15 C
Čakovec
Četvrtak, 28 ožujka, 2024

Jo je je? Je jo je!

[layerslider id=”6″]

Ve so i naši labodoritaši zazvedili da je laboda okrogla i da je se drugač dok si ne v Božekovoj cukor piksi. Neje tak zdavnja bilo, minuli so sega tri meseci, od da so naši Vatreni igrali finale Sveckoga labodoritaškoga prvenstva v Rusiji. Istina bog, zgubili so i zato so mesto zlatne dobili srebrno želencijo. Posle toga nebremo nikoga pobediti. Igramo to Ligo naroda i pajdaške utakmice, ali nam nekak nejde. Z Portugalom smo zigrali 1:1, posle smo fasovali od Španjolcov 6 komadi, a kaj smo ne vritnuli niti jempot na jiv gol. Z Englezima smo v Reki odigrali nikaj-nikaj, a posle toga smo jedva na jedvite jade pobedili slabe Jordance i to komaj 2:1. Kaj reči, naši dečki so navčeni da dok je nerešeno unda se posle igrajo produžetki i strelajo penali, a pozabili so da je to sam na Sveckomo prvenstvo. Brzčas dok to zazvedijo bode se došlo na svoje.

Dok so čakoski, očem reči, međimorski labodoritaši vidli kaj naši Vatreni morejo zgubiti 6:0 i nikomo nikaj, pak so si i oni dopustili luksuza pak so zgubili v Dugomo Poljo polek Splita 4:0 i to od nejvekših bokcov v Drugoj ligi. Kak zgledi naši so dečki išli tua onak lefko bodemo mi to rešili i več so si v Čakovco zapisali tri bode, a unda so jif Dalmoši sprašili tak kak šmrklivce.

Lidija Bačič je on minuli tjeden popevala v Nedeliščo i to na Mesapo. Bila je čistam slabo oblečena, bole kak bogica. Krpici ga bilo dosti, bile so male, ali so bile napete kak šprih, a kiklica čistam kratka i pahetala je. Ali ako se je čovek v prvomo ili drugomo redo malo bole prignul ili pak počučnul mogel je videti da ima gačke i to takše, kaj so več otkrivale nek skrivale. Samo je jarček bil pokriti kaj se nej prehladila. Kak bilo da bilo, ali da je ne mela gačke kak god male to bi pravi moški (šteri so ne bili prehlajeni) v prve štiri rede i po duhi poznali.

Kaj ne bo nešči rekel da mi Međimorci sramotimo svoj „Falaček zemle med dvemi vodami“ dok odidemo vum prek meje. Ne, nas seposod očejo jerbo se znamo prijeti sakoga posla i znamo se priložiti. Tak vam je i naša vum lepa Ema Kovačova odišla v Evropo kaj pokaže kakša je lepota zrasla v našemo Horvackomo cvetnjako. Kam god dojde, de god jo vidijo seposod moški zdehavlejo, a žene so joj jalne. Ovi v Evropi so spametni i takšo lepoto denejo kaj prodavle spodnjega veša tak da se se vidi kak je dragi Božek lepo sklesal jerbo ove krpice spodnje jako malo toga skrivlejo. Dok jo je pajdaš Tonča videl na televiziji, globoko si je zdehnol, dva tri je na eks vu se vlejal i priznal je da bi štel biti podna pločica v jenoj kupaonici.

No, nejso naše dekle (čitaj: pucke) sam lepe nek se razmejo v posel za šteri se primejo. Tak je i naša Tončika Ružičova z Revice nejbolša v teniso v Evropi, a još nema niti 16 let. Saka čast Punčeco, Piličo, Ivaniševičo, Čiličo, Čoričo, a tu so i Martička i Vekička, ali ve dok naša Tončika sam još malo zraste bode pometala po sveto kak po svojemo Reoskomo dvoro. I unda nek nešči reče kak smo mi Međimorci sam za lopato, motiko i tačke, a žene kaj bodo frfljale i rovale vu vrčako, nek si poglednejo Tončiko (i Emo) sima se steplejo gače dok jif zglednejo. I ne sam gače.

Javil se je gospon šteri je napal Plenkijovoga pajdaša Milčija Pupovca. Priznal je da mo je hitil frtalico citrone, predi jo je pošteno scedil v čaj, i to sam zato kaj mo je Milči zavađal ženo. Stari švaler. Kam bo mo oko bežalo nek na fajno i frčno domačo ženo i Milčijo je ne važno kaj je ona ne jegova. Veli srditi mož da je to bilo se. I drugomo bi to napravil i to je ne melo nikše veze z politikom i političarom Milčijom. Gospon je Milčija niti ne poznal, stopram je posle zazvedil na koga je roko zdigel, očem reči, koga je gađal z frtalicom. Da ga je poznal i da je tu zmešal politiko brzčas bi mo hitil celo citrono. Sa je sreča kaj čoveka ne muoči politika i kaj ne zna što kuliko vredi na ovomo našemo političkomo nebi.

Spituvlejo me ovi dečeci pre čakoski gracki vuri kaj velim na to kaj naš minister za peneze kani podražiti cigaretline, alkohola i benzina. Ne razmem toga čoveka: pak kaj on kani naprajti z tem kaj bode to se podražil? I kaj on od toga očekuvle? Oče on kaj bodemo mi i dale pušili, pili i kaj se bodemo i dale vozili ili pak nas oče v trcko deti kaj bodemo živeli brez sega toga? A od čega bode on unda svojo kaso napunil. Kaj se mene dotikavle, cigaretline more podražiti kuliko oče jerbo ne pušim. Z alkoholom more isto naprajti jerbo ga ne pijem, pijem sam gemište (vejč) ili pak pive (čuda meje). Mortik bode me malo dočakal z benzinom, ali sam prvi mesec, a unda se bodem prifčil. Ne zna Zdravkec kaj nam Međimorcaj nikaj nebre, mi smo tu gde smo je i na se strane imamo sosede šteri to se pri sebi imajo faleše: Mađari ili Janezi ili pak ovi v Osterajho. Ne moramo se pariti z sosedima z Lejpe naše ak se oni nečejo z nami. Sam ga pitam otkod bode on punil kaso ak bodemo mi po se kaj nucamo hodali prek meje. Mortik niti ne bodemo morali hodati, dopelajo nam ovi naši šteri si več tam kruheka služijo. Kakši je to političar kaj si nikaj ne premisli? Bole nikši! Pak kak bi mi Međimorci preživeli z nejmenšaj plačaj v Lepoj našoj da nej bili premazani z sim maščama? I da si nej bili zdobra z sim sosedima?

Kuliko čujem, a i teca Franca mi je to pošepetnola tak kaj sam jako dobro čul, da težaki v Uljaniko ne bodo dobili plačo. I več gori. Skačejo težaki, skače uprava, skačejo sindikati, skače župan, skače gradonačelnik… Mortik još nešči skače, ali je velika stiska (kak na mileniski sliki) pak se niti nebrem v pamet zeti. Si mi bi morali dati po jenoga ojera kaj bi se nabagljalo. Do ve so dobavlali plače, a kuliko so delali? Je li so si zaslužili plače to sam dragi Božek zna makar se niti on nebre restrgati. Oni to nebrejo veruvati kakši smo mi Međimorci, mi delamo po 5-6 meseci i unda dojde jedna i to ne bogzna kakša plača i mi smo veseli kak vušive gače i delamo dale. A Istrani, čim je jedna plača v pitanjo, oni so nervozni, skačejo v zrak i ravnajo se v štrajk. Ve morejo štrajkati, ve imajo čas, turisti so odišli dimo. Jako sam najgerek kaj jim bode štrajk pomogel? Najbrž to kaj bodo predi došli do stečaja? Ili pak bode Danko (ne Darko) Končar dobil na loto i unda dopela jedne tačke ili pak jeden japaner penez kaj zakrpa to lukjo brez dna.

Kaj se ve si čudijo, kak picek glisti, kaj ga prinas jega hajdi kuplerajov i hajdi kurveraja, i to prek sms poruki, vu visokoj politiki ak se odnegda zna da je politika kurva. Ispričavlem se kurvama jerbo one navek nam moškima davlejo vejč nek moremo zeti kaj se za politiko ne bi moglo reči. Ak je visoka politika tua vena unda se kurveraj more najti i mora ga biti i v nižešoj politiki. Ali za te nižeši kurveraj ne tre meti mobitele i ne dogovarjajo se za venodjanje prek sms poruki nego prek blanjki, obloki ili pak v kuruzi. Pusti sms poruke, pusti mobitele, spominke, nejglavneše je da se posel dela i da sima paše, pak makar se, na se zadje, i za to zazvedi posle sedem let. Pak kakši je to kurveraj za šteri nišči ne zna i z šterim se čovek (ili pak žena) nebre pofaliti. Nek posel ide dale, bole to nek da nam bodo zabavišta prazna. Jo je je? Je jo je!

Međimorci šteri mejajo Lejpo našo, ali na bole i nejso odišli vum, so se zišli v Zagrebo, glavnomo međimorskomo grado (posle Čakovca) odnegda. Tam več 80 let dela Zavičajno društvo Međimoraca, a ovo leto pak so cugle vlasti zeli v roke mladi digitalizirani ljudi šteri držijo v rokaj mobitele i ne pošiljajo si sms poruke nek gledijo čuda dale napre, a žir hez (glavni) je Damir Smrtičov, Međimorec šteri vedri i oblači na državnoj televiziji, ali posle deset vur navečer. Unda drugi odidejo spat, pak je jemo se otprto, očem reči, OTVORENO. Naprajli so v nejvekšoj zagrebečkoj hiži (26 katov) štero so ruon tak zazidali Međimorci, Tonček Mikecov i Jožek Švendov, sesijo spametnih Međimorcov kaj so jeni drugima pripovedali kak se kaj dela i kak tre delati kaj bodemo i Međimorci došli na 26 kat gospodarstva i gospodarstvenikov v Lepoj našoj. Hajdi se je Međimorcov zišlo, i minister Darko je došel. Čuda se je lepoga i dobroga pripovedalo, dospomenulo. Još tri-štiri takše sesije i Međimorci bodo prevzeli cugle vlasti v Lepoj našoj. Se vleče na to.

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE