z pobjede v pobjedo, lepo je poslušati radio i se te navijačke pesme. Kak one od pred dvajsti let tak i ove nove štere naši glazbeniki kleplejo. Lepo je biti Hrvat, srečni smo kaj smo Hrvati. Ne znati kaj je z nama Međimorcima? Istina je da furt ima svoje delegacije po Rusiji, da drukamo kaj se se praši, ali još smo nit jeno pesmo ne spopevali. Nebre tu biti v pitanjo naš međimorski jal jerbo smo si mi z Hrvatima odnavek zdobra. Od stoletja sedmog, ak ne i predi. Popevlejo si od dece do penzionerov. Ali morem vam reči da ga je i onih šteri nebrejo navijati za Vatrene, nebrejo se veseliti, nebrejo nikak prežvekati te kockaste. I te jive pobjede. Nebrejo, makar so tu od 1991. dišejo ovoga našega zraka, služijo i trošijo hrvacke kune, a sploh jif nekaj vleče nazaj v ono državo z šterom smo se zdavja rezišli
