[layerslider id=”6″]
Ljudi moji je li se je to pravzaprav pripetilo znova bi se of tjeden zapital naš negdašji šporcki spiker Mladen Delič i to mam posle čim je naš labodoritaš, privremeno v deri v Realo, Luka Modrić, osvojil Zlatno labodo i to v Parizo. A si znamo da je Pariz glavni grad Francoske štera je prvak sveta v labodoritanjo. Oni so prvaki sveta, očem reči, nejbolši na sveto i priznali so pred sima nama, pred celim svetom i pred Ajfelovim turnom da je naš čovek Luka Modrić, Dalmoš z sela Modriči polek Obrovca, nejbolši labodoritaš na sveto. Znate i sami kak jim je to teško palo i da nigdar nej to naprajli da so ne morali, očem reči, da je Luka ne pravzaprav nejbolši. Luka je nejbolši labodoritaš naših „Vatrenih“, nejbolši je labodoritaš Reala, nejbolši je bil na Sveckomo prvenstvo v Rusiji, ovi naši z UEFE so ruon tak rekli da ga ne bolšega od Luke, a posle toga je Luko preglasila nejbolšim i svecka labodoritaška udruga FIFA i kak sam več rekel naprajli so to i Francozi i dali so mo Zlatno labodo. Se kaj se je moglo dobiti ovo leto se je dobil Luka i kak unda nešči more reči da si je ne zaslužil? Pak da si je ne zaslužil ne bi mo to se bili dali? Pak jif je on ne nikaj prosil! Nebremo niti mi v Lepoj našoj reči da smo mi i brez Luke mogli tak dauko dojti. Dok ga čovek vidi tak maloga, tak hiravoga i slaboga, skorom kaj bi moral gvihte v žepaj nositi kaj ga nej veter nuhal dok hoda po sveto, ne bi nigdar rekel da to se more z labodom naprajti i to nejbole od sih. Kaj reči, vesel sam kak vušive gače kaj je i tua Zlatna laboda došla k nam v Lepo našo i to Luki v roke. Najbrž bi si Luka moral najti nekšega tekliča šteri bi mo nosil se te pehare, se te želencije i se Zlatne i druge labode štere je ovo leto dobil. Moramo deti roko na srce i priznati kak nas je Luka razveselil v Rusiji dok so naši Vatreni išli mic po mic i dosmickali so se vu finale.
Luka je napravil to kaj mo se je poklonila cela Lejpa naša, cela Španjolska, cela Evropa, celi svet i kaj je nejvažneše natiral je Francoze kaj so mo pleskali i žnjim popevali. I to v Parizo. Što je još to napravil i da – to te ja pitam?
Mesi i Ronaldo so nekak zazvedili (pak je nekša udba mela tu prste) da bode Modrič odnesel Zlatno labodo, pak so ne niti došli v Pariz kaj je ne lepo. Neje lepo kaj ne poštuvlejo pajdašai kolego šteri je ovo leto, štero pomalem, ali sigurno ide krajo, bil nejbolši. Ne čuda, ali malo bolši od jif. Sam veliki ljudi i veliki športaši morejo priznati drugomo da je negda bolši. Još si imamo na pameti kak so naši Vatreni pobedili Mesijove Argentince, a i Ronaldijovi Portugalci so čuda predi odišli dimo nek so to kanili. Kaj reči, ipak so Vatreni i Luka ostali v Rusiji do zadjega, pak unda i to nekaj vredi. Ronaldo bi moral priznati da nigdar v Realo nej zabil tuliko golov da mo je Luka ne dodaval labode i to kak, tak kaj je ne mogel fulati gola. Lefko je Ronaldo zabival da ga je Luka šopal z labodaj! A ve je ne došel v Pariz kaj bi mo čestital i zafalil.
