15 C
Čakovec
Četvrtak, 28 ožujka, 2024

Kaj se pripetilo?

[layerslider id=”6″]

Marjan Hanžekovič je naglo hmrl, a dok je bil živ si so govorili kak je on „alfa i omega“, oliti „kralj ovrhi“. On je, kak smo rekli, hmrl, ali ovrhe idejo dale. Preveliki so to penezi za fiškale kaj bi se toga posla sam tak i to prek noči odrekli, kaj znači da je Marjan bil sam jena karika v lanco ovrhi. Mortik malo jakša ak znamo kuliko je kil mel i kak je lepo lopošnato zgledal. Tu mislim na one karike štere so služile, a ne na one karike štere so gulili. Još je 320 jezer građanov Lejpe naše zblokerano, a to je, dok malo deco zememo fkrej, cirka deset procentov. Cela vojska ljudi šteri so došli v škarje ovrhi i nikak nebrejo vum pobeči. Nebrejo vum jerbo peneze nemajo. Pomalem plačajo duge, a kamati i stroški čuda fletneše rastejo. A nebrejo oditi vum v Deželo, Osterajh, Dojčland, Irsko kaj bi tam služili peneze, a tu plačali duge. Nebrejo dok ne platijo. A malo je onih kaj dobavlajo na kladionicaj ili pak lutrijami. I ovi naši ovšeni sosedi nosijo peneze v kladionice, ali sreče ga ne dosti, bar ga ne dosti za se. Zna se što furt i navek dobavla v kladionicaj? Gazda! A si mi drugi tu i tam, negda ili pak nigdar.

Si znamo da so još zdavnja Ivek Račanov i Slavek Liničov prodali prvi frtalj INE MOL-o i pobrali prvo pinko, a posle je došel Ivek Sanaderov pak je to tak v INI se porihtal kaj so Mađari mogli hercuvati kak da so sami gazdi v toj, još navek, napol našoj fabriki. MOL je skupa z INOM dobil i rafinerijo nafte v Sisko. Jen cajt je delala, a posle so jo zaprli. A ve nikak nečejo, niti pod milim bogom, kaj bi jo znova otprli. Rekli so da jim je dosti komunizma jerbo je v Sisko gradonačelnica Kristina Ikić Baniček, z como zvana „teca“ Ikača, štera se još navek pozdravla z negdašjim pozdravom „Smrt fašizmo“. I velijo, dok se spremeni vlast v Sisko, a neje se mejala od 1945. unda bode znova tekla nafta v sisačko rafinerijo.

No, nejso partizani sam v Sisko, ve so se pojavili, kak strela z vedroga neba, i v Opatiji i tam  održavlejo Dneve antifašizma. Ne znati je li so došli i fašisti ili pak so se zišli sam antifašisti. Jeni brez drugih nebrejo. Mortik so te partizani i antifašisti došli z Reke jerbo tam se je, ruon tak, ne spremenila vlast od 1945. leta. Si znamo kuliko je let minulo od Drugoga rata? Vejč od sedemdeset, a partizani još navek živijo i iščejo svoje neprijatelje. Kuliko vidimo si hmirajo, sam partizani živijo zanavek. Ve bodo i v Opatiji pak blesikale zvezde petokrake protiv šterih smo se borili od 1991. do 1995. I one živijo zanavek! A mortik so to opatiski partizani organizerali za svoje žene kaj jif imajo kam otpelati za jif Den?

Čim je došlo na svetlo dneva to kaj se bodo v Opatiji (ne znam zakaj ne v Sisko?) održali Dnevi partizana i antifašista, na drugoj strani se je otprlo novo Ministrarstvo za davanje dozvoli za korištenje pozdrava „Za dom spremni“. Zafremano je je, sam se ne zna da bode počelo laufati! Kuliko sam mel za čuti, još nemajo dozvolo za delo!?

Nigdar kraja v ovoj jedinoj nam domovini, Lepoj našoj, partizanima i ustašama, a naši braniteli z Domovinskoga rata so tijam na tretjemo mesti. Ali dok se ne rešimo petokraki v Lepoj našoj ne bode mira, reda i pravice. Ak bi naprajli lustracijo čuda onih kaj ve vedrijo i oblačijo bi odišlo v ropotarnico povjesti i to z cugom brez povratne karte, očem reči, zanavek. Vidli bi unda kak bi se leži dihalo i kak bi sunce ober Lejpe naše čuda lepše i topleše svetilo. Več bi se jempot i to zanavek moralo znati da je Domovinski rat fondoš Lejpe naše i da so ga naši branitelji zafremali, a ne partizani. Kaj so to ovi v Opatiji i v Sisko još ne zazvedili. Pak je i Glina i dale naša!

Si morejo prinas se reči kaj očejo: Pernar, Vrdoljak, Jakovčič, Picula, Teršelička, Rudanica, Ante Tomič, Pupovac, Lovrička, Pusička, Frljič, Neven Stazič, Ivo Josipovič, Bernardič, Maras, Bulj, Stipe Mesič, Šeks, teca Ikača…, sam sisački biškup Vlado Košič nesme. Neje da on ne veli, ali čim nekaj reče mam si skočijo v zrak ili pak se zdignejo na zadnje noge i navuke mo davlejo. I to je još ne se, kak je nadbiškup Bozanič poslal biškupa Košiča ruon v Sisak de još partizani držijo cugle vlasti vu svojimi rokami?

V minule dva tjedne so se v Lepoj našoj pripetila dva svecka čuda. Jedno malo vekše, a drugo malo menše. Ovo vekše čudo je bilo to kaj so se si, od Iloka do Konavla, čudili kak v zimi sneg ide. Teca Franca je rekla: čudijo se kak picek glisti. I još nekaj, z tem snegom došla je i „polarna zima“. I to ne bilo kakša jerbo je par jutri bilo i minus 17. Dobro ste prečitali, polarna zima od minus 17. Dok je tak v Rusiji oni se koplejo. Dejte si malo pregruntajte, kaj bi se pripetilo ak bi se nešterni moški falil med ženami da ima „mrcino“ od sedemnajst centimetrov. Sfučkale bi ga i v krej od jega se obrnule. Ak je to ne bar 25, unda je ne mrcina! Pak je tak i s zimom. Ak ne pokajo drevja od zime unda je to ne polarna zima!

Drugo svecko čudo se je pripetilo v našoj Sabornici. Naš međimorski sabornik z Živoga zida, Branimir Bunjac je govoril v praznoj Sabornici, očem reči, govoril je praznim stolcima jerbo so saborniki ne došli na posel, zeli so si fraj dneva. I to si isti den. Imajo dobroga sindikata šteri jif je tak dobro z organizeral. No, neje ruon Sabornica bila prazna, poslušal ga je precednik Sabora Goran Jandrokovič. Morete si sami pregruntati kakši bode hasen od toga govora?

Čakoski hadezeovci so nigdar ne držali cugle gracke vlasti, nigdar so niti ne bili blizo. A čim so ne bili blizo vlasti neso mogli biti niti blizo grackoga komunalnoga poduzeča Čakom štero se, osim grobja, briga i za naše čakosko smetje. Ali to je ne zabrenzalo čakoske gracke večnike, Leksija Makovca i Jožeka (mojega imejaka) Zorčeca kaj pomorejo komunalcima i smetlarima kak bi se smetje čim bolše i spametneše posprajlo tua de mo je mesto. Oni očejo kaj bi se bio otpad šteri nam ostane v kuhji dok kuhamo obeda, a toga se fala dragomo Božeko, dosti najde, mam meljal i pošiljal v kanalizacijo i unda bi ga ovi na prečistačo prijeli i posle bi ga otpelali na pole kak gnoja. Probajte se zmisliti da smo još negda, pre nekaj vejč od tridesti let, počeli na poslo nucati rezače otpadnoga papera. Negda smo počeli, a ve je nekak čistam normalno da se to mom zreže, tak ga je leži posprajti, a i posle ponucati ili pak skuriti. Tre se ono kaj je spametno mam pustiti v promet, unda mortik ovi z Revice, Podbresta i Vularije ne bodo morali mulja voziti Zagreba.

Furt i seposod se pripoveda kak naši ljudi, očem reči, mladi ljudi, spametni i v punoj snagi odhajajo vum kak bi došli do bolšega i vrednešega kruha kak je of naš međimorski, kuruzni. To si pripovedajo, a nišči ne veli kaj moramo naprajti, i što, kaj več ne bodo odhajali. To kaj mi bodemo brojili kuliko je otkod odišlo, otkod meje, otkod vejč, to jif ne bode vrnulo nazaj, očem reči, z te mele se kruh ne bode jel.

Jožek (još jeden moj imejak) Gajski, profesor za malarijo v Graditeljskoj školi, bode napisal knigo za malare i malarijo kaj se več ne bode farbalo i malalo kak što oče, očem reči, zbrda zdola nek onak kak Božek zapoveda. Več nas ne bodo malari farbali kak do ve i več ne bodo vu farbe vlevali mleko i trli jejci. Najbrž bode v te knigi pisalo da se i kulkopot smejo farbati tuneli na autobano. I kak se farbajo jejci za Vuzem?

Verjem da ste čuli kak je naš čovek, naš Međimurec, Ernest Fišer, šteri je na leta delal kak gastarbajter v Zagorjo, očem reči, vu Varaždino, odišel v penzijo. Velijo da čovek odide v penzijo kaj si počine od onih 40 – 50 let kuliko je delal. Ali naš Erni je ne takši, on je pisal dok je delal, a i ve piše i još si z pisajem nabivle iberštunde. Ne da sam piše nek i knige izdavle. Još jempot se je pokazalo da je ne gotovo dok je gotovo neg dok nešči drugi reče da je gotovo. Nek Erni sam dela, nek piše, a mi ga bodemo čitali (i pročitali) čim najdemo cajta. Brez zamere, prosim!

Pred trileti so Japanci bili v Čakovco i v Staromo grado so popevali ono pesmo Mikule Zrinskoga z šterom se mi štimamo: U boj, u boj. Pred par dni so došli znova malo pogledati Čakovca i Staroga grada i ve bi šteli kaj bi Zrinska garda došla v Japan. Dečki z Garde so jif malo prepelali po Čakovco, Šenkovco i Kuršanco, a nejbole so jim se dopale ceste po Čakovco. Furt su gombali, kak da molijo Oče naša: sama jama, sama jama….

Sim ženama i onima kaj se tak osječajo, po Instanbulskoj konvenciji, želem srečnoga jivoga dneva!

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE