18.9 C
Čakovec
Petak, 29 ožujka, 2024

Ej, aj športaši smo mi!?

[layerslider id=”6″]

Kak god je Lejpa Naša mala zemla i kak god ga nas Hrvatov saki den se meje i meje, ali kaj se športa dotikavle tu se jako dobro držimo. Istina je da so naši rokometaši igrali protiv Francozov kak da so jim bile pune gače, očem reči, kak da so se na kladionici kladili na Francoze ipak smo, na se zadje, bili peti i ve si velijo kak je to ne tak hudo i da smo još navek vu vrhu evropskoga rokometa. A kaj bodemo ve rekli ak je tak zišlo. No, dok se je po dvoranaj Lejpe Naše nahitavala rokometna laboda naši tenisači so igrali v Australiji i morem vam reči da je to tam čistam kredno zgledalo. Najbrž zbog naših ljudi šteri so tam več duže od pedeset let, a ve so drukali za naše. A za koga bi drugoga? Pak znajo otkod so došli i de so koreje ostajli. I v semo tomo je naš Dalmoš, Mate Pavič, osvojil dve zdelice  jerbo je bil nejbolši v parovima. Nejpredi je v soboto pobedil z pajdašom Oliverom, a unda mam i z pajdašicom Gabrijelom v nedelo vjutro i to zaron. Još smo se ne streznili od pet – šest jutrašjih fraklecom za Mateka i jegove pajdaše, a več je Marin Čilič  počel igrati protiv nejbolšega, kak staro vino, Federera. Morem vam reči Marin je bil čuda bolši nek lani vu Vimbldono i to tak dober kaj je Federer furt Božeka molil i to tak kaj smo ga mogli i čuti. I na se zadje je Federer i pobedil, ali je naš Marin bil čistam blizo pehara. No, neje ga dobil, ali ga je skorom dobil. Morem vam reči da smo se štimali z dečkima, ruon tak kak i naši Hrvati v Australiji. Šepurili smo se kak purani dok se špinčijo z svojimi repi. Saka čast dečki.

Dotiral sam do kraja faksa malo kesneše kak to delajo dobra deca, očem reči, dobri mamikini sineki, tak da sam več zmačal dok mi je diploma došla v roke. Makar sam dugo glancal klupe i smickal hlače na fakso ipak sam se štimal kaj sam i ja postal akademski, ali ne obični nek e-građanin Lejpe Naše. Velijo da smo ve si e. I mama se je štimala, ali malo po skrivečki i to navek dok je japa ne videl jerbo je on bil besen kak ris dok se je pre naši hiži spominalo o meni i mojemo fakso. Znate kak je bilo, na leta sam glodal ionak tenkoga hižnoga budžeta i nejsam se zbogradi toga preveč sekeral. Ali japa je rintal od jutra do zutra kaj sam se ja mogel gavaleriti po belom Zagreb grado. Ali ak so me japa i mama več meli unda nek se i brigajo za mene. Sa je sreča kaj je mama mela zadjo reč pre hiži jerbo da je ne bilo tak zdavnja bi me japa sforšibal Zagreba i več bi jeno sedem-osem let, nejmeje, delal v komunalo. No, kaj je tu je, nejpredi sam si z diplomo shodil radno knigico, kak bi se to negda reklo, a ve so me zapisali nekam v kompjuter i rekli so mi kak sam prepravleni za posel sam si ga moram najti. I to ne za bilo kakši. Za nekši, vredneši, svetešji, de se čuda ne dela, a dobavla se dosti dobra plača. Pak sam ne valjda zabadav tak dugo študeral. Nejpredi so me deli na čekanje dok se nekši takši posel ne najde, očem reči, zacajhali so me na burzo dela. A kaj sam ja napravil? Dok sam prečital v našaj novinaj kak se dugo čaka za mesto v domo za stare i stareše ljudi, mam sam se tua zapisal. Nigdar se ne zna. Ak več čakam na posel kaj nam unda čakal i na staračko postelo. Ak se mesto sprazni predi nek ga bodem nucal bodem ga prodal. Navek nešči nuca. Pak sam ne ja zabadav tak dugo študeral, nekaj sam se navčil. Mam sam nanjušil kak bi mogel onak usput, očem reči, vu fušo nekaj zaslužiti.

Pripoveda se i to več dugo, kak ovi kaj dobavlajo socijalno pomoč unda to potrošijo v kockarnicaj. Nebrem vam o tomo nikaj reči jerbo so auzlogi na kockarnicaj prefarbani na črno, pak se nutri nikaj ne vidi. Ali ak to velijo ovi pre čakoski gracki vuri šteri se nejbole znajo, unda je brzčas to tak. Ak je to tak unda bi i kockarnice trebale biti poštene pak bar frtalj dobička kaj dobijo, očem reči, zaslužijo vrnuti nazaj v kaso socijalnoga. I to bi vam unda bil pravi „perpetum mobile“ i tak bi se penezi furt vrteli v krug: i kockarnice bi mele posla, a i „socijalno“ peneze.

Što je to Jura Kolaričov? To sam vas več pital, a i spituval sam po Doljnjemo Međimorjo i Doljnjemo Hraščano i zazvedil sam da ga nišči ne pozna. Nesam si mogel mesta najti, pak da nišči ne pozna takšega školanoga čoveka, doktora, profesora i monsinjora Kolariča. Na se zadje sam zazvedil da dok je hercuval po svojemo Hraščano unda so ga si zvali Đurek Kovačov. A dok je odišel od hiže unda je sobom odnesel krsnoga kipčega i po jemo so ga si dale zvali Jura Kolaričov. Ve se pak zdigel veliki prah okoli jega i jegovoga dela. I ne sam okoli jega nek i jegovih pajdašov. Znate kak je to, dok svečeniki nekaj napravijo kaj se jim ruon ne šika i dok se počne pripovedati kaj se je nekaj poteplo unda se zvoni na sa zvona. No, ne ruon na sa nek sam na ona vekša. A kaj je to pravzaprav bilo tre zazvediti, očem reči, je li je bilo i ogja tam de se videl dim? Velijo oni šteri so kašlali okoli toga dima da je i te fiškal, šteri je to se zakuhal i zdigel toga velikoga praha, ne ruon nekše cvetje v belom Zagreb grado. A naš Đurek, on je navek delal kuliko je mogel, ak ne i vejč, i navek je skrbel za „sveto zemljo“, očem reči, raj zemaljski, kak Đurek lepo zove ovoga našega „Falačka zemle med dvemi vodami“ Ak moremo veruvati Đureko Kovačovomo, a ne da moremo nek moramo, jerbo je on završil visoke škole, a i napisal je čuda knigi, čuda vejč nek so nešterni od nas prečitali. I još dendenes piše knige i to tak kaj se se praši, makar mo več pomalem rokice drvčejo jerbo mo je več osma desetica na hrpto štera ga i nejbole tešči. Veli naš Đurek kak je naš dragi Božek Adama i Evo stvoril tu prinas v Međimorjo. Znate kak piše v knigi postanka, Božek je sveta stvoril na falačko zemle med dvemi vodami… A zakaj to nej bil te naš „Falaček“ med Murom i Dravom. A nesmemo Đureko pozabiti niti to kaj je predelal i zlišpal Bohnecovo hižo v Doljnjemo Hraščano, i ne sam hižo nek celoga grunta. I tam napravil etno-muzeja z šterim se mi Međimorci premalo štimamo. A naš Đurek je leta i leta potrošil kaj je se posložil i zlišpal onak kak si je on to pregruntal. I ne sam leta!

Pak se znova si spituvlemo, sami sebe ili pak jeni druge: kak se rešiti sive ekonomije i to one tamnosive, očem reči, dela na črno?  Pak to si znajo: jako, jako teško dok tak čuda penez tre davati v državno kaso, očem reči, dok so veliki porezi unda se splati fkajuvati. Nek si minister za zdraviče pregruna kaj mo je bole i spametneše?

Več hajdi let je Lejpa naša v Evropi, a još navek se je ne posložila tua cesta ili pak štreka po šteroj bi penezi dohajali z Brisela v Zagreb. Ne znati zakaj tre cele kupe paperov predi poslati v Brisel, a unda penezi dojdo ili pak ne dojdo. I to je još ne se. Naši ministri i naša ministarstva delajo tak kak da bi jif Brisel plačal, očem reči, treba par meseci prejti predi nek naši gospodarstveniki ili pak opčine, županije na kup namečejo se papere štere tre poslati v Brisel, mesto kaj bi pomogli gospodarstvenikima oni brenzajo kaj se paperi ne naberejo na vreme. A dok se papere ne namečejo na kup i ne pošlejo v Brisel unda penezi nigdar ne dojdejo niti k nam v Međimorje, a niti pak v Lejpo Našo. Jako sam najgerek što itak te kupe paperov premeče i čita v Briselo? Z druge strane naši peneze furt i na vreme odhajajo v EU kaso, a nazaj teško dojdejo kak da bi Škoti držali kaso.

Pred sam kraj minuloga leta v „svoj“ Čakovec, vu „svojo“ Gracko kavano je došla Lili Čaki Legenštajn. Lili je došla v kavano štero je jeni japa zafremal pred nekaj vejč od osamdeset let i tua so hodali si šteri su unda nekaj vredili v Čakovco i Međimorjo.  Gospođo Lili so v Čakovec pozvale puce i dečki z čakoskoga Muzeja i se je bilo vredo sam se je gospon Bacinger ne malo zanesel, pak je gospođa Lili jako teško došla do reči. A kuliko smo uspeli zazvediti ona jako rada ima Čakovca i zato si je za umjetničko ime, kak glumica, pjevačica i plesačica, zela ime Čaki. A mogla nam je još hajdi toga povedati.

Počnite se prepravlati, Fašnik nam je pred vrataj. Pazite kaj ne bomo kaj pozabili i kaj mo se namečemo kaj je zahuzal!

 

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE