[layerslider id=”6″]
Da je Lejpa naša tak lepa i dobra, i tak penežljiva, kak pripovedajo naši političari, a nejbole jo fali i zagovarja naš precednik Drašek Plenkovičov, unda bi izbeglice ostale prinas, a ne kaj sam foršibaju črez naš hatar. Kuliko vidimo nešči jif je jako dobro fpotil kam morajo itit i dokod dojti. Ak naši ljudi hodajo, očem reči, odhajajo v Dojčland unda je ne nikaj čudno kaj i drugi tam najdejo se: i posla i hiže i peneze. A nešterni se i oženijo.
Več hajdi dugo se nekaj kuha v esdepeovom loncu, kak državnom tak i v županiskom, očem reči, Međimorskomo. Kak zgledi, to je se povezano kak i loncek, dok počne vreti ili pak kipeti v glavnom državnomo lonco unda se to prenese po celomo esdepejo. Nišči je ne uspel zbeči te nevole. To je takši beteg, dok počne kihati ili pak šmrcati Davor Bernardič v belom Zagreb grado črez par dni ista hetika prime i Mladena Novaka, Marija Medveda, Štefa Kovača, a i se druge šteri nosijo zastavo esdepeja črez Međimorje. Nadjal sam se da bodem nekaj zazvedil od Miranda Mrsiča v nedelo v dve vure, ali on je tak pomalem i tak medleno govoril kaj sam za par minot zaspal. Mortik je tak i v Partiji, si govorijo bole nikak kak da nemajo kaj reči. I kak unda bodemo mi znali kaj jif muoči i kak jim bode doktor i profesor Baltazar mogel prepisati pravoga leka?
Stranjski cajtungi so nas deli med prvih deset kak „Falaček zemle“ de se splati delati i živeti. Oni o nama tak velijo da smo ne dobri nek nejbolši, a naši ljudi odhajajo vum i iščejo nekaj bolše. Iščejo vuni kruha, a doma imajo kolača. A prinas ga jega sega: dober zrak, nejbolša voda na sveto, nejbolše vino, nejbolša tiblica, nejbolše koščično olje… I nejmenše plače. Ali si znamo da penez kvari čoveka i zato smo mi Međimorci ne pokvarjeni nek smo takši kakše nas je Božek stvoril. Kuliko vidimo ovi stranjski cajtungi so ne čuli za međimorski jal!
Trener Dinama je odišel po riti k meši, očem reči, za jim so se zaprla vrata maksimirskoga igrališča. Posle kak je zgubil od Lokomotive, velijo Hajdukovci da je Lokomotiva druga momčad Dinama, so ga čakali spakerani kufri pre potni lesi i karta za cug. Ali ne povratna. Mario Cvitanovič se je malo zaigral, pak so i igrači počeli tak igrati i pomalem dremati. A na to so ovi v Maksimiro (Mamič i pajdašija) ne navčeni. Kak sam več rekel, posle Lokomotive je zazvonilo na uzbuno i što bode prvi letel nek trener. Čuda je leži zmeniti trenera nek se igrače. Pak je navek tak bilo, ak lokomotiva (čitaj: trener) ne dela i ne vleče kak tre unda niti cug (čitaj: igrači) ne igrajo kak treba niti pak morejo dojti tua kam so se zravnali.
Od da smo se počeli spominati i svaditi o Istanbulskoj konvenciji mam se otprlo dosti toga kaj ruon preveč ne razmem. Spominali so se pre čakoski gracki vuri o tomo je li one žene štere so se ne nigdar ženile, očem reči, „stare puce“ spadajo med nedoteknuto prirodno bogactvo i da bi se o jima trebali brigati naši „mali zeleni“ šteri se brigajo i za Muro. Mortik i o tomo nekaj piše v Konvenciji, ali sam jo još ne dočital.
Za reč se je znova javil i Lacek llčičov i pofalil se je kak je svojega pimpeka nigdar ne mel v roki ak se ne računa ono v šekreto. Ne znati je li se je Lacek posvadil z venem jerbo ga ne posluhne navek dok bi trelo pak z takšim neče meti posla ili pak se navek pušče i ostavlja ga ženaj nek se one same hrvaju žnjim (samoposluživanje). Da je ne Istanbulska konvencija došla na svetlo dneva nigdar se nej zazvedilo v kakšim je odnošajima Lacek z svojim venem.
Ne bi znal točno reči, ali kuliko sam si pregruntal, Istanbulska konvencija je došla na svetlo dneva v Turskoj pak bi oni trebali biti prvi šteri jo bodo poštuvali i tak pokazati sim nam da je to nekaj spametno i nekaj jako dobro. Došlo je vum i to da one države štere jo ne bodo potpisale i ne bodo po joj delale bodo mele posla z Big Braderom. A si znamo kak je Veliki Brat grdi ak mo nešči stane na žulj. Očem, nečem, ali moram si gruntati o toj Konvenciji, pak me ve muoči to je li bodo moški, ruon tak, mogli ne sam v ženske šekrete nego i v hareme? Ak bodo nosili plahte (čitaj: feređe) unda se nebo mam vidlo štero je muško, a štero pak žensko. A nekša luknja se navek najde.
