[layerslider id=”6″]
Se najempot zgine dok dojde na vlast jegovo veličanstvo labodoritanje. Dok laboda, i to ne bilo kakša nek svecka, gene z centra. Tak je navek do ve bilo, a tek je i denes. Kakši hadeze Plenki, Jandrokovič, Reiner, kakši esdepe Bernardič, Komadina, Kovač, Novak, kakši „seljaki“ i Krešo Blaukpunt Šrafciger Beljak, kakši Pernar, Sinčič, Bunjac i Živi zid…, se se je to najempot preselilo v drugo, očem reči, selsko ligo, a si se spominajo sam o labodi i labodoritanju. I dok se pije kava i dok se trosijo kratki „unučiči“, dok se pijejo gemišti ili pak trosijo pive furt je spominek o labodi i labodoritanjo. Tre se znati što je kak zigral, što je i kulikopot fuljal, a što je i komo kulikopot zabil. Kaj bom vam rekel, venodjanje je palo tijam v tretjo ligo!
Kak da tua labodoritaška laboda ima nekšo čarobno botico i se probleme mam reši, očem reči, hiti jif nekam fkrej. Bar za kratko vreme. A ve je to ne kratko vreme jerbo labodoritaško svecko prvenstvo traje celi mesec. Ve nas najempot opče ne zanima kaj bode s Zdravkecom Mamičov, je li mo paše klima v Međugorjo i je li mo je ne preveč vroče. Ruon tak se nišči ne spomina za Agrokor i Iveka Todoriča, a kaj nebom spominjal Bandiča, Sanadera, Vidoševiča ili pak Horvatinčiča. Što bi rekel da to labodoritanje ima tak veliko moč? Sa sreča kaj je nekaj jakše, važneše i vredneše od politike i političarov!
Si velijo, kak športaši tak i političari da v životo tre čuda toga znati, ali tre meti i srečo. Tak je napriliko mel srečo naš međimorski i dobravski hadezeovec, Darko Horvatov, kaj ga je precednik Plenki na vremem postavil za ministra jerbo da ga je ve postavil dok se se vrti okoli nogoloptačke labode niti nišči ne bi mesec dni znal da je on minister.
Nekša čudna sorta krize je prinas v Međimorjo, ali i v Lepoj našoj. Si smo gledali, kaj gledali nek i drukali za naše labodoritaše dok so igrali protiv Nigerije, pak zato so i naši labodoritaši tak dobro igrali kaj smo si za jif drukali. No, pravzaprav sam vam štel reči je li ste v pamet zeli kuliko je bilo naši drukeri na igrališčo v Kalinjingrado? Tekmo je gledalo nekaj vejč od tridesti jezer drukerov i ljubitelov nogoloptačke labode, a saki treči je bil z Lejpe naše. Pak smo si vidli kak so cele tribine bile oblečene v črleno-bele kvadratiče. Ak je tak velika kriza kak se to jafče, pak de so unda te si Međimorci i Hrvati zmogli peneze kaj so išli na tekmo v Rusijo. Kuliko sam mel za čuti, Kalinjingrad je od Zagreba dauka cirka jezeroštiristo kilometrov i ne verjem da je za to tekmo bilo dosti jezeroštiristo kuni. Pak to tre jeno vreme jahati do ta, a unda pak isto tak dugo i nazaj. Ve je lefko bilo iti dimo dok se pobedilo, makar je bilo čuda dražeše. Znate kak je to, tre pobjedo zalevati na sakomo, no ne baš sakomo, kilometro. Ali ak čovek ima nekaj rad, kak mi imamo labodoritanje i labodoritaše unda je nikaj ne predrago i nikaj je ne predauko.
Dok bodete vi čitali ovo moje premišlavanje več bodete znali kak so naši labodoritaši prešli protiv Mesija i jegovih pajdašov. A ruon tak bodete znali kuliko je naših Međimorcov bilo na tekmi, a kuliko je bilo naših sosedov z Lejpe naše. Ovo Svecko labodoritaško prvenstvo bode dalo vum ono kaj se je dugo skrivalo kak mi Hrvati imamo vejč penez nek si to naš minister za peneze Zdravkec Maričov more spregruntati. Ne davlemo se v banke i to od unda dok nam one ne davlejo nikše kamate, ali zato si šparamo v štomfama ili pak strožokima tak kaj so nam furt pre roki dok tre nekam skočiti na tekmo ili pak nekšo drugo huncvutarijo za štero se nesme znati. Posle prvenstva se bode znalo što kaj i kuliko more i što kuliko vredi. Najgerek sam da to Plenki ne bode čital kaj mo nej na pamet palo kaj nam sam zbogradi labodoritanja pak zdigel poreze. Verjem da to ne bode tak napravil kaj bi se vidlo. Brzčas bode tak delal i dale kak dela i ve, pomalem zdiguvle cene benzina i nafte, mi jen kratek cajt gombamo dok tankamo, ali posle se stiha dale pelamo. Pak gombamo, nejvečpot sebi v brado, dok znova idemo na tankštel, ali Plenki to niti ne posluša, ali pomalem, furt i navek, prek tanšteli puni državno kaso. Dobro se je čovek zmislil toga hudiča.
