309[layerslider id=”6″]
Si znamo da je Advent vreme čakanja i vreme darivanja. Vreme darivanja je, več drugo leto, i za naše študente jerbo navek na početko Adventa Zaklada Mikec davle, očem reči, daruje našim študentima nove stipendije. Ovoga Adventa, ovo leto je gospon Mikec još povečal fondoša, povečal je stipendije, a i vejč je študentov dobilo peneze. Kaj je to ne lepo kaj se nešči briga za nas i našo deco kaj jif bode čim vejč hodalo na visoke škole, kaj bodemo čim vejč meli školane dece, očem reči, kaj bodemo spametneši. Nekaj me gvinta, neda mi moj črvek mira pak si gruntam zakaj ga takši ljudi, kak je gospon Mikec, tak malo? Dosti ga i naši ljudi šteri imajo ruon tuliko kak i gospon Mikec, a mortik i malo vejč, ali nikaj nedajo drugima i se žmulijo za sebe. Mortik si planerajo nesti sobom dok pejo k Božeko na račun? Imate praf, saki dela z svojim kaj oče, ali mogli bi nekaj dati i onima šteri nemajo niti tuliko kuliko nucajo, kak je to napravil gospon Mikec, naš čovek, Međimorec i Cirkovljančan, šteri vejč od pol stoletja dela v belom Zagreb grado. Fala, još jempot, gospono Tončeko Mikeco za se kaj je napravil za Međimorje, za Prilok, za Cirkovljan, fala vu ime onih šterima je pomogel i šterim još navek pomaže. Nikaj se vrednešega ne pripeti v Međimorjo kaj je gospon Mikec ne napisani kak sponzor ili pak donator. I Priločanci i Cirkovljančani navek na jega računajo, kak i Zrinska garda, a ve vidimo i naši študenti. I nigdar je ne rekel ne i nikomo je ne hrpta brnul ili pak trupnol z vratima pred nosom. Nek mo naš dragi Božek da zdraviče kaj bode još dugo mogel služiti peneze i kaj jif bode mogel deliti onima šteri jif nejbole nucajo. Saka čast našemo Tončeko i kapa do poda!
Još jeden Tonček je zaslužil kaj mo se zafalim za ono kaj dela i za se ono kaj je napravil. Zlišpal je cirkvo, dvorišče, farofa, pileke, kapele, a i zaškolal je čuda mladih ljudi, pokazal jim je pota po šteromo trebajo hoditi i kak trebajo delati. A cirkve so mo sako nedelo i na svetke navek pune, kak ona farna v Priloko tak i one v Cirkovljano i v Otoko. Verjem da ste si pregruntali da sam vam počel pripovedati o priločkomo župniko Tončeko Hoblajo, Štrukovčanec več 40 let dela kak gastarbajter v Priloko. Cirkovljančani se posebno štimajo z svojom cirkvom, z svojim trgom i parkom okoli cirkve. To je tak zlišpano kaj se i sveti Lovrek, cirkovljanski patron, štima z tem kaj je tu doma. No, neje to velečasni Tonček se sam napravil, ali on je pozval se Cirkovljančane šteri nekaj vredijo i držijo do sebe kaj so mo pomogli. On jif je pozval i bil je glavni paler. A Cirkovljančani se falijo kak so oni si vredni ljudi i jim je ne trelo tripot reči kaj se primejo posla i napravijo se kaj so velečasni rekli. A negda i vejč. Velečasni Tonček je genul Cirkovljančane, a unda so i Priločanci ne šteli biti hujši, pak so si i oni fljučnuli v šake i prijeli se posla. Navek sam govoril, a i ve ne mislim drugač, nejleži je biti gracki načelnik v Priloko. Ak nekaj načelniko nejde od roke, ak so mo ne se birke na brojo, on prejde prek vulice, ve ima i zebro, zmoli par Očenaši i Zdravomariji vu farni cirkvi Svetoga Jakoba i odide k velečasnomo Tončeko na kavico. No, ne ruon na kavico i velečasni mo pomore rešiti se nevole štere ga muočijo. Je ne lepo meti takšega čoveka vu varoši, a stopram vu fari. Pak zato je i Prilok, tak na fletnoma, forfaral Čakovca i ve se rivle kaj bode glavni grad Međimorja našega maloga. Fala prečasnomo Tončeko Hoblajo, priločkomo župniko i donjomeđimorskomo dekano. Tak so si i Priločanci pregruntali da se morajo zafaliti župniko za minulih četrdeset let kaj je vodil faro, opčino i Grada, pak so napisali knjigo vu šteroj je se nutri. Se kaj je velečasni delal, kaj još navek dela i kak i zakaj se štimajo žnjim. Hajdi je toga bilo tak da je ne bila dosti obična kniga nek so spakovali malo vekšo i malo deblešo, kak se i šika. Kaj se vidi i v megli. No, nejso ga falili i nejso mo se zafalil, sam Priločanci nek je to napravil i naš i varaždinski biškup monsinjor Jožek (moj imejak) Mrzljak. To mora biti brzčas jako dober čovek da so ga si falili!? I još nekaj, Priločanci so se nigdar, v minulih 40 let, ne bunili protiv svojega župnika, velečasnoga Tončeka, i nigdar so ne iskali od biškupa kaj jim pošle nekoga drugoga. Niti zapraf, niti pak skrivečki. Vidite kak je to lepo, a to si je i velečasni Tonček zaslužil. Probajte si pregruntati kak je to da so mož i žena ožejeni tuliko let, a saki den, i jen i drugi, molijo Božeka i pobirajo ga na red zakaj so se zišli, zakaj jif je sparil i zakaj so se oženili? Pak so oni sam dva, a znate kuliko ga farniki v Priločkoj fari? Saka čast velečasnomo Tončeko i nek mo naš dragi Božek da zdraviče kaj bode mogel još bar 20 – 30 let služiti vernikima (i sima drugima) v priločkoj fari. Zna Božek kaj dela i ne nuca nas druge kaj ga bodemo vučili jegovomo poslo. Ne znati je li se još delajo takši ljudi kak je velečasni Tonček? Fala mo za se dobro kaj je napravil, fala mo za se navuke štere nam je dal, fala mo kaj nas je negda i pošpotal, fala mo i za ono dok je z pesnicom vudril po stolo, fala mo za se one cajte dok smo se družili i veselim se sim onim cajtima šteri so još pred nami. Kaj drugo reči, fala prečasni. Fala sima onima šteri so knigo pisali kaj so ostajli još dosti prazni stranici tak da bodemo mogli i mi nekaj dopisati. A nekaj bode brzčas i velečasni dopisal i to makar unda dok nišči ne bode videl. A rukopisa mo si, fala dragomo Božeko, poznamo!
Advent je počel, nejsmo niti vidli da nam je prešel prek poceka. Nišči ga je ne v pamet zel dok je dohajal, a si smo ga dočakali i to onak kak Božek zapoveda. Nega niti jenoga grada ili pak opčine na ovomo našemo „falačko zemle med dvemi vodami“ šteri bar malo drži do sebe, a kaj nej meli svojega adventa. Kaj bodo ljudi okoli hodali lojsat i peneze trošit, nek se ostane doma. Advent je seposot sam ga tre najti i prepoznati. Čakovec, napriliko, ima tri Advente. Jeden je na placo pred farnom cirkvom, drugi je pre gracki vuri, a tretji v Staromo grado. A bilo bi, brzčas, i vejč toga da se je ne voda zmrzla na glavnomo trgo pre Orlo, pak se deca ve tam šklizajo. Kuliko poznam ove na Jugo Čakovca, oni se, ruon tak, spravlajo kaj bodo naprajli svojega Adventa sam kaj ne bodo morali hodati v Čakovec, očem reči, kaj ne bodo morali hodati prek Trnave i prek štreke.
Več odnegda sam vam govoril kak je Evropa za nas v Lepoj Našoj ne nikaj dobroga. Nesmo mi nucali jif nek oni nas, pomalem bodo oni se svoje narivali k nam na of naš hatar i tržili bodo nam se kaj bodo šteli, a nejveč onoga kaj nebrejo pre sebi doma prodati. I ne sam to, oni nam prdekuju kakši smo i kaj moramo delati kaj bodo oni rekli da vredimo. De so se sam našli si ti poštejaki vu toj maloj Evropi. I unda još složijo soda v Hagu i denejo nutri se te stare soce prdonje šteri nam pripovedajo kak je bilo v rato na ovomo našemo hataro, a nigdar so ne tu bili. Velijo, na papero se piše, a nejglavneši so oni paperi kaj so jim naši ljudi, Stef Mesičov i pajdašija, po skrivečki tua znosili. Oni se bole znajo od nas šteri smo tam bili. I nebremo si pomoči. Jif se posluša, jiva reč vredi, a z nas se norca delajo: kaj bodete vi bokčeki… I zato je tak je i na ovomo našemo sveto. Još jempot se je pripetilo da je Golijat stofjal Davida, još jempot so tri huda, tri loša (čitaj: soci v Hago) likviderali Miloša (čitaj: generala Praljka). I nikaj si nebremo pomoči, a Neretva mrzla i dale teče spot pod novim mostom v Mostaro.
Minuli tjeden je v čakoskoj šporckoj dvorani snimana emisija Lepom našom. Si šteri so ne bili, šteri so ne mogli do karti ili so ne meli čas, morejo si pogledati, kak je to bilo, zutra odvečer oliti podvečer na državnoj televiziji. Kaj ne bodete rekli da sam vam ne rekel i da bode unda zišlo kak zabadav plačamo pretplato jerbo ga nikaj spametnoga ne na televiziji.
To ste najbrž ne znali: zazvedilo se je, i to stoprocentno, da so mobitela ipak zmislile žene. Velijo oni kaj se z tem bavijo, niti jenomo moškomo nej palo na pamet kaj bi v mobitel zarival vibratora. Kaj velite?