Negdi na Interneto sam prečital: Ak je ljubezen istinska i prava, spol je ne važen. Mortik nekaj i v Konvenciji o tomo piše?
Pak ve ne razmem kaj je z tom marihuanom? Pak smo još lani rekli da je to več ne droga nego lek, a ve so v rešt otpelali dečke z Čakovca i Strahoninca šteri so si posadili čaja kaj bodo žnjega leka delali. Kuliko vidimo neje sima se dopuščeno v ovoj Lepoj našoj makar tu prinas hercuje demokracija. Policaji so našli tegline z čajom i čaj je bil lepi lopošnati, a malo „ponucani dečki“ so se meli kaj je trelo kaj se te čaj pusti v promet dok zraste i ocvete. Se je to bilo v redo sam so dečki pozabili obrta prijaviti. Nebre se nekaj delati vu fušo, pak smo mi pravna država. A i dosti nam je te sive ekonomije.
Ve vidite kaj se nam je pripetilo. Došli so dečki i puce z Zagreba kaj so nam rekli kakši smo pravzaprav mi Međimorci je. Međimorci morejo se kaj nišči drugi v Lepoj našoj nebre. Tak so bar napisali. A zakaj mi Međimorci to ne vidimo? Ovi Zagreba tuliko dojdejo kaj svajo med nami napravijo jerbo se to unda čuje, čita i pripoveda, a dok se penezi v Zagrebo delijo nam nedajo nikaj. Velijo, vi se imate, a kaj nemate bodete si sami naprajli. Kak i navek do ve!
Ruon tak je došla puca Zagreba i nafalila je Čakovca i čakoskoga gradonačelnika kak daj to za plačo delala. Čakovec je v semo nejbolši: voda, kanalizacija, prečistači, škole (južine, knige, suradnici, prevozi), fakulteti, sortera se smetje, nega nikoga na burzi dela, nejmeje uhljebi ima… I kaj nebom dale pripovedal kak so ga nafalili. Se je to lepo i dobro sam ne znati zakaj je unda Čakovec med sem gradima v Međimorjo na odličnomo tretjemo mesti?
Saka čast dečkima i pucama z Međimorskoga demokrackoga saveza. Oni furt nekaj delajo i tak mi hajdi toga zazvedimo kaj nigdar ne bi da ga jiv ne. Ve oni spituvlejo, kak sebe tak i nas: Zakaj Dalmoši nejdejo vum z Lejpe naše iskat bolšega i slajšega kruha? Kaj bodo išli nekam iskat ak se takši kak je v Dalmaciji nigdi na sveto ne peče. Rečite mi, prosim vas lejpo, de v Evropi ili pak na sveto, postoji država vu šteroj se dela 3 – 4 mesece i od toga se živi celo leto. I to jako dobro?
Ak so se javili antifašisti i jif precednik Zvonkec. Nebrem razmeti kaj bi on štel? Furt mo nekaj ne oaše. Nikak mi nejde v glavo zakaj rivle antifašiste i partizane napre pred naše branitele? Pak so naši braniteli vudrili fondoša Lepoj našoj, a ne partizani. Ruon tak mo ve smeta HOS (Hrvacke obrambene snage), a 1991. leta dok so dečki išli z tem znakom v rat unda jif je nišči ne zastavljal i nišči se je ne rival na jivo mesto. Ili pak pre jif. Ve posle dvajsti let gombajo, a dok je trelo iti z puškom v roki unda so bili stiha kak kupček v travi. I još nekaj, nejde mi v glavo kak se Zvonkec srdi kaj mo malo ljudi dojde na Den antifašizma (22.06.), a to kaj on nigdar ne dojde za Den državnosti (25.06.) to nikaj ne veli. Moramo posložiti se po redo, moramo znati kaj je važno, a kaj važneše za Lejpo našo. Nejhujši so mi oni kaj se kritizerajo kaj se dotikavle Lejpe naše, a još dendenes so ne niti dneva v joj preživeli. Još navek so v Jugi!
Gospon i doktor, Danijel Režek, je mel izložbo svojih bikov v Priločkomo muzejo. To mo je četrta izložba posle Čakovca, Zagreba i Varaždina. Vu zadje cajte ima šego kaj se bike šteri so na izložbi ostavlja tam de so bili pokazani. Tak je ostavil nekaj Mimari v Zagrebo, nejveč jif je dal v čakoski muzej. Ipak je on Čakovčanec makar ga čakoski gracki načelnik baš ne štima. Ve pripravla jenoga velikoga kupčeka za Varaždince, a se kaj je v Prilok donesel tam bode i ostalo, kajbi rekel, Režekova izložba bikov je bila, Režek je odišel, a biki so ostali Priloko. Vidite, dok čovek ima čuda unda more čuda i podeliti. Ako ima voljo, očem reči, ako oče. Nešterni imajo čuda vejč, pak sam žmulijo za sebe.
Protuletje nam dohaja, več je pred vrati, na poceko. Ranjka, A mraz pod vrati.
