[layerslider id=”6″]
Minuloga pondelka se je hapil ov pravi jesenski mesec oktober. Bilo je čistam lepo vreme, čuda lepše nek to zna biti vu to doba, tak lepo kaj smo još ne niti morali kuriti. Skorom saki pajdaš šteroga sam zišel mi je čestital. Dok sam spituval kaj mi to čestitajo sam so se na smeh držali i rekli: dobro ti znaš kaj je denes! Neje mi se žarulica presvetila pak sam teco Franco pital kaj mi to pajdašija itak čestita. – Ti bedak jeden, nikaj ne znaš – rekla je teca – pak denes ti je Den starih ljudi. Malo mi je nos opal kaj sam ne znal, ali sam mam otpovedal: – A, zakaj unda vam, teca, ne čestitajo? – Ne znajo da sam još živa!
Ne znati je li bo ili ipak ne bo davanje glasa predi reda v Lepoj našoj? Plenki bi nas znova se postrojil, dal bi nam klajbase v roke i poslal bi nas na posel kaj na papereke napišemo kaj si gruntamo, očem reči, pital bi nas kak v Sneguljici hmanja kraljica, što je itak nejbolši v Lepoj našoj i komo treba dati cugle vlasti v roke. Napravil bi on tak da bi znal da bodemo jega znova zebrali? On zna za nas kak mi dišemo i kaj bodemo naprajli, ali ne zna kak dišejo jegovi hadezeovci. Zna za one leve šteri se ne križajo predi obeda jerbo jive žene dobro kuhajo i ne hodajo k meši, ali ne zna za one druge bogoboječe. Zna Drašek (makar je ve več ne Drašek, nek Draš, kak se je razgajbal) od čega muhe crkajo, kupil bi on i jif kak je to napravil z Vrdoljakom, Pupovcem i pajdašima, ali ovih je preveč i poštejaki so, pak preveč koštajo. Znate vi to, to sam vam več rekel: poštejaka ruon tak muoči kupiti, ali tre pošteno i platiti. Napravil bi Plenki novo davanje glasov da bi znal za koga jegova desna roka i potprecednik Miljan Brkič pravzaprav navija.
Ve vidite da je nam v Lepoj našoj ne lefko zebrati prave političare šteri bodo z nami hercuvali? Pak smo i zadji pot dvapot hodali glase davat i na se zadje nam je vun splaval Drašek Plenkovičov i jegovi apostoli. Jen čas smo si gruntali kak smo dobro zebrali, počeli smo se dugov rešavati, BDP je počel rasti, a unda so vum došli INA i MOL, pak Agrokor, a ve, na se zadje, so na svetlo dneva splavali brodi z Pule i Reke tak da smo v kratkom cajto hajdi peska (čitaj: kunici) hitili črez oblok v morje. No, to smo si premagadili i to nam je ne prvič, ali unda je vum došlo kaj so nam političari i saborniki kak deca i to ona menša. Ve so glavni spominki, kaj nem rekel trači, vjutro na žganički ili pak kavici, što je komo i zakaj kakšo sms poruko poslal. Jeni so pošiljali sms poruke zaprav, a drugi so jif zmišluvali. Ne znati kak smo zebrali ruon ona šteri so se kak deca ne dosti igrali z mobitelima jerbo ga unda mobiteli još niti ne bilo pak jim je tua želja ve došla vum. Nigdar mi nej palo na pamet da je muoči od sms poruki biznisa naprajti? Ali kuliko vidimo denes saki drač bole i fletneše raste od pšenice. Poglednite sam partizanko, nišči jo ne seja i sam raste de gud je je mesta, a porine se kak robača v rit. Prekfčera je došel na žganičko k Juliki sosed Joža, moj imejak, i pofalil se je kak je prek sms poruki posvadil našo vulično pajdašico Đurđiko i jenoga šoca Imbrija. Znuom zakaj je to napravil? Bil je jalen jerbo je Đurđika jemo (i jedino jemo) korpico dala, ali kak je to napravil to me još navek žere? Pak je Joža nigdar ne bil bogzna kak spameten? Pak što zna je li bi zbavil šegrtijo da je mama ne nosila navučitelima jejci, sira, vrhje, piceke, odojke, a ve on zna z mobitelom posvaditi ljude. Teca Franca mi je rekla: Jožek, pak kaj si z tem glavo tereš, pak nekomo se rezbistri dok je mladi, a oni kaj imajo albanske svečice, kak Joži, pamet dobijo (kakšo-takšo) dok Abraham mine. Najbrž je Joža z ove druge polovice sela?