No, nejso niti si naši ljudi veseli kaj je Luka nejbolši labodoritaš na sveto. To su oni šteri so niti ne šteli kaj bi mi išli v Rusijo. Oni so predi naše tekme z Fincima poslali Luko Modriča i Dejana Lovrena na sod v Osijek. Lovren i Modrič, skupa z Daličom, bili so jakši od sega, i od soda i od orjnunašov i pobedili smo i Fince, posle i Ukrajince, a na se zadje i Grkljane v repesažo i to nam je bilo dosti za Rusijo. A kak je bilo v Rusiji to si znamo i to nebremo i nesmemo nigdar zabiti. Ali znate kak je bilo dok so naši labodoritaši došli dimo, kak jif je dočakalo cirka milijon ljudi po celoj Lepoj našoj, ali oni šteri još navek živijo v Jugi i štere nikaj hrvacko ne veseli te so se postajli na zadje noge dok je Marko Perkovič Tompson popeval Lepa li si i Gene kamene za naše Vatrene. Vidite, te isti se denes ne veselijo kaj je Luka dobil to Zlatno labodo, oni nikaj nebrejo strpeti kaj je lejpo i dobro za Lejpo našo i za naše športaše i labodoritaše. Te isti so gombali dok so naši tenisači, skupa z našom Nikolinom Sobočancovom postali svecki prvaki v teniso. Što bi rekel da ga je prinas takših ljudi šteri nečejo dobro Lepoj našoj i nam Hrvatima. A jega jif. I to čuda vejč nek si vi to morete pregruntati. Malo bole se obrnite okoli sebe i mam jif bodete spazili. Mortik jif ne bodete mam prepoznali jerbo hodajo po sveto z figom v žepo.
Čistam mi je čudno kaj se je ne oglasil vodeči „seljak“ Krešo Beljak kaj bi zazvedili kaj si itak on grunta o Modričovoj Zlatnoj labodi. Si znamo da je on nejbole hrumel kontra Tompsona dok je popeval Vatrenima, a bolelo ga je to kaj so naši bili skorom nejbolši na sveto. Nešterni ljudi to nebrejo nikak precerati, a ruon tak nebrejo kaj to nej i drugima rekli.
Duže od tri leti je trelo kaj so čakoske gracke vure pak počele kazati točno vreme. No, nejsam baš siguren je li je to po cele dneve ili pak sam dva pot? Znate kak je to i vura štera stoji dva pot na den pokaže točno vreme!
Minuli tjeden smo meli priliko čuti i videti na televiziji pučko braniteljico Lejpe naše, Loro Vidovič, štera nam je govorila o tomo kaj je vekša kaštiga ili nevola za se nas, pozdrav „Za dom spremni“ ili pak črlena petokraka zvezda? Ne znati od koga ili pak čega nas brani Lora, ali ona je bole leva i bole črlena od esdepeovca Nenada Staziča ili kaj ne bodemo spominjali teto Ikačo, gradonačelnico Siska. Da sem ne čul na svoja vuha ne bi veruval, mladi ljudi pak tak levi. Ali ona več ima dosti let i ta leva euforija je pre joj več trebala hejati.
Ve okoli toga Dneva borbe protiv nasilja nad ženama, je Štefa došla na posel z velikim podočnjakom, očem reči, z plavim okom. Si so jo sam gledali i nišči je ne vupal nikaj pitati. Posle se je vidlo da joj fali i jeden zob, a i čoba joj je bila natečena. Več je gablec bil čistam blizo i žene so nagovarjale Imbrija, jenoga šefa: Šefe, šefe, dejte pitajte kaj joj se je pripetilo? I šef je jeno vreme zdržal, a dok se je Štefa genula od mašine i sela za gablec, Imbra je došel kcoj i sel se je k joj: Štefa, znaš kaj, ne me brige kaj ti se je pripetilo, ali štel bi znati od čega ti je oko plavo i de si zgubila zoba? A i žene so radovedne. – Znate kaj, šefe, of moj je fčera predugo ostal v krčmi, pak sam išla po jega. Tam je bil z pajdašijom, a ja sam ga dimo tirala. Jeden jegov pajdaš, zdi mi se daje to bil Feri, mo je rekel: Tonča, kaj bo ona tebi klafurila i zapovedala, dej joj po fanfuli. Čim sam ja to čula, prijela sam se doli med nogami, a on me je žvajznul po lampi. Nesam kanila dojti denes na posel, ali mi je bilo žal kaj ne bi stimulacijo zgubila za of mesec, a sam par dni je do kraja meseca. Bo to splahnulo, sam si namazala z drožđenkom.
V Doljnjemo Kraljevco se imate sam ak očete delati. Tam si morete posla najti v Tehnixo z dobrom plačom, a ak doma još i deco delate v Kraljevco dobite 4000 kuni za sako dete, a još k tomo ga morete ostajti v novomo zabavišto. Brzčas mladi morajo zeti stvari vu svoje roke i prijeti se posla. Kak je to lepi posel dok se deca delajo, a k tomo još se imajo za deco. Kuliko vidimo Kraljevčani ne bodo morali hoditi po težake v Mađarijo, Bosno ili pak Srbijo kak drugi šterima nema što delati!?
