[layerslider id=”6″]
Labodoritanje je nejvažneša mejevredna stvar na ovomo sveto, očem reči, kak se to štacunski veli, nejvažneša sporedna stvar na sveto. To je šport v šteri se si razmijo, si se znajo i o jemo se spominajo po cele dneve, a stopram ve dok se igra Svecko labodoritaško prvenstvo i dok naši labodoritaši pobeđuvlejo se po redo. Posle kak so završile tekme po grupaj odišlo je dimo pol reprezentaciji, a naši Vatreni so ostali. Posle se odigralo još jeno kolo i pak jif je pol oni šteri so ostali odišlo dimo, a naši so pak ostali. Kaj reči, znači da nekaj vredijo čim smo ostali med osem nejbolši na sveto. Kak je rekla teca Franca: Do ve smo štiri pot pobedili, još tripot i zlatna želencija bode naša, naši Vatreni bodo nejbolši na sveto. Ak smo do ve mogli pobediti štiri pot unda moremo još i tripot, pak tri je navek bilo meje od štiri. Kak god teca ima več prek devedeset, ali zna kaj govori, a v labodoritanje se odnavek razmila i to bole od pokojnoga teteca Ferija šteri je bil prva špica v selskomo klubo.
V minulo nedelo smo pobedili smo pobedili Dance, bilo je jako napeto i teško. Igralo se 120 minot i unda so se strelali elveri. Naš golman Šubašič je obranil tri elvere i danski golman je obranil tri elvere, ali so naši bili vredneši, pak smo mi ostali tak da nas ve čakajo Rusi. Posle nedelne pobede javil se z Međugorja gazda našega labodoritanja, Zdravkec Mamičov, i sima je čestital od prvoga (Zlatkeca Daliča) do zadjega (Rakitiča), a posebne čestitke je poslal Luki Modričo i Dejano Lovreno: – Dečki, dužni ste mi još po jeno rato. Labodoritanje je jeno, a penezi so čistam nekaj drugo! Kuliko je Zdravkec dužen poreznikima saka kuna mo dobro dojde!
Znate kaj so to društvene mreže? To je plac šteroga imajo sam oni šteri imajo Interneta, a to je plac de saki more reči se kaj misli, makar nikaj ne zna i nikaj ne misli. To so najbrž oni šteri doma nesmejo nikaj reči, pak unda punijo mreže z svojimi štikleci. Te i takši so fljučkali po Modričo i Lovreno posle presode na sodo v Osjeko. Neje lefko zdržati se te hračke i neje se lefko hmivati saki čas dok te nešči fljučne. A fljučkalo se je non – stop, kak po dnevo tak i po noči kak da te šteri hračkajo i fljučkajo opče ne spijo. Ali kaj so te tobož spametne glave več fljučkale to so Modrič i Lovren bole igrali. Z tem kak so igrali so sema pokazali kak so napravleni od dobroga i trdoga materijala i sam zato morejo tak dobro i tak dugo igrati. Kaj god bode što rekel, pak zato so i ovi v Evropi vidli kaj je to za igrače i zato jif je „gazda“ Zdravkec tak dobro prodal!
Mesi i Argentinci so na se zadje ipak, posle Švabov; odišli dimo sam smo ne za to mi krivi nek so jif spakovali jivi prvi sosedi prek debele vode, Francozi. Dimo so odišli i Španjolci. Jif so spakerali Rusi i to tak kaj so jim složili tekmo v nejmrzlešemo grado pak je Španjolcima bilo zima igrati, očem reči, zmrzli so se. Kaj se more, saki igra onak kak more i zna. Kuliko znamo da so Rusi prek zime i v rato pobeđuvali.
Skupa z Švabima so dimo odišli naši sosedi Srbi. Ne znati za koga ve navijajo naši zemljaki šteri so još niti jeden den ne preživeli v Lepoj našoj jerbo još navek živijo i plačejo se za Jugom. Čul sam jeno par kaj bodo v nedelo drukali za Ruse sam kaj bodo kontra Lejpe naše i naši Vatreni. Za Lejpo našo jif nikaj ne veže i nikaj jim ne znači v živlejo. Da čovek ne poverje, od stoletja sedmog smo jo senjali, a ve dok jo imamo ve se žje zbrčkavlemo. A dok glediš tekmo moraš za nekoga drukati, nebreš gledati tekmo kak drveni svetec jerbo ti bodo pive ostale. Čim dojdete k nešternoj hiži štera nema črleno-bele kockaste majce i zastavo črleno-belo-plavo unda znate kuliko je vur!
Verjem da si znate da ve naši Vatreni igrajo z Rusima. Što pobedi bode ostal med štiri nejbolše repke na sveto. Ruski precednik Vladek Putinov je mam poslal ponudo: Vi nam pustite utakmico, a mi (čitaj: Sberbanka) vam vrnemo Konzuma. Ne znati kaj bode na to rekel izbornik Dalič jerbo kak more on ve i Ruse dimo poslati ak so oni več doma?
Moramo biti pošteni i priznati da za se to kaj naši labodotitaši pobeđuvlejo v Rusiji moramo zafaliti i lanjskomo izborniko Tončeko Čačičo. Da je on ne bil takši, bole nikši, nigdar Zlatko Daličov ne bi niti podehnul trenersko klupo Vatrenih, nigdar ne bi on vedril i oblačil z našimi labodoritaši. Da je Tonček ostal naši labodoritaši ne bi niti vidli Rusijo, a mi se doma ve nej živcerali pred telkačima. A kuliko bi nam stopram pivi ostalo, kaj nem čevape i kotlete spominjal.
Ipak je jempot i naša državna televizija došla na svoje. Naše labodoritaše gledi vejč ljudi nek je do ve gledalo se naše televizije skupa. To kaj dečki z državne televizije, makar sam na drugomo programo, prenašajo se tekme z Sveckoga prvenstva jim je jako veliki plus tak da smo jim oprostili i to kaj so zahuzali Ligo prvakov. Kak je to lepo, sediš pred telkačom, sanduk z mrzlaj pivaj je polek tebe, a dečki igrajo. Či ga pivi meje oni bole igrajo. Ve dok so Vatreni pobeđuvali pivo je teklo potokima. Ne sam potokima nek i požerakima. Kuliko sam mel za čuti bormeš je niti jeden ne presušil. Nejsam tu mislil na potoke nek na požerake. A da je negdi v sanduko bilo premalo flaši, to je brzčas bilo.
Si mi pratimo prvenstvo i labodoritanje, pak i naši političari. Saki od nas ima svojega nejbolšega igrača. Tak so novinari pitali večnoga političara, Vladeka Šeksa, šteri se navek nejbole zna, što je itak za jega nejbolši naš labodoritaš? Otpovedal je: Milan Badel, zna se!
Naši „kockasti“ makar i v črno-plavaj kockaj tak dobro igrajo kaj nas falijo i oni šteri nas nebrejo videti. Na Fejsbuko se posle glatke pobede od 3:0 protiv Argentine, očem reči, protiv Mesija i pajdašov, pojavila čestitka soseda četnika na tečnomo srpskomo: Ustaše, majku vam j…m, svaka vam čast!
Posle velike pobede na penale protiv Danske dečkima je v slačionico došla čestitat i precednica Kolinda Grabar Kitarovič kaj se dečkima jako lepo vidlo. Kuliko sam mel za čuti pre čakoski gracki vuri ak bi nekšom greškom naši labodoritaši zgubili od Rusije, kaj je nemoguče, kaj se niti Rusi ne nadjajo, v slačionico bode jim došla Anka Mrak Taritaš. Pak si nek mislijo.
Si smo zatelebani v labodoritanje tak da so i meni nešterne važne stvari pobegle kaj je ne ruon za pofaliti se. Na den da so naši Vatreni sprašili Argentino z 3:0 naša čakovčanka i gospodarstvenica, fajna Nikolina Babič, je postala precednica Hrvackoga teniskoga saveza. I to jednoglano kaj znači da so si bili za jo. Moramo deti roko na srce i priznati da je retko da nešči z Međimorja glavni v Lepoj našoj za bilo kaj, nesme pozabiti Stevico Tkalčeca šteri je glavni gimnastičar v Lepoj našoj. A Nina je to zaslužila. Čim je ona prijela teniske cugle vlasti vu svoje roke mam so Marin Čilić i Borna Čorić osvojili turnire. I to one jakše. Si se mi žnjom štimamo, a nejbole jeni japa Lojzek Sobočancov, cirkovljančan, šteromo je to bila nejlepša čestitka za jegovo 77.obletnico rođenja. Oprosti Nina kaj si tak dugo čakala na red, ali kak smo rekli na početko labodoritanje je nejglavneša sporedna stvar na sveto.