Ve se je zazvedilo da je Zdravkec Mamičov prek sms poruki prodaval našega i sveckoga najbolšega labodoritaša Luko Modriča, očem reči, prek moba je liciteral ceno. Još se je zazvedilo da ga je Mamič prefal prodal, očem reči, Luka je preveč penez Zdravkeco nazaj znosil jerbo je ispal čuda vredneši nek so ga nejpredi Englezi, a posle Španjolci platili. Morete si pregruntati kak so se tukli po glavaj „splicki beli tovari“ ve dok je Luka postal nejbolši laboritaš na sveto, a oni so ga ne šteli zeti med „bele ftiče“ dok so ga Zadrani ponujali za drobne peneze. I to domače! I tak je Luka, niti kriv niti dužen, ostavil birke i koze štere je pasel po Velebito i odišel v beli Zagreb grad i oblekel si je robačo plavo… Dale se znate do dneva denešjega. I tu je zišlo onak kak v Bibilji piše: Kamen šteroga so hitili fkrej splicki zidari postal je glavni kamen v Maksimiro. Da jim se to bilo zadji pot ne bi „beli ftiči“ bili čistam doli na prvoligaški lojtrici z pogledom na Drugo ligo.
I kaj ve nek ja znuom štere so prave sms poruke, a štere so šlaprtki v dopisivanjo moje štrte sosede Štefice i mene. Kak ve nek znuom štero mi je poslala ona, a štero mi je jalni sosed Pišta podlečil. Dok smo zadji pot skupa na kaučo brojili birke, dospomenuli smo se da mi bode Štefica na svoje sms poruke metala i slike kaj bom znal štere so jene: dok me bode Štefica štela sam pozdraviti unda mi bode poslala srčeko, a dok bode mela cajta i voljo za mene i mojega Jožeka, unda mi bode poslal mačkico. Ne bodo ovi sms političari posvadili mene i Štefico? Pak ne bodem si ve ja, vu tem letima, svojega veša pral na roko, makar nemam čuda, a Štefičina veš mašina dela kak singerica makar več nema garancijo. A kaj se ne bodemo za centrifugo spominali.
Vladek Šeks još navek vedri i oblači z našim političkim nebom, ali ne bode več dugo jerbo se je zazvedilo kak ne zna pisati sms poruke, a šofera nema. Vreme ga je pregazilo, očem reči, tehnika i tehnologija, ali on zna od čega muhe crkajo pak je još navek na flašici. Kak navek teca Franca zna da mora dojti, pak je tak i ve došla i navuka mi dala. Rekla je: Vladek zna da se po onomo kaj on drži vu svojimi flašicami pamet dobi, pak je zato on več skorom tridesti let naš nejspametneši političar.
Da bi se Vladeka Šeksa pitalo nigdar Luka Modrič ne bi bil nejbolši labodoritaš na sveto. Za Vladeka je i dale nejbolši Milan BADEL!
V Međimurjo si je v zadjih leto dni posla našlo prek 400 Romi. Tak bar naši policaji velijo. Nega bilo drugih! Naši školani so vum odišli želocom za ojerima (kruha so dosti i doma meli), tak da so gospodarstveniki morali zeti one šteri so ostali doma i šteri se nudijo. Ve se nek naši sosedi Romi skažejo, nek delajo onak kak so delali dok so hodali brat kalampera, tikve, mrkvo, luka, zelje… na Mamičino. A znate de je Mamičino? Tam de ga navek nečesa je!
Lepa naša je več pet let v Evropi, a Evropa nam još navek davle peneze, kak je to lepo teca Franca rekla, šakom i kapom. Nebomo ve tu pripovedali kak nam davle naše peneze, ali ipak davle kak god steška. Naše opčine, gradi i županije se falijo kak čuda penez dovlečejo z Brisela na of hatar Lejpe naše. Da bi se, ipak, zazvedilo što je nejveč penez dovlekel posla so se prijele agencije i mediji tak da smo i mi zazvedili kak so največ penez z EU potegli gradi, očem reči, gradiči Križevci, Ludbreg, Trilj, Vinkovci, a med pravim gradima na čelo kolone jaše Zadar. Štel sam vam sam reči da se naši čakoski gracki oci falijo kak čuda penez dohaja v gracko kaso zvuna, ali sam jif hajdi dauko na listini ne našel. Morem vam reči da je lani pedeset gradov z Lejpe naše ne poteglo niti kuno, očem reči, ojera. Ne znati kaj čakajo. Najgerek sam je li je Čakovec med temi ili pak je med onima šteri so ipak nekaj dovlekli. Verjem da so Čakovčanci i Čakovčanke ipak nekaj „herbali“ z Evrope, ali na tem poslo tre čuda bole i fletneše delati kaj se ne bi penezi zdošli. Pak si znamo kakša je Evropa, dok se joj neka zdigne ona zapre pipo, a do 2020. leta za nas v Lepoj našoj je prepravleno još nekaj vejč od deset milijardi ojerov. Mortik so tam prepravleni i penezi za čakoske vanjske bazene? Najgerek sam de so na te lajtrici Priločanci i Serjančari?
