[layerslider id=”6″]
Znova se je počelo rovariti de je završilo onih deset milijonov (sam deset?) ojerov štere je MOL dal Sanadero kaj jim je Ivo prepustil INO. Oni šteri navek se nejbole znajo so najbrž zazvedili kak bode Ivo, na se zadje, ipak zbegel pravoga rešta posle ovih potepanja od Remetinca do Salzburga i ak se nikaj ne bode naprajlo on bode te pneze hasnuval.
A to so naši penezi jerbo so Mađari zvlekli z naše INE čuda vejč penez nek so dali. Ak je tak, a tak je, unda je red kaj se bar te dvajsti milijoni vrnejo nazaj v državno kaso i ak bode treba unda bodemo žnjimi splatili plače težakima v Uljaniko. Te MOL i tua INA to so dve velike pikse z pekmezom i v jimi ga bilo hajdi političkih prstov. Političari morejo biti srečni kaj v pekmezo ne ostanejo tragi. Da ostanejo unda bi se bilo jasneše.
Unda bi se znalo da je mađar Hernadi držal pikso i žnje su vum vlekli si poredo: Ivo Sanaderov i jegov pajdo Robert Ježič, unda se je tu nekod zmogel Ivijov brat Vlado, a oni so meli Flavia Sanadera v Švicarski de so se zgubili tragi penezima. Ivo je odišel, a Zoki je došel tak da je unda Zokijov pajdo Siniša Petrovič dale vodil brigo o INI-nim i MOL-ovim penezima.
Vrag bi ga znal što je tu se mel prste i v čijim se romarima so bile vreče z ojerima. Ali kuliko vidimo vrag nigdar ne spi i počel je pregajati Hernadija, a čim se reši glava ribe unda i se drugo (čitaj: si ostali) dojdejo na red. Hajdi je onih šteri ne spijo mirno. Jedino Ivo spi mirno, on je kak foringaški koj, več se je privčil na se. Bil je i v Rusiji na tekmi i tam je zijal: Soci lopovi… Olakšal si je dušo, a bilo mo je i topleše pre srco.
Kaj vam nek rečem, labodoritaška laboda je okrogla, ali ne za se jednako. Što bi rekel da bode jednoga dneva i Zdravkec Mamičov opal prek labode i da bode ona i jega prevarila makar žnjom pajdaši več prek 50 let, a čudapot je i žnjom spal. Vidite kak je to zišlo? Teca Franca bi rekla: vidla žaba kak potkavlejo koja pak je i ona zdigla nogo.
Pravzaprav štel sam vam reči kak so uprave Hajduka i Reke vidle kak Dinamovci sako leto prodavlejo igrače, i to dosti drago, a posle toga još bole igrajo, kak doma tak i v Evropi, pak so i oni to probali, ali jim baš to nejde od roke. Držijo se doma slabo, Hajduka sam jedva našel na prvoligaški lojtrici, a v Evropo morejo sam prek Bregane i to z pasošom.
Kuliko vidimo niti med labodoritaškim cvetjom ga ne pravice. Očem reči, ak se čovek oče z nekim baviti unda se v to mora razmeti. Mamiča smo v rešt natirali, pak nam je odišel na malo dukši urlab v Međugorje, ali kuliko vidimo i Marijica je na jegovoj strani tak da bodo Dinamovci najbrž igrali Ligo prvakov.
Sako zlo za nekše dobro, Zdravkec se je vugnul pak ve vedrijo i oblačijo oni štere je vučil i ostavil. Meli so đaki dobroga navučitela, pak jim zato ve i dobro ide. Ne bi se štel zameriti Hajdukovcima i Torcidi, ali oni furt nekše krive dopelajo. I još nekaj: ne znam zakaj tak fal prodavlejo svoje labodoritaše? Pak nek jif prodavlejo prek Dinamovci, v Zagrebo su čuda dražeši.
Da čovek ne poverje, minister Tolušić je poslal šekutore i inšpektore v Dalmacijo kaj sprekontrolerajo z kakšim mesom Dalmoši hranijo naše turiste. I morem vam reči da so našli dosti mesa brez paperov. Niti je dragi Božek ne znal kak je to meso došlo ili pak doplavalo v Dalmacijo. Očem reči, mesa ga bilo, i to sake fele, ali ga ne bilo dosti paperov i vizipertov. Kuliko sam mel za čuti nešternima je Božek paketa poslal.
No, kaj se čudimo kaj je meso ne melo papere, pak prinas po morjo plava hajdi Muslimanov šteri ruon tak nemajo papere tak da je najbrž to meso brez paperov bilo i za jiv dopelano. To se je tak i skorom skompenzeralo (tu so Dalmoši maheri), ali dok so inšpektori došli do odojki, pajceki i prasci brez paperov unda je se vo vodo palo. Najme kaj, si znamo da Muslimani ne jejo odojke i pajceke.