Naši labodoritaši so se pofalili kak so dobra klapa i da zato tak dobro igrajo. Ali to je ne dugo trajalo. Sam dva dni posle kak smo Nigerijcima pokazali što bole zna nagajati labodo, več je izbornik Zlatkec Daličov poslal dimo Mikulo Kaliniča. Kak smo meli za čuti nekaj ga je vrezalo v kičmi, pak se je ne prignuti kuliko je trelo. Kuliko sam mel za čuti pre čakoski gracki vuri, a z tem se je složila i teca Franca, Kalinič je pravzaprav iskal od Daliča kaj bi v naši reprezentaciji igralo dvanajst igračov tak kaj bi furt jeno mesto bilo ostavleno za jega. Čim se je to ne tak rešilo Mikula se je zravnal dimo jerbo nema on čas čakati kaj bode i na jega došel red. Kuliko vidimo, a tak je i Mikula rekel, nega niti med labodoritaškim cvetjem pravice.
Ve dok si mi gledimo v telkače i noremo za labodoritanjem, negdašji i doživotni precednik, Stipe Mesičov, je stiha rekel, i to onak stiha kak se puščajo globeki, da bi on pak štel biti precednik. Ali ne precednik ribičkoga društva ili pak labodoritaškoga kluba nek Lejpe naše. Nebodete veruvali, čovek je deset let bil na Pantovčako i ve ga je počelo peči to kaj je nikaj ne ftegnol naprajti. Bar ne za Lejpo našo. Ve vidite kak to nešternim ljudima dojde, neje nikaj napravil i ve oče kaj bi mo dali još jenoga mandata, još pet let. Najgerek sam, jako sam najgerek je li se bode on več ve zmislil kaj bi štel naprajti? Još je skorom nišči ne zazvedil kaj je dedek senjal, a več se je oglasilo kumrovečko biračko telo.
Nebrem to razmeti: kak more biti vejč dečkov i to čuda vejč od puci, očem reči, kak more biti vejč neožejeni dečki od neožejeni puci? Najbrž bi to moglo biti tak kaj se naše međimorske puce nebrejo fčakati naši međimorski dečki kaj bi se nekaj hapili, pak othajajo z mokrom venom iskat isto takšega venoga kaj popuni to lukjicu štera jif saki den se bole i bole srbi. Ne kanim gombati, pak saka ljukica nuca štoplina, to je tak Božek dal, ali neje lepo kaj se naši dečki slabo kcoj držijo. Puce velijo kak so naši dečki za ništ, kak se ne znajo priložiti, kak jim morajo crtati kaj očejo i neje dosti kaj jim pokažejo. I još hajdi toga kaj jim bajajo. No, neje to ruon tak. Ve mi je v pamet došlo kak je to bilo negda, pred nekaj vejč od dvajsti let, da so naši dečki delali i zidali po Rusiji. Pak se je tam skorom saki oženil i dimo si je ženo dopelal. Vrag bi ga znal je li Ruskinje imajo nekaj kaj naše puce i žene nemajo ili pak so našle nešternoga drugoga pota do onoga kaj so štele i nucale. Prosil bi lejpo te naše, ve več stareše može, šteri so negda služili dolare v Rusiji nek navčijo ove mlajše dečke kak se tre posla okoli ženi prijeti. Trelo bi i tu zmisliti nekšo radionico i kaj nej več dale same živele puce, na jenoj strani, a dečki na drugoj strani. Se kaj bi se dobroga i lepoga naprajlo na temaj radionicaj bi se delo vu vrtiče štere još navek financera Evropa. Znate kak je i v Evropi, nucajo težake kaj jif nado morali iskati v Afganistano, Siriji, Palestini, Libiji.
